၁၀.၂. ၂၀၂၅
Translated by Thettant
ထိုင်းအစိုးရက မြန်မာနိုင်ငံအပေါ် ပိတ်ဆို့အရေးယူမှုကို ဆန့်ကျင်ကန့်ကွက်တဲ့ ဆန္ဒထုတ်ဖော်မှုတွေ ကြုံလာရပေမဲ့ ထိုင်းလူမျိုးတွေကို လိမ်လည်လှည့်စားတဲ့ ကျားဖြန့်ရန်က ကာကွယ်ဖို့ကသာ ဦးစားပေးဖြစ်တယ်လို့ ထိုင်း ကာကွယ်ရေးဝန်ကြီးက ဖမ်သန် ဝီချရာချိုင်းက ဒီနေ့မှာ ထုတ်ဖော်ပြောကြားလိုက်ပါတယ်။
ထိုင်းအစိုးရဟာ တရုတ်ကျားဖြန့်ဂိုဏ်းတွေ အခြေစိုက်ရာ မြန်မာ နယ်စပ်ဒေသတွေကို လျှပ်စစ်ဓာတ်အား၊ လောင်စာဆီနဲ့ အင်တာနက် ဖြတ်တောက်အပြီး ထိုင်းကုန်ပစ္စည်းတွေကို သပိတ်မှောက်ဖို့အတွက် ဒေသခံလူထုက ဆန္ဒပြပွဲတွေ ပြုလုပ်ပေမဲ့လည်း ဒီလိုလုပ်ဆောင်မှုက ထိုင်းအစိုးရဲ့ ဆုံးဖြတ်ချက်ကို တွန်းလှန်နိုင်မှာမဟုတ်ဘူးလို့ ထိုင်းဒုတိယဝန်ကြီးချုပ်လည်းဖြစ်တဲ့ ဖမ်သန် ဝီချရာချိုင်းက ထုတ်ဖော်ပြောကြားလိုက်တာပါ။
ပြီးခဲ့တဲ့ ဖေဖော်ဝါရီ ၅ ရက် မနက် ၉ နာရီကစ ထိုင်းအစိုးရဟာ မြန်မာနယ်စပ်က ဘုရားသုံးဆူ၊ တာချီလိတ်နဲ့ မြဝတီက နေရာငါးခုကို တရုတ်ကျားဖြန့်ဂိုဏ်းတွေ နှိမ်နင်းဖို့ရည်ရွယ်ပြီး လျှပ်စစ်၊ လောင်စာနဲ့ အင်တာနက်ဖြတ်တောက်ခဲ့တာကြောင့် ဖေဖော်ဝါရီ ၈ ရက်မှာ မြဝတီ ဒေသခံတချို့က ဆန္ဒဖော်ထုတ်ပြီး ထိုင်း – မြန်မာချစ်ကြည်ရေးတံတားနှစ်စင်းပိတ်ပစ်ဖို့နဲ့ ထိုင်းကုန်စည်တွေ အသွင်းမခံဖို့ တောင်းဆိုခဲ့တာပါ။ ဒီအပေါ်မှာ ကာကွယ်ရေးဝန်ကြီးလည်းဖြစ်တဲ့ ဖန်သမ် က ဆန္ဒပြပွဲတွေမှာ ပါဝင်သူတွေက သူတို့ရဲ့ စိတ်ပျက်မှုတွေကို ထုတ်ဖော်ပြောဆိုနိုင်ပေမယ့် မြန်မာနယ်စပ်ဒေသတွေကို ထိုင်းအစိုးရက စွမ်းအင်ရင်းမြစ်တွေ အဆက်ဖြတ်ဖို့ ဆုံးဖြတ်ချက်အပေါ် သက်ရောက်မှုရှိမှာ မဟုတ်ဘူးလို့ ပြောပါတယ်။
