၂၇.၂.၂၀၂၅
Written By Zun
မြန်မာနိုင်ငံမှ ထိုင်းနိုင်ငံအတွင်းသို့ တရားမဝင် တင်သွင်းကာ အွန်လိုင်းမှ ဈေးရောင်းသည့် မြန်မာဇနီးမောင်နှံ နှစ်ဦးကို ထိုင်းရဲတပ်ဖွဲ့က ဖမ်းဆီးကာ ရနောင်းရဲစခန်းတွင် ထိန်းသိမ်းထားကြောင်း ဒေသတွင်း သတင်းများ အရ သိရသည်။
ဖြစ်စဥ်မှာ ဖေဖော်ဝါရီလ ၂၅ ရက် နံနက်ပိုင်းက ရနောင်းမြို့၊ ရပ်ကွက်တစ်ခုတွင် လုံးချင်းသုံးထပ်တိုက်အိမ်ကို ငှားရမ်းနေထိုင်၍ အွန်လိုင်းမှ ဈေးအရောင်းအဝယ်ပြုလုပ်နေသည့် မြန်မာဇနီးမောင်နှံနှစ်ဦးရှိကြောင်း သတင်းအရ ထိုင်းရဲတပ်ဖွဲ့က ရှာဖွေဝရမ်းဖြင့် ဝင်ရောက်စစ်ဆေးဖမ်းဆီးခဲ့ခြင်းဖြစ်ကြောင်း သိရသည်။
ထိုင်းအာဏာပိုင်များက ဝင်ရောက်စစ်ဆေးရာ အဆိုပါနေအိမ်ရှေ့တွင် အိမ်စီးကားတစ်စီး၊ ကားအတွင်း အသားလိမ်းဆီ၊ ခေါင်းလျှော်ရည်၊ မိတ်ကပ် ကုန်ပစ္စည်းများ၊ ဆေးဝါးများ၊ ဆံပင်ပေါက်ဆေး၊ ပေါင်းဆေးနှင့် ဖြည့်စွက်စာများ အမျိုးအစား တစ်ရာကျော် အပါအဝင် ကာလပေါက်ဈေး ဘတ် ၁ ဒသမ ၂ သန်းကျော် ကုန်ပစ္စည်းအမျိုးအစား ၅၀၀၀ ကျော်ကို တွေ့ရှိ၍ ယင်းတို့ကိုပါ သိမ်းဆည်းခံထားရကြောင်း သိရသည်။
အဆိုပါ မြန်မာဇနီးမောင်နှံနှစ်ဦးဖြစ်သော အသက် ၂၁ နှစ်နှင့် ၂၄ နှစ်အရွယ်တို့အား စစ်ဆေးရာတွင် မြန်မာ နိုင်ငံမှ ထိုင်းနိုင်ငံအတွင်း တရားမဝင် တင်သွင်း ရောင်းချကြောင်း၊ အချို့အလှကုန်များမှာ ထိုင်းနိုင်ငံတွင် ခွင့်ပြုချက် မရရှိထားသော အလှကုန် ပစ္စည်းများဖြစ် ကြောင်း သိရသည်။
၎င်းတို့နှစ်ဦး၏ ဘဏ်စာအုပ်များကို စစ်ဆေးရာ တစ်ရက်လျှင် ဘတ် သုံးသောင်းမှ လေးသောင်းထိ အဝင် အထွက် လည်ပတ် အလုပ်လုပ်နေသည်ကို စစ်ဆေးတွေ့ရှိခဲ့ကြောင်းလည်း သိရသည်။
ယခုအခါ ယင်း ဖမ်းဆီးခံရသူ မြန်မာဇနီးမောင်နှံသူနှစ်ဦးအား ရနောင်းရဲစခန်း၌ ထိန်းသိမ်းထားပြီး FDA ထောက်ခံချက် မရှိသော ပစ္စည်းများကို တရားမဝင် ရောင်းချမှုများဖြင့် အရေးယူဆောင်ရွက်သွားမည်ဖြစ် ကြောင်း သိရသည်။
