၄.၃.၂၀၂၅
Written By Zun
ထိုင်းနိုင်ငံ၊ ကန်ချနဘူရီခရိုင်၊ ထောင်ဖာဖှုန်မြို့နယ်အတွင်း တရားမဝင် အထောက်အထားမဲ့ မြန်မာနိုင်ငံသား ၁၄ ဦးကို ထိုင်းအာဏာပိုင်များက ဖမ်းဆီးလိုက်ကြောင်း ထိုင်းဒေသတွင်း သတင်းများအရ သိရသည်။
ယနေ့ မတ်လ ၄ ရက် နံနက်ပိုင်းက ကန်ချနဘူရီခရိုင်၊ ထောင်ဖာဖှုန်မြို့နယ်၊ ထာ့ခနွန်ကျေးရွာဘက်ကို အထောက်အထားမဲ့ မြန်မာနိုင်ငံသားများ ဝင်ရောက်လာကြောင်း သတင်းအရ ထိုင်းအာဏာပိုင်များက သွားရောက်စစ်ဆေးခဲ့ကြသည်။
ထိုင်းအာဏာပိုင်များက စစ်ဆေးရာတွင် ထောင်ဖာဖှုန်-ဟွေ့ခယိန် လမ်းမကြီးအတိုင်း မောင်းနှင်လာသည့် မသင်္ကာဖွယ်ရာ ပစ်ကပ်ကားတစ်စီးကို တားဆီးစစ်ဆေးစဉ် အထောက်အထားမဲ့ မြန်မာနိုင်ငံသားများအား ဖမ်းမိခဲ့ခြင်းဖြစ်သည်။
ပစ်ကပ်ကားကို တားဆီးစဉ် ကားကိုရပ်တန့်၍ မြန်မာ နိုင်ငံသား ၁၄ ဦးကို တင်ဆောင်လာသူ ယာဉ်မောင်းမှာ ထွက်ပြေးသွားကြောင်း၊ အဆိုပါ ကား၏ နောက်ခန်းတွင် မိုးကာခြင့် ဖုံးအုပ်ပြီး လိုက်ပါလာသည့် အထောက်အထားမဲ့ မြန်မာနိုင်ငံသား ၁၄ ဦးကို ထိုင်းအာဏာပိုင်များက တွေ့ရှိပြီး ဖမ်းဆီးခဲ့ခြင်း ဖြစ်ကြောင်း သိရသည်။
ဖမ်းဆီးခံရသူများတွင် အမျိုးသား ၁၂ ဦး၊ အမျိုးသမီး ၂ ဦးပါဝင်ကြောင်း၊ အဆိုပါ မြန်မာနိုင်ငံသားများက ထိုင်းနိုင်ငံအတွင်း အလုပ်လုပ်ကိုင်နိုင်ရန် လူတစ်ဦးလျှင် ပွဲစားခ ဘတ် (၂၀၀၀၀) စီပေး၍ မြန်မာနိုင်ငံ၊ ဘုရားသုံးဆူဘက်ကနေ ဝင်ရောက်လာခဲ့ကြခြင်း ဖြစ်ကြောင်း စစ်ဆေးစဉ် ဝန်ခံထွက်ဆိုခဲ့သည်။
ယင်းကြောင့် ဖမ်းဆီးရမိသူများအား ထောင်ဖာဖှုန်ရဲစခန်း၌ ဖမ်းဆီးထိန်းသိမ်းထားပြီး ထိုင်းနိုင်ငံအတွင်း တရား မဝင်ရောက်လာမှုဖြင့် အမှုဖွင့်လှစ်ထားကာ ဥပဒေအရ အရေးယူဆောင်ရွက်သွားမည် ဖြစ်ကြောင်း၊ အရေးယူပြီးပါက နယ်စပ်ကတစ်ဆင့် မြန်မာနိုင်ငံဘက်ကို ပြန်လည်ပို့ဆောင်သွားမည် ဖြစ်ကြောင်း ဒေသတွင်း သတင်းများက ဖော်ပြကြသည်။
