၁၁.၂.၂၀၂၅
Written By Zun
မြဝတီမြို့သို့ မဲဆောက်မှ စက်သုံးဆီများခိုးတင်လာသည့်ကားကို မဲဆောက်-မြဝတီ အမှတ် (၂) တံတားတွင် ဖမ်းမိခဲ့ကြောင်း ထိုင်းအခြေစိုက် မီဒီယာများက သိရသည်။
ယနေ့ ဖေဖော်ဝါရီလ ၁၁ ရက် ညနေ ၃ နာရီခန့်အချိန်က ထိုင်းနိုင်ငံ၊ မဲဆောက်မြို့မှ စားသောက်ကုန်ပစ္စည်း များ ဝယ်ယူပြီး မဲဆောက်-မြဝတီ အမှတ် (၂) တံတားက ကရင်ပြည်နယ်၊ မြဝတီမြို့ကို ပြန်လာသည့် ကုန်တင်ကားကို တံတားလုံခြုံရေးတာဝန်ယူထားသည့် ထိုင်းတပ်မတော်တာဝန်ရှိသူများ၊ တက်ခ်ခရိုင်၊ မဲဆောက်ခရိုင် အထူးတပ်ဖွဲ့မှ တပ်ဖွဲ့ဝင်များ၊ မဲဆောက် ရဲစခန်းနှင့် မဲဆောက် အကောက်ခွန်ဂိတ်တို့ ပူးပေါင်း၍ မော်တော်ယာဉ်ကိုစစ်ဆေးစဉ် ဖမ်းမိခဲ့ခြင်း ဖြစ်ကြောင်း သိရသည်။
ယင်းကုန်တင်ကားပေါ်တွင် စားသောက်ကုန်ပစ္စည်းများ၊ ဟင်းသီးဟင်းရွက်များဖြင့် ဖုံးဝှက်၍ သယ်လာသော စက်သုံးဆီ (၃၀၅) လီတာ ထည့်ထားသည့် ပလစ်တစ်ပုံး (၆) ပုံးကိုတွေ့ရှိခဲ့ခြင်းဖြစ်ကြောင်း ထိုင်းတပ်မတော်ဘက်က ထုတ်ပြန်ချက်ကို ကိုးကား၍ ဒေသတွင်း သတင်းများက ရေးသားကြခြင်းလည်း ဖြစ်သည်။
ကုန်တင်ကားမောင်းသူမှာ မြန်မာနိုင်ငံသား အသက် ၃၆ နှစ်အရွယ် ကိုရန် ဆိုသူဖြစ်ပြီး အဆိုပါ စက်သုံးဆီများကို သယ်ယူရန် မြဝတီမြို့ခံတစ်ဦးက ဘတ် ၈၀၀၀ ပေး၍ တာဝန်ပေးခဲ့ခြင်း ဖြစ်ကြောင်း ယာဉ်မောင်းက ထွက်ဆိုထားကြောင်း သိရသည်။
ထိုင်း-မြန်မာ နယ်စပ်၊ ထိုင်းနိုင်ငံ၊ တာ့က်ခရိုင်၊ မဲဆောက်မြို့နယ်၊ ဝမ်းစကင်းကျေးရွာရှိ မဲဆောက်-မြဝတီ ချစ်ကြည်ရေးအမှတ်(၂)တံတားတွင် မြန်မာနိုင်ငံဘက်သို့ သယ်ယူသည့် စက်သုံးဆီတင်ကားများကို ပြီးခဲ့သည့် ဖေဖော်ဝါရီလ ၅ ရက် နောက်ပိုင်းတွင် ရက်ဆက် ဖမ်းမိနေကြောင်းလည်း ဒေသတွင်း သတင်းများအရ သိရသည်။
မြန်မာနိုင်ငံ၊ ကရင်ပြည်နယ်၊ မြဝတီ နှင့် ရွှေကုက္ကိုဒေသကို ထိုင်းနိုင်ငံဘက်က လျှပ်စစ်၊ အင်တာနက်ဖြတ်တောက်လိုက်သလို စက်သုံးဆီ ပေးပို့မှု ရပ်ဆိုင်း ပြီးနောက် စက်သုံးဆီများကို မှောင်ခိုတင်သွင်းမှုအပါအဝင် သက်ဆိုင်ရာ လုံခြုံရေးအဖွဲ့များအနေဖြင့် ထိုင်း-မြန်မာ နယ်နယ်စပ်တစ်လျှောက်လုံခြုံရေးတင်းကြပ်ကာ စစ်ဆေးဖမ်းဆီးမှုများ ပြုလုပ်နေကြောင်းလည်း သိရသည်။
