၁.၃.၂၀၂၅
Written by KL
ရန်ကုန်တိုင်းဒေသကြီး၊ သုံးခွမြို့နယ်၊ ပတုပ်ကျေးရွာအုပ်စု၊ ကျောင်းစုပတုပ်ကျေးရွာတွင် ဖေဖော်ဝါရီလ ၂၈ ရက် ညနေ ၄ နာရီ မိနစ် ၅၀ ခန့်က မိုးရွာသွန်းပြီး လေပြင်းတိုက်ခတ်မှုကြောင့် အခြေခံပညာ အထက်တန်းကျောင်းခွဲ (ကျောင်းစုပတုပ်)တွင် စာသင်ဆောင် အမိုးလန်မှု ဖြစ်ပွားခဲ့ကြောင်း ဒေသခံများထံမှ သိရသည်။
ကျောင်းစုပတုပ်အခြေခံပညာ အထက်တန်းကျောင်းရှိ အလျား ပေ ၆၀၊ အနံ ပေ ၃၀ရှိ အုတ်ညှပ် တစ်ထပ် အဆောက်အအုံတွင် သွပ်အချပ် ၃၀ ခန့် အမိုးလန်ပြီး ဒိုင်းနှင့် မြှားတန်းတို့လည်း ပျက်စီးခဲ့ခြင်းဖြစ်ကြောင်း သိရသည်။
“လေပြင်းဒဏ်ကြောင့် သွပ်အချပ် ၃၀ လောက် လွင့်ကုန်တာ။ ဒိုင်း ၈ချောင်းနဲ့ မြှားတန်း ၉ ချောင်းလည်းပျက်စီးခဲ့တယ်။ လူထိခိုက်ဒဏ်ရာရတာတွေတော့ မရှိပါဘူး “ဟု ကျေးရွာဒေသခံတစ်ဦးက ပြောသည်။
အမိုးလန်ပျက်စီးမှုများကို ကျေးရွာအုပ်ချုပ်ရေးအဖွဲ့ဝင်များ၊ ကျေးရွာသဘာဝဘေးအန္တရာယ်ကြိုတင်ကာကွယ်ရေးအဖွဲ့ဝင်များ၊ ကျောင်းအုပ်ကြီးနှင့် ကျောင်းအကျိုးတော်ဆောင်များ၊ ရပ်မိရပ်ဖနှင့် သုံးခွမြို့နယ် မီးသတ်တပ်ဖွဲ့ဝင်များက ပူးပေါင်းကာ ရှင်းလင်းရေးလုပ်ငန်းများဆောင်ရွက်ခဲ့ကြောင်း သိရသည်။
အလားတူ ဖေဖော်ဝါရီလ ၂၅ရက် ညနေပိုင်းကလည်း ဧရာဝတီတိုင်းဒေသကြီး၊ သာပေါင်းမြို့နယ်၊ ကမ္ဘဲ့ညောင်ကုန်းအုပ်စု၊ စက်ဒေါင့်ကြီးကျေးရွာတွင် မိုးသည်းထန်စွာ ရွာသွန်း၍ လေပြင်းတိုက်ခတ်မှုများကြောင့် နေအိမ် ၄ လုံး အမိုးလန်ပျက်စီးဆုံးရှုံးခဲ့ရပြီး လူဦးရေ ၁၄ ဦးမှာ နီးစပ်ရာဆွေမျိုးများထံတွင် နေထိုင်ခဲ့ရသည်။
