၁၁. ၂. ၂၀၂၅
Written by Nay Moe
လက်ပံတန်းမြို့နယ် မကျီးကွင်းအုပ်စုအုပ်ချုပ်ရေးမှူးဇနီးမောင်နှံကို PDF နှစ်ဖွဲ့ပေါင်း၍ ယနေ့ သတ်ဖြတ်လိုက်သည်ဟု ကျူးလွန်သည့် သာယာဝတီခရိုင် တပ်ရင်း (၃၈၀၂) တပ်ခွဲ (၂) က ဝန်ခံလာသည်။
ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်၊ ရွှေဘိုစုကျေးရွာနေ၊ မကျီးကွင်းအုပ်စုအုပ်ချုပ်ရေးမှူးဦးသိန်းဝင်းနှင့် ဇနီးဖြစ်သူ ဒေါ်စန်းစန်းအား ယနေ့ မွန်းလွဲ ၄ နာရီ ၄၅ မိနစ်ခန့်တွင် သာယာဝတီခရိုင် တပ်ရင်း (၃၈၀၂ ) တပ်ခွဲ (၂) နှင့် ရွှေတန်းမြေပြည်သူ့ ကာကွယ်ရေးတပ်ဖွဲ့တို့ ပူးပေါင်းကာ ၎င်းတို့၏ နေအိမ်၌ပင် သေနတ်ကျည် ၁၀ ချက်ဖြင့် ရက်စက်စွာသတ်ဖြတ်လိုက်ခြင်းဖြစ်သည်။
အဆိုပါ အုပ်ချုပ်ရေးမှူးဦးသိန်းဝင်းနှင့် ဒေါ်စန်းစန်းတို့ဇနီးမောင်နှံကို သတ်ဖြတ်ပြီး လက်ပစ်ဗုံး ၁ လုံးနှင့် မိုလ်ဘိုင်းဖုန်း ၁ လုံး သိမ်းဆည်းခဲ့ကြောင်း၊ ယင်းတို့ ဇနီးမောင်နှံသည် စစ်မှုထမ်းကြေးဟုဆိုကာ ငွေကြေးများ အတင်းအကြပ် ကောက်ခံနေပြီး ကောက်ခံသည့် ငွေမပေးသူများကို သတင်းပေး ဖမ်းဆီးခိုင်းခြင်း၊ ထို လုပ်ရပ်အပေါ် တိုင်ကြားသူများအား ဖမ်းဆီးရန် လုပ်ဆောင်ခြင်းကြောင့် သတ်ဖြတ်ကြောင်း ကျူးလွန်သည့် သာယာဝတီခရိုင် တပ်ရင်း (၃၈၀၂) တပ်ခွဲ (၂) က ဆင်ခြေပေးသော်လည်း ထိုစွပ်စွဲချက်များ မှန် မမှန်ကိုမူ MT News က အတည်မပြုနိုင်ချေ။
