မြန်မာနိုင်ငံတွင် တည်ဆောက်မည့် နျူကလီးယား ဓာတ်အားပေးစက်ရုံက လျှပ်စစ်ဓာတ်အား မဂ္ဂါဝပ် ၁၁၀ ထုတ်လုပ်ပေးနိုင်ပြီး မဂ္ဂါဝပ် ၃၃၀ အထိ တိုးချဲ့သွားနိုင်

ရုရှားနှင့်မြန်မာ နှစ်နိုင်ငံပူးပေါင်းဆောင်ရွက်မည့်သဘောတူညီချက်များတွင် စွမ်းအင်ကဏ္ဍ အဓိကပါဝင်

၅.၃.၂၀၂၅
Translated by Htwe Ko Tun

မြန်မာနိုင်ငံ SAC အစိုးရအဖွဲ့ဥက္ကဋ္ဌနဲ့ နိုင်ငံတော်ဝန်ကြီးချုပ်ဗိုလ်ချုပ်မှူးကြီးမင်းအောင်လှိုင်နဲ့ ရုရှားနိုင်ငံသမ္မတ ဗလာဒီမာ ပူတင်တို့ရဲ့ကရင်မလင်နန်းတော်မှာ မတ်လ ၄ ရက် က တွေ့ဆုံဆွေးနွေးမှုမှာ နှစ်ဖက် ပူးပေါင်းဆောင်ရွက်ဖို့ သဘောတူညီချက်အများအပြားလက်မှတ်ထိုးနိုင်ခဲ့တာမှာ စွမ်းအင်ကဏ္ဍကလည်း အဓိကပါဝင်နေတယ်လို့ သတင်းတွေအရ သိရပါတယ်။

ရုရှားနိုင်ငံရဲ့ Rossiya 24 ရုပ်မြင်သံကြားဌာနက မြန်မာနိုင်ငံမှာ အသေးစား နျူကလီးယားဓာတ်အားပေးစက်ရုံတစ်ခုတည်ဆောက်ရေး ပူးပေါင်းဆောင်ရွက်ကြဖို့ အခြေခံမူတွေကို နှစ်ဖက်သဘောတူလက်မှတ်ထိုးခဲ့ကြတယ်လို့ ပြောကြားခဲ့ပါတယ်။

ရုရှားနိုင်ငံရဲ့ နိုင်ငံပိုင် နျူကလီးယားစွမ်းအင်ကော်ပိုရေးရှင်းဖြစ်တဲ့ Rosatom ကလည်း အစိုးရအချင်းချင်းရရှိခဲ့တဲ့သဘောတူညီချက်အရ လျှပ်စစ်ဓာတ်အား မဂ္ဂါဝပ် ၁၁၀ ထုတ်လုပ်ပေးနိုင်မယ့် နျူကလီးယား ဓာတ်အားပေးစက်ရုံစီမံကိန်းကို မြန်မာနိုင်ငံမှာ အကောင်အထည်ဖော်သွားမှာဖြစ်ပြီး ဒီစက်ရုံက မဂ္ဂါဝပ် ၃၃၀ ထုတ်လုပ်ပေးနိုင်တဲ့အထိ တိုးချဲ့သွားနိုင်တယ်လို့ သိရပါတယ်။

ဒါ့အပြင် ဆွေးနွေးပွဲအပြီးမှာ သမ္မတပူတင်က ပြန်လည်ပြည့်ဖြိုးမြဲစွမ်းအင်ရရှိရေးအတွက် အခွင့်အလမ်းတွေကိုလည်း နှစ်နိုင်ငံပူးပေါင်းပြီး ရှာဖွေဖော်ထုတ်နေတယ်လို့ ပြောခဲ့ပါတယ်။

Rosatom က မြန်မာနိုင်ငံအတွင်းမှာ လျှပ်စစ်ဓာတ်အား ၁၇၂ မဂ္ဂါဝပ် နဲ့ ၂၀၀ မဂ္ဂါဝပ် အသီးသီးထုတ်လုပ်နိုင်မယ့် လေအားလျှပ်စစ်ဓာတ်အားပေးစက်ရုံတွေတည်ဆောက်ဖို့ စီစဉ်နေတယ်လို့လည်း သိရပါတယ်။ ဒီစီမံကိန်းတွေအတွက် ဖြစ်နိုင်ခြေလေ့လာမှုတွေစတင်ဖို့ နားလည်မှုစာချွန်လွှာကို Rosatom နဲ့ မြန်မာအစိုးရအကြား လက်မှတ်ရေးထိုးခဲ့ပြီးလည်း ဖြစ်ပါတယ်။

ခေါင်းဆောင်နှစ်ဦးရဲ့ ဆွေးနွေးပွဲအပြီး ပူးတွဲကြေညာချက်မှာ အပြန်အလှန်အကျိုးရှိတဲ့ ကုန်သွယ်မှုနဲ့ ရင်းနှီးမြှုပ်နှံမှုတွေ နက်ရှိုင်းစွာပူးပေါင်းဆောင်ရွက်ဖို့ အဆင်သင့်ရှိတယ်လို့လည်း ဖော်ပြခဲ့ကြပြီး ၂၀၂၄ ခုနှစ်အကုန်မှာ နှစ်နိုင်ငံကြားကုန်သွယ်မှုပမာဏ ၄၀ ရာခိုင်နှုန်းမြင့်တက်ကာ ဒေါ်လာ နှစ်ဘီလျံနီးပါး ရှိလာတယ်လို့ သိရပါတယ်။

Ref- Interfax