NLD အမတ်ဟောင်းတစ်ဖြစ်လည်း NUG ကာကွယ်ရေးဝန်ကြီးဌာန အတွင်းဝန်က ရာထူးမှနုတ်ထွက်၊ တာဝန်ယူစဥ်က သုံးစွဲခဲ့သည့်ငွေကြေးများနှင့် ကျူးလွန်ခဲ့သည့် စစ်ရာဇဝတ်မှုများအတွက် အရေးယူပေးရန် ဝိုင်းဝန်းတောင်းဆို

၁၀. ၂. ၂၀၂၅
Written by Nay Moe

NLD ပါတီရဲ့ နွားထိုးကြီးပြည်သူ့လွှတ်တော်ကိုယ်စားလှယ်အမတ်ဖြစ်ခဲ့ပြီး လက်ရှိ ငွေကြေးမသမာမှုများစွာနဲ့ ဝေဖန်ခံနေရတဲ့ NUG ကာကွယ်ရေးဝန်ကြီးဌာနရဲ့ အမြဲတမ်းအတွင်းဝန်တာဝန် သုံးနှစ်ကျော် ထမ်းဆောင်ခဲ့သူ ဦးနိုင်ထူးအောင်ဟာ တာဝန်က နုတ်ထက်တယ်လို့ ဒီနေ့မှာ သူအသုံးပြုတဲ့ Naing Htoo Aung အကောင့်ကတစ်ဆင့် ဖော်ပြလာပါတယ်။

“MoD နှင့် စပ်လျဥ်းသော တာဝန်များ အားလုံးမှ အနားယူလိုက်ပြီ ဖြစ်ပါသည်။ တော်လှန်ရေးမှ လုံးဝ အနားမယူပါ။ ကျရာတာဝန်အား ဆက်လက်တာဝန်ယူသွားမည် ဖြစ်ပါသည်။ တာဝန်ယူခဲ့စဥ်တွင် ဆောင်ရွက်ခဲ့မှုများအတွက် အပြည့်အဝ လိပ်ပြာလုံသလို တာဝန်ယူခဲ့စဥ် ဆောင်ရွက်ခဲ့သော ကိစ္စရပ်များအတွက် တခုမကျန် တာဝန်ခံပါသည်။ အရေးတော်ပုံ အောင်ရမည်။(သတ်ပုံမူရင်း)”လို့ သူ့နုတ်ထွက်မှုကို Naing Htoo Aung အကောင့်ကတစ်ဆင့် အသိပေးထားပါတယ်။

ပြည်သူ့အလှူငွေနဲ့ မိသားစုလိုက်ပြည်ပထွက်ပြေးပြီး စည်းစိမ်ခံနေကြတဲ့ NUG တာဝန်ရှိသူတွေထဲမှာ ငွေကြေးမသမာမှုများစွာအဖြစ်ဆုံးဟာ ကာကွယ်ရေး၊ ပြည်ထဲရေးနဲ့ စီမံဘဏ္ဍာတို့ဖြစ်ပြီး ဦးနိုင်ထူးအောင်ဟာ NUG ကာကွယ်ရေးဝန်ကြီးဌာနကတစ်ဆင့် ဒေါ်လာသန်းရာချီ ငွေကြေးစီးဆင်းမှုတွေ မရှင်းလင်းနိုင်မှုမှာလည်း တာဝန်ရှိသူပါ။

ဒါကြောင့်မို့လို့ သူ NUG ကာကွယ်ရေးဝန်ကြီးဌာနက နုတ်ထွက်ကြောင်း အသိပေးစာအောက်မှာ သူ့ Friend တစ်ဦးဖြစ်တဲ့ Lu Gyi အကောင့်ပိုင်ရှင်က “နိုင်ထူးအောင် NUG တွင် တာဝန်ယူခဲ့စဉ်အခါက ကျူးလွန်ခဲ့တဲ့ အမှူတွေအားလုံးကို စုံစမ်းစစ်ဆေးပြီး အရေးယူမှူအမြန်လုပ်ဆောင်ပေးပါ။တာဝန်ယူစဉ်အခါက ရယူထားသောငွေကြေးရှင်းတမ်းများ စာရင်းအင်းနဲ့တကွ စနစ်တကျအပ်နှံခိုင်းပါ။အဆိုပါကိစ္စများကို NUGအနေဖြင့် အရေးယူမဆောင်ရွတ်ပေးလျင် နောင်တချိန် နိုင်ထူးအောင် NUG တွင်တာဝန်ယူစဉ်အခါက ဖြစ်ခဲ့သောပြဿနာအရပ်ရပ်အား NUG မှ တာဝန်ရှိသူအားလုံး တာဝန်ခံရမည်။(သတ်ပုံမူရင်း)”လို့ မှတ်ချက်ပြုခဲ့ပါတယ်။

