၄.၃.၂၀၂၅
Written by Shwe Phyo
ရုရှားကုမ္ပဏီများသည် မြန်မာနိုင်ငံနှင့် ပူးပေါင်းဆောင်ရွက်ရန် စီစဉ်နေသည့် ထားဝယ် အထူးစီးပွားရေးဇုန် စီမံကိန်းတွင် ရင်းနှီးမြှုပ်နှံမှုများနှင့် ပူးပေါင်းဆောင်ရွက်မှုများ ပိုမိုလုပ်ဆောင်ရန် စီစဉ်နေကြောင်း ရုရှားဖက်ဒရေးရှင်းနိုင်ငံဝန်ကြီးချုပ်၊ မစ္စတာ မီခေးလ် မီရှူစတင်က ထုတ်ဖော်ပြောဆိုလိုက်သည်။
ရုရှားဝန်ကြီးချုပ်သည် ရုရှားနိုင်ငံကို ချစ်ကြည်ရေးခရီးရောက်ရှိနေသည့် SAC အစိုးရအဖွဲ့ အကြီးအကဲ ဗိုလ်ချုပ်မှူးကြီးမင်းအောင်လှိုင်နှင့် မတ်လ ၄ ရက်နေ့က တွေ့ဆုံဆွေးနွေးချိန်အတွင်း ထည့်သွင်းပြောဆိုခဲ့ခြင်းဖြစ်ကြောင်း ရုရှားအခြေစိုက်မီဒီယာများတွင်ဖော်ပြထားသည်။
ရုရှားဝန်ကြီးချုပ်က “ရင်းနှီးမြှုပ်နှံမှုနယ်ပယ်မှာ ပူးပေါင်းဆောင်ရွက်မှု တိုးမြှင့်ဖို့ အဆိုပြုထားပါတယ်။ ရုရှားကုမ္ပဏီတွေဟာ ထားဝယ်အထူးစီးပွားရေးဇုန်စီမံကိန်းမှာ ပူးပေါင်းပါဝင် ရင်းနှီးမြှုပ်နှံဖို့ ရည်ရွယ်ထားတယ်” ဟုပြောသည်။
အဆိုပါ ထားဝယ်အထူးစီးပွားရေးဇုန် စီမံကိန်းသည် အပြန်အလှန်ကုန်သွယ်ရေးများ တိုးမြှင့်လာမည်ဖြစ်သလို အသေးစား၊ အလတ်စား စီးပွားရေးလုပ်ငန်းများအပါအဝင် အလုပ်အကိုင်၊ အခွင့်အလမ်း အသစ်များဖန်တီးပေးနိုင်ဖွယ်ရှိနေကြောင်း သိရသည်။
ထို့အပြင် ရုရှားနိုင်ငံသည် မြန်မာနိုင်ငံမှ ရွှေ့ပြောင်းအလုပ်သမားများကိုခေါ်ယူရန် ကြိုးပမ်းနေကြောင်း သိရသည်။
ရုရှားစီးပွားရေးဖွံ့ဖြိုးတိုးတက်မှု ဆိုင်ရာ ဝန်ကြီး Maxim Reshetnikov ကလည်း မြန်မာနိုင်ငံတွင် လူဦးရေ ၅၅ သန်းကျော်ရှိနေပြီး ပြည်ပနိုင်ငံသားများသို့ သွားရောက်အလုပ်လုပ်ကိုင်နေသူ ဦးရေ ၆ သန်းရှိနေကြောင်း ပြောသည်။
ရုရှားစီးပွားရေးဖွံဖြိုးတိုးတက်မှုဆိုင်ရာဝန်ကြီးက ” ကျွန်တော်တို့ဟာ ရုရှားနိုင်ငံကို တရားဝင်ချစ်ကြည်ရေး ရောက်ရှိနေတဲ့ မြန်မာအစိုးရတာဝန်ရှိသူများနဲ့ ရွှေ့ပြောင်းအလုပ်သမားတွေခေါ်ယူရေးကိစ္စကိုဆွေးနွေးမယ်” ဟု ပြောသည်။
Rff, interfaxru
