၁၃.၂.၂၀၂၅
Written By Thandar
မြန်မာ့ယဥ်ကျေးမှုအမွေအနှစ်တွေကို ထိန်းသိမ်းစောင့်ရှောက်ရေးအဖွဲ့က ကြီးမှူးကျင်းပတဲ့ “သွေးချင်းစုံလင် သနပ်ခါးသဘင် သရုပ်ဖော်ပြိုင်ပွဲ” အခမ်းအနားကိုဖေဖော်ဝါရီ ၁၂ ရက် ညနေ ၄ နာရီက ရန်ကုန်မြို့ အင်းလျားလမ်းရှိ စိမ်းလန်းစိုပြည်ဥယျာဥ်မှာ ကျင်းပခဲ့ပါတယ်။
” သနပ်ခါးသဘင် သရုပ်ဖော်ပြိုင်ပွဲကျင်းပရတာက မေသင်းတို့ မြန်မာ့သနပ်ခါးကို တိုင်းရင်းသားအသီးသီးအလွှာမရွေး၊ အရွယ်မရွေးလိမ်းချယ်ကြတဲ့ဓလေ့တွေ ဆက်လက်တည်တံ့စေဖို့ပါ။ ရိုးရာသနပ်ခါးလိမ်းချယ်တဲ့ ဓလေ့ကို ယူနက်စကို ဒြပ်မဲ့ယဥ်ကျေးမှု အမွေအနှစ်စာရင်းကို တင်သွင်းရာမှာ လူမှုအဖွဲ့အစည်းတွေက ပါဝင်ပူးပေါင်းလှုံ့ဆော်နိုင်ဖို့ရည်ရွယ်ချက်တွေနဲ့ ကျင်းပတာဖြစ်ပါတယ်”လို့ Mrs. Universe Myanmar အလှမယ် မေသင်းကြည်က MT Entertainment ကို ပြောပါတယ်။
အဆိုပါ ပြိုင်ပွဲမှာမြန်မာ့ယဥ်ကျေးမှုအမွေအနှစ်များ ထိန်းသိမ်းစောင့်ရှောက်ရေးအဖွဲ့ဥက္ကဋ္ဌ ဒေါ်စန္ဒာခင်က အဖွင့်အမှာစကားပြောကြားပြီး အကဲဖြတ်ဒိုင်အကယ်ဒမီ ဆွေဇင်ထိုက်က အမှတ်ပေးစည်းမျဥ်းများကို ရှင်းလင်းပြောကြားခဲ့ပါတယ်။
ဒါ့ပြင် “အမေများအဖွဲ့” က ဂုဏ်ပြုဖျော်ဖြေတင်ဆက်ကြပြီး ပြိုင်ပွဲဝင်တွေက သနပ်ခါးလိမ်းခြယ်မှုဓလေ့တွေနဲ့ပတ်သက်လို့ သရုပ်ဖော်ယှဥ်ပြိုင် ပါဝင်ခဲ့ကြပါတယ်။
“သွေးချင်းစုံလင် သနပ်ခါးသဘင်သရုပ်ဖော်” ပြိုင်ပွဲမှာ ပြိုင်ပွဲဝင်အဖွဲ့ ၃၆ ဖွဲ့က ပါဝင်ယှဥ်ပြိုင်ကြတာဖြစ်တယ်လို့ သိရပါတယ်။
“မေသင်းတို့ကလည်း ဒီပြိုင်ပွဲမှာ တစ်ထောင့်တစ်နေရာက ပါဝင်ထားပါတယ်။ ကိုယ် ဒီပြိုင်ပွဲ ကျောင်းသူတစ်ယောက်နေရာက ပါဝင်ထားပါတယ်။ ပြိုင်ပွဲဝင်တဲ့ တေးသရုပ်ဖော်အနေနဲ့ပါ ဆုရဖို့အတွက် မဟုတ်ပါဘူး”လို့ သူမက ဆက်ပြောပါတယ်။