ဒါ့အပြင် Comment ပိတ်ထားတဲ့ Naing Htoo Aung အကောင့်မှာ Comment ပေးခွင့်ရတဲ့ Friend တွေက နိုင်ထူးအောင်ဟာ သူခိုးဖြစ်ကြောင်း၊ PDF များစွာသေဆုံးရမှု တရားခံဖြစ်ကြောင်း၊ ဒေါ်လာသန်းချီငွေစီးဆင်းမှုတွေ စာရင်းရှင်းဖို့ လိုကြောင်း၊ NUG က တရားဝင်ထုတ်ပြန်သင့်ကြောင်း၊ နိုင်ထူးအောင်ဟာ စစ်ရာဇဝတ်ကောင်ဖြစ်ကြောင်း ဝိုင်းဝန်းမှတ်ချက်ပေးနေတာလည်း တွေ့ရပြီး Khun Nan Da အကောင့်ပိုင်ရှင်ကလည်း Naing Htoo Aung ကို “ငွေတွေကိုအလွှဲသုံးစားလုပ်တယ် တော်လှန်ရေးသမားတွေကို လိုရင်လိုသလို လက်နက်ပေး တကယ်တိုက်နေတဲ့အဖွဲ့တွေကြလက်နက်မပေး one year strategy ဆိုပြီးဒေါ်လာ သန်း ၁၅၀သုံး ဘာမှ ရလာဒ်မထွက် ခုလို post တင်ပြီး တော်လှန်ရေးမှာဆက်လုပ်မယ် MOD ကထွက်မယ်ဆိုတော့ အဲလိုရကြေးလား တာဝန်ယူမှု တာဝန်ခံမှုဆိုတာ ဘယ်မလဲ မင်းကြောင်း G Z တွေအသက်ပေးခဲ့ရတာမနည်းဘူး ခုလိုရကြေးလား သမိုင်းတရားခံလေး”လို့ Comment ပေးခဲ့တာ တွေ့ရပါတယ်။

ဒါ့အပြင် ဦးနိုင်ထူးအောင်ဟာ သူ့ Naing Htoo Aung အကောင့်မှာ Friend မဖြစ်ရင် မှတ်ချက်ပေးခွင့်ပြုမထားတာကြောင့် သူ့အကောင့်အောက် ရေးခွင့်မရသူတွေကလည်း သူ့ပို့စ်ကိုရှဲပြီး သူ့ဆီက စီးဆင်းသွားတဲ့ ငွေကြေးတွေ တာဝန်ခံဖို့ ရေးသားကြသလို ဦးနိုင်ထူးအောင်လိုပဲ NLD ရဲ့ မန္တလေးမဲဆန္ဒနယ် (၁၀) က အမျိုးသားလွှတ်တော်ကိုယ်စားလှယ်ဖြစ်ခဲ့သူ ဦးကျော်မြင့်ဦးက “ပထမဆုံး MOD မှ နုတ်ထွက်သွားသူကတော့ အတွင်းဝန် နိုင်ထူးအောင် ပေါ့။ လာလတ္တံ့တွေများစွာနဲ့ စောင့်သာကြည်နေလိုက်ကြတော့။ သတင်းတွေကြားနေရတာကြာပါပြီ။ ပြည်သူ့အသက်တွေ၊ ဘဝတွေ၊ လူငယ်တွေရဲ့ အနာဂတ်တွေ၊ ယုံကြည်အားကိုးချက်တွေကို အလွဲသုံးစားလုပ်ပြီး ချနင်းသွားကြသူများ။ ပြည်သူ့ကျိန်စာ စူးကြအုန်းမှာပါ။”လို့ ဝေဖန်ခဲ့တဲ့အပြင် ထင်ရှားတဲ့ ဥပဒေပညါရှင် ဦးကြီးမြင့်ကလည်း “အစောကြီးထဲကပြောပါတယ်စာရင်းစစ်ခန့်စာရင်းတွေသေချာလုပ်ပါဝင်ငွေထွက်ငွေပြည်သူကိုလည်းတင်ပြပါပြောရက်နဲ့အခုစစ်ဆက်တိုက်စရာဘတ်ဂျက်မရှိတော့လို မထောက်ပံ့နိူင်တော့ဘူးကာဝန်တာဝန်ယူရမယ်ပြစ်မှုကဆွေးမသွားဘူးအားလုံးပုဒ်မ၄၀၉ နဲ့ တရားစွဲခံရရင်၁၀နှစ် တသက်တကျွန်းဘဲ။ နိူင်ထူးအောင်ထွက်မပြေးအောင်သေချာထားရမယ်” လို့ရေးသားတဲ့အပြင် “၄၀၉ နဲ့ တရားစွဲရမယ် ပြည်တွင်းပြန်ပို့ပြီး NUG တရားရုံးမှာ တရားစွဲရပါမယ် (သတ်ပုံမူရင်း)”လို့ ရေးသားခဲ့ပါတယ်။

NUG ယာယီသမ္မတဒူဝါလရှီးလက ပြည်သူ့ငွေဒေါ်လာသန်းရာပေါင်းများစွာ အလွဲသုံးစားမှုနဲ့ နာမည်ပျက်နေတဲ့ NUG ဝန်ကြီးတွေ အပါအဝင် ဝန်ကြီးဌာန ထိပ်ပိုင်းတာဝန်ရှိသူတွေကို အပြောင်းအလဲလုပ်မယ်လို့ ဒီနှစ်ဆန်းမှာပြောထားအပြီး ဦးနိုင်ထူးအောင်ဟာ ပထမဆုံးနုတ်ထွက်သူဖြစ်လာပေမဲ့ သူကိုင်တွယ်သုံးစွဲခဲ့တဲ့ငွေကြေးစီးဆင်းမှုတွေနဲ့ပတ်သက်ပြီး NUG က နှုတ်ဆိတ်နေပြီး လူမှုကွန်ရက်မှာထွက်ပေါ်လာတဲ့ ဦးနိုင်ထူးအောင်ရဲ့ ငွေကြေးအရှုပ်အရှင်းတွေအပေါ်ထုတ်ပြန်စာတွေကိုသာ အတုပါလို့ဖြေရှင်းထားပါတယ်။

ပုံစာ။ NUG ၏ ငွေကြေး၊ လက်နက်စီးဆင်းမှုများနှင့် စစ်ရာဇဝတ်မှုများတွင် အဓိကတာဝန်ရှိသူ ဦးနိုင်ထူးအောင် နုတ်ထွက်မှုအပေါ် ဝေဖန်မှုများ တွေ့ရစဥ်။