၄. ၃. ၂၀၂၅
Written by Nyein Kyaw
မြန်မာနိုင်ငံတော်ဗဟိုဘဏ်အနေဖြင့် နိုင်ငံခြားငွေကြေးဈေးကွက် (FX Trading Platform) တွင် စက်သုံးဆီလုပ်ငန်းရှင်များအား ဒေါ်လာ ၂၃ သန်းနှင့် ထိုင်းဘတ်သန်း ၁၅၀ ရောင်းချပေးမည်ဖြစ်ကြောင်း ယမန့်နေ့က ထုတ်ပြန်ထားသည်။
မတ်လ ၃ ရက် (ယမန်နေ့)တွင် ဗဟိုဘဏ်မှ စက်သုံးဆီလုပ်ငန်းရှင်များအတွက် ဒေါ်လာ ၂၃ သန်းနှင့် ထိုင်းဘတ် ၁၅၀ အပြင် သွင်းကုန်လုပ်ငန်းရှင်များအတွက်လည်း ဒေါ်လာ ၅၅၀,၀၀၀၊ တရုတ်ယွမ် ၄၀၀,၀၀၀ နှင့် ထိုင်းဘတ် ၆၃၈,၅၅၀ ထုတ်ရောင်းပေးခဲ့သည်။
ပြီးခဲ့သည့် ဖေဖော်ဝါရီလအတွင်း ဗဟိုဘဏ်မှ စက်သုံးဆီလုပ်ငန်းရှင်များအတွက် ဒေါ်လာသုံးကြိမ်ရောင်းပေးခဲ့ရာ စုစုပေါင်းပမာဏ ဒေါ်လာ ၆၇ သန်းရှိခဲ့ပြီး ထိုင်းဘတ်သန်း ၁၅၀ ရောင်းချပေးခဲ့သည်။ ဇန်နဝါရီလအတွင်း စက်သုံးဆီလုပ်ငန်းရှင်များအတွက် ဒေါ်လာ ၄၅ သန်းရောင်းချပေးခဲ့ခြင်းဖြစ်သည်။
ပြီးခဲ့သည့် ဇန်နဝါရီလအတွင်း စက်သုံးဆီဈေးနှုန်းများ ပြန်လည်မြင့်တက်လာခဲ့၍ တစ်လအတွင်း ဒီဇယ်ဈေးနှုန်းများ အမျိုးအစားအပေါ်မူတည်၍ တစ်လီတာ ကျပ် ၂၅၀ မှ ၃၀၀ ဝန်းကျင်နှင့် ဓာတ်ဆီဈေးနှုန်းများသည် အမျိုးအစားအပေါ်မူတည်၍ တစ်လီတာ ကျပ် ၁၅၀ ဝန်းကျင် မြင့်တက်လာမှုများရှိခဲ့ပြီး ဖေဖော်ဝါရီလတွင်လည်း အနည်းငယ်ထပ်မံမြင့်တက်ခဲ့သည်။
စက်သုံးဆီဈေးကွက်အတွင်း ယနေ့တွင် ဓာတ်ဆီ ၉၂ တစ်လီတာ ကျပ် ၃,၂၃၀ ကျပ်၊ ဓာတ်ဆီ ၉၅ တစ်လီတာ ၃,၂၈၀ ကျပ်၊ ရိုးရိုးဒီဇယ် တစ်လီတာ ၂,၇၆၀ ကျပ်နှင့် ပရီမီယံဒီဇယ် တစ်လီတာ ၃,၄၁၀ ကျပ် ဖြစ်ပေါ်လျက်ရှိပြီး ဓာတ်ဆီဈေးနှုန်း အနည်းငယ်မြင့်တက်မှုရှိပြီး ဒီဇယ်ဈေးနှုန်းများ အနည်းငယ်ကျဆင်းခဲ့သည်။
