၁၈. ၁. ၂၀၂၃
Written By Thandar
မိုးမိုးအေးကာရိုက်တာနဲ့ ပရိသတ်ထပ်မံအားပေးမှုရရှိနေတဲ့ သရုပ်ဆောင်ပိုးကြာဖြူခင်ကတော့ ရန်ကုန်မြို့ ရွှေပြည်သာက Single Mother တစ်ယောက် မုန့်ဟင်းခါးဆိုင်လေးဖွင့်ဖို့အတွက် မ,တည်အလှူငွေ ကျပ် ၁၀ သိန်း လှူဒါန်းပေးခဲ့ပါတယ်။
“အခု ‘ကွက်လပ်မရှိ’ဇာတ်လမ်းတွဲထဲကလို မိုးမိုးအေးနဲ့ ဘဝတူ Single Mother တစ်ယောက်ဖြစ်တဲ့ မခင်ပြည့်စုံအတွက် မုန့်ဟင်းခါးဆိုင်လေးဖွင့်ဖို့ မ,တည်အလှူငွေ ၁၀ သိန်းလှူဒါန်းပေးခဲ့ပါတယ်ရှင်။ သူ့မှာက သား၂ ယောက်ရှိတယ်။ ဒီသားလေးတွေကလည်း တကယ်ချစ်စရာလေးတွေပါ။ ဒီအမရဲ့ သားတွေ အပေါ်ထားတဲ့ မေတ္တာနဲ့ ဘဝကို သတ္တိရှိရှိ ရဲရဲရင့်ရင့် ကြိုးစားဖြတ်သန်းရဲတဲ့ စိတ်ဓါတ်ကို ချီးကျူးအားကျမိတဲ့အတွက် အခုလို ကူညီဖေးမခဲ့တာပါ”လို့ ပိုးကြာဖြူခင်က ပြောပါတယ်။
ဒါ့အပြင်လည်း အခုလို လှူဒါန်းမှုရဲ့ ကောင်းမှုကုသိုလ်ကို MRTV-4 မှာ လက်ရှိပြသနေတဲ့ ‘ကွက်လပ်မရှိ’ ဇာတ်လမ်းတွဲနဲ့ မိုးမိုးအေးရဲ့ ပရိသတ်တွေ အားလုံး ထပ်တူပီတိရရှိပါစေ။ ကမ္ဘာပေါ်မှာရှိတဲ့ Single Mother အားလုံးလည်း ဘဝကို အဆင်ပြေ အောင်မြင် လွယ်ကူစွာနဲ့ ပျော်ရွှင်စွာ ဖြတ်သန်းနိုင်ကြပါစေလို့လည်း ဆုတောင်းမေတ္တာပို့ထားပါတယ်။
