ဒီမိုကရေစီ၊ လူ့အခွင့်အရေးနှင့် မီဒီယာများအတွက် အမေရိကန် ဒေါ်လာ ၄၅ သန်းအပါအဝင် ၂၀၂၅ ခုနှစ်အတွက် မြန်မာနိုင်ငံသို့ ထောက်ပံ့ရန် ခန့်မှန်းထားသည့် ဒေါ်လာ ၂၅၉ သန်းကို အမေရိကန် ဖျက်သိမ်း
၄. ၃. ၂၀၂၅
Translated by Tha Doe
ဒီမိုကရေစီ၊ လူ့အခွင့်အရေးနဲ့ မီဒီယာတွေအတွက် အမေရိကန် ဒေါ်လာ ၄၅ သန်းအပါအဝင် ၂၀၂၅ ခုနှစ်အတွင်းမှာ မြန်မာနိုင်ငံကို ထောက်ပံ့မယ်လို့ ခန့်မှန်းထားတဲ့ ဒေါ်လာ ၂၅၉ သန်းကို အမေရိကန်နိုင်ငံက ဖျက်သိမ်းလိုက်တယ်လို့ Human Right Myanmar (HRM) က ထုတ်ပြန်လာပါတယ်။
ဒေါ်လာဘီလျံများစွာ မသမာမှုတွေနဲ့ ဝေဖန်ခံနေရတဲ့ USAID ကို ပိတ်လိုက်မှုနဲ့အတူ မြန်မာနိုင်ငံဟာ ထရန့်ရဲ့ သမ္မတသက်တမ်းတစ်လျှောက် အကူအညီ ဒေါ်လာ ၁ ဒသမ ၁ ဘီလျံခန့် ဆုံးရှုံးနိုင်တယ်လို့ တွက်ချက်ထားပြီး ဒီအထဲမှာ ဒီမိုကရေစီလှုပ်ရှားမှုအတွက် ရည်စူးထားတဲ့ စုစုပေါင်း ဒေါ်လာ ၁၈၁ သန်းလည်း အပါအဝင်ဖြစ်တယ်လို့ HRM က ပြောပါတယ်။
အမေရိကန်ရဲ့ ဖြတ်တောက်မှုတွေက မြန်မာ့ဒီမိုကရေစီရေးလှုပ်ရှားမှု၊ အရပ်ဘက်လူမှုအဖွဲ့အစည်းတွေနဲ့ လူသားချင်းစာနာထောက်ထားမှုဆိုင်ရာ ပံ့ပိုးကူညီမှုအပေါ် မှီခိုနေရတဲ့ သန်းပေါင်းများစွာသော ပြည်သူတွေအတွက် ဆိုးရွားတဲ့ ထိုးနှက်ချက်တစ်ခုဖြစ်လာမယ်လို့လည်း HRM က ဆိုပါတယ်။
အကူအညီပေးရေးစာချုပ်တွေရဲ့ ၉၀ ရာခိုင်နှုန်းကို ဖျက်သိမ်းဖို့ ဖေဖော်ဝါရီ ၂၇ ရက်မှာ ဆုံးဖြတ်လိုက်တဲ့ အမေရိကန်အစိုးရရဲ့ ဆုံးဖြတ်ချက်က မူဝါဒဆိုင်ရာ မကြုံစဖူးပြောင်းလဲမှုတစ်ခုဖြစ်ပြီး အမေရိကန်ရဲ့အကူအညီက မြန်မာနိုင်ငံအတွက် ကမ္ဘာလုံးဆိုင်ရာအကူအညီစုစုပေါင်းရဲ့ ၂၆ ရာခိုင်နှုန်းရှိပေမဲ့ ဒီထောက်ပံ့ငွေတွေကိုတော့ အာဏာပိုင်တွေဆီကနေ စီးဆင်းတာမဟုတ်ဘူးလို့လည်း HRM က ပြောပါတယ်။
မြန်မာနိုင်ငံဟာ အာရှ-ပစိဖိတ်ဒေသအတွင်းမှာ USAID ရဲ့ ရန်ပုံငွေကို ထိပ်တန်းလက်ခံသူဖြစ်ပြီး ကမ္ဘာပေါ်မှာ နဝမမြောက်အကြီးဆုံး အထောက်အပံ့ရရှိမှုအဖြစ် ၂၀၂၃ ခုနှစ်မှာ ဒေါ်လာ ၂၃၆ သန်း၊ ၂၀၂၄ ခုနှစ်မှယ ဒေါ်လာ ၂၃၇ သန်းနဲ့ ၂၀၂၅ ခုနှစ်မှာ အမေရိကန်ဒေါ်လာ ၂၅၉ သန်း ရရှိဖို့ မျှော်မှန်းခဲ့တာပါ။
ဒီမျှော်မှန်းထားတဲ့ ၂၀၂၅ ခုနှစ် ရန်ပုံငွေထဲက ဒေါ်လာ ၁၇၂ သန်း (၇၂ ရာခိုင်နှုန်း) ကို လူသားချင်းစာနာထောက်ထားမှုအကူအညီ၊ ကျန်းမာရေးစောင့်ရှောက်မှု၊ စိုက်ပျိုးရေးနဲ့ ပညာရေးအတွက် ခွဲဝေပေးမှာဖြစ်ပြီး နောက်ထပ်ဒေါ်လာ ၄၄ သန်း (၁၉ ရာခိုင်နှုန်း) ကို ဒီမိုကရေစီ၊ လူ့အခွင့်အရေးနဲ့ မီဒီယာပရောဂျက်တွေအတွက် သုံးစွဲဖို့ လျာထားခဲ့တာပါ။
ဒါ့အပြင် ဗြိတိန်နိုင်ငံကလည်း ဖေဖော်ဝါရီ ၂၅ ရက်မှာ နိုင်ငံခြားအကူအညီ ဘတ်ဂျက်ကို ၄၀ ရာခိုင်နှုန်း လျှော့ချကြောင်း ကြေညာခဲ့လို့ ၂၀၂၅ ခုနှစ်အတွက် အကူအညီ ဘတ်ဂျက် ဒေါ်လာ ၅၅ သန်းအစား ဒေါ်လာ ၂၈ သန်းသာ ရရှိမည်ဖြစ်ပြီး အာဏာထိန်းသိမ်းမှုနဲ့ COVID-19 ကပ်ရောဂါ မတိုင်မီက ထောက်ပံ့ပေးထားတဲ့ ဒေါ်လာ ၁၂၁ သန်းကနေ သိသိသာသာ ကျဆင်းသွားမှာလို့လည်း HRM က ဖော်ပြထားပါတယ်။
Ref, Human Right Myanmar (HRM)
