၄. ၃. ၂၀၂၅
Written by Thettant
လွိုင်လင်၊ ပင်လောင်းနှင့် ဆီဆိုင်မြို့နယ်တို့တွင် စိုက်ပျိုးထားသည့် ဘိန်းစိုက်ခင်းဧက ၄၀ ခန့်အား မြန်မာနိုင်ငံရဲတပ်ဖွဲ့က ရှာဖွေ ဖျက်ဆီးနိုင်ခဲ့ကြောင်း ပြည်ထဲရေးဝန်ကြီးဌာနက ယနေ့ ထုတ်ပြန်ထားသည်။
မြန်မာနိုင်ငံသည် ၂၀၂၄ ခုနှစ်အတွင်း ဘိန်းစိုက်ပျိုးထုတ်လုပ်မှု အနည်းငယ်ကျဆင်းခဲ့သော်လည်း ကမ္ဘာ့ဘိန်းနှင့် ဘိန်းဖြူတို့၏ အဓိကအရင်းအမြစ်အဖြစ် ရပ်တည်နေဆဲဖြစ်ကြောင်း မူးယစ်ဆေးဝါးနှင့် ရာဇဝတ်မှုဆိုင်ရာ ကုလသမဂ္ဂရုံး (UNODC) က ထုတ်ပြန်ခဲ့သလို ရှမ်းပြည်နယ်သည်လည်း ဘိန်းစိုက်ပျိုးမှုအများဆုံးဖြစ်နေသဖြင့် မြန်မာနိုင်ငံရဲတပ်ဖွဲ့ဝင်များက တရားမဝင်စိုက်ပျိုးထုတ်လုပ်နေသော ဘိန်းစိုက်ခင်းများကို ရှာဖွေဖျက်ဆီးနေရာ ၂၀၂၅ ခုနှစ်၊ ဖေဖော်ဝါရီ ၂၈ ရက် နံနက် ၈ နာရီ ၃၀ မိနစ်တွင် ရှမ်းပြည်နယ်(တောင်ပိုင်း)၊ လွိုင်လင်မြို့နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် လွိုင်လင်မြို့နယ်၊ ဟဲနန်းကျေးရွာအုပ်စု၊ ပေါင်းလိုင်းကျေးရွာ မြောက်ဘက် ၄ ဖာလုံခန့်အကွာ၌ အမြင့် သုံးပေခန့်ရှိ ဘိန်းခင်း လေးဧကခန့်၊ ဟွေကုန်ကျေးရွာအရှေ့တောင်ဘက် ၁ မိုင်ခွဲခန့်အကွာ၌ အမြင့် သုံးပေခန့်ရှိ ဘိန်းခင်း သုံးဧကခန့် စုစုပေါင်းဘိန်းခင်း ခုနစ်ဧကခန့်အား ဖျက်ဆီးနိုင်ခဲ့သည်။
အလားတူ နံနက် ၈ နာရီ ၄၀ မိနစ်တွင် ပင်လောင်းမြို့နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က ပင်လောင်းမြို့နယ်၊ မင်းဘူးကျေးရွာအုပ်စု၊ ကလင်ကျေးရွာအနောက်ဘက် ၇ ဖာလုံ ခန့်အကွာ၌ အမြင့် သုံးပေခန့်ရှိ ဘိန်းခင်း ၂၀ ဧကခန့်နှင့် နံနက် ၉ နာရီ ၅ မိနစ်တွင် ဆီဆိုင်မြို့နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က ဆီဆိုင်မြို့နယ်၊ ဘန့်ဗွီးကျေးရွာအုပ်စု၊ နားစေးစောက်ကျေးရွာ အနောက်ဘက် ၁ ဖာလုံခန့်အကွာ၌ အမြင့် သုံးပေခန့်ရှိ ဘိန်းခင်း ၁၃ ဧကခန့်တို့အား အသီးသီးဖျက်ဆီးခြင်းများ ဆောင်ရွက်ခဲ့ကြောင်း သတင်းရရှိသည်။