“သူတို့က ထိုင်းက လူသုံးကုန်ပစ္စည်းတွေကို မှီခိုနေတာကြောင့် သေသေချာချာ စဉ်းစားသင့်တယ်။ အဲဒီအစားအစာမရှိရင် သူတို့ကိုယ်သူတို့ ဂရုစိုက်ရလိမ့်မယ်” လို့လည်း ထိုင်းသွင်းကုန်တွေ မှီခိုနေရတဲ့ မြဝတီက ဆန္ဒပြလူတစ်စုရဲ့ တောင်းဆိုချက်အပေါ် ဖမ်သန်က ထောက်ပြပြောဆိုသလို ကျားဖြန့်တွေ နှိမ်နင်းဖို့ဆောင်ရွက်ချက်နဲ့ စပ်လျဥ်းပြီးလည်း “ဒီအစီအမံတွေအပေါ် ကျွန်တော်တို့ အခိုင်အမာ ရပ်တည်နေပါတယ်။ ထိုင်းနိုင်ငံ ရင်ဆိုင်နေရတဲ့ ပြဿနာကို အာရုံစိုက်ထားပါတယ်။ ဒီပြဿနာကို ပြတ်ပြတ်သားသား ဖြေရှင်းရမှာပါ” လို့ ဆက်လက်ပြောပါတယ်။
ထိုင်းနယ်စပ်ဒေသက မြန်မာလူမျိုးတွေဟာ ထိုင်းနိုင်ငံက လူသုံးကုန်ပစ္စည်းတွေနဲ့ အစားအစာတွေကို မှီခိုအားထားနေရတာပါ။ ဒါပေမဲ့ ထိုင်းလူမျိုးတွေကို ကာကွယ်ဖို့နဲ့ မြန်မာနိုင်ငံက တရုတ်ကျားဖြန်တွေ နှိမ်နင်းရေး ဖိအားပေးနိုင်ဖို့ ထိုင်းအစိုးရက ဒီလိုအရေးယူမှုလုပ်ဆောင်တာလို့လည်း ဖမ်သန်က ဆိုပါတယ်။
မြန်မာနိုင်ငံက တာချီလိတ်၊ မြဝတီနဲ့ ဘုရားသုံးနယ် နယ်စပ်ဒေသက နေရာငါးခုကို လျှပ်စစ်မီး၊ လောင်စာဆီနဲ့ အင်တာနက် ဖြတ်တောက်ပြီး သာမန်လူထုကို အမှောင်ထဲမှာ ထားခဲ့ရပေမဲ့ တရုတ်ကျားဖြန့်ဂိုဏ်းတွေရဲ့ ဖျော်ဖြေရေးနေရာတွေ၊ အွန်လိုင်းလိမ်လည်မှုကျားဖြန့်စခန်းတွေက ကိုယ်ပိုင်မီးစက်တွေနဲ့ လည်ပတ်နေပြီး လျှပ်စစ်မီးကို သုံးစွဲနိုင်ဆဲဖြစ်ပါတယ်။ ဒါကြောင့်လည်း ထိုင်းအာဏာပိုင်တွေက မြန်မာနယ်စပ်ဒေသတွေဆီ လောင်စာဆီနဲ့ ဆိုလာပြား မှောင်ခို တင်သွင်းမှုကိုလည်း နှိမ်နင်းနေပါတယ်။
နှစ်များစွာ အရေးယူဆောင်ရွက်ခံရမှုမရှိခဲ့တဲ့ ထိုင်းနယ်စပ်အနီးက မြန်မာနိုင်ငံမှာ အခြေစိုက်တဲ့ တရုတ်ကျားဖြန့်ဂိုဏ်းတွေ လည်ပတ်နေမှုအပေါ် အကြီးတန်းအဆင့် ဆွေးနွေးပွဲအတွက် တရုတ်ပြည်သူ့လုံခြုံရေးဝန်ကြီးဌာနက တရုတ်လက်ထောက်ဝန်ကြီး လာရောက်အပြီး တရုတ်နဲ့ ထိုင်းနိုင်ငံသား အများအပြားကို ကျွန်ပြုခိုင်းစေတဲ့ တရုတ်ကျားဖြန့်ဂိုဏ်းတွေကို နှိင်နင်းဖို့ သတိပြုမိစေခဲ့တာပါ။
ဖမ်သန်က ဖေဖော်ဝါရီ ၁၂ ရက်မှာ ဘုရားသုံးဆူနဲ့ ဖေဖော်ဝါရီ ၁၆ ရက်မှာ ကမ္ဘောဒီးယားနိုင်ငံ Poipet မြို့ကို သွားရောက်မှာဖြစ်ပြီး နောက်ထပ် ဆုံးဖြတ်ချက်မချမီ အခြေအနေကို လေ့လာကြည့်ရှုသွားမှာလို့ သိရပါတယ်။
Ref, Bangkok Post
