ပုံစာ။ MDY PDF ၏ အာဏာပြ ညှင်းပန်း နှိပ်စက်ခံရသော ကိုအာကာဖြိုးက လူမှုကွန်ရက်တွင် ရေးသားထားမှု တွေ့ရစဥ်။
၁၀. ၂. ၂၀၂၅
Written by Nay Moe
နိုင်ငံရေးအကျဥ်းသားဖြစ်တဲ့အပြင် မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)ရဲ့တာဝန်ခံဖြစ်ပြီး မန္တလေးဒေသမှာလည်း AFCC (Anti-Junta Forces Coordination Committee – Mandalay) အဖွဲ့ဝင်အနေနဲ့ လူထုလှုပ်ရှားမှုလုပ်နေတဲ့အပြင် EMC မန္တလေးကတစ်ဆင့် လှူတန်းတာကို စစ်ရှောင်တွေဆီ လိုက်ပါလှူတန်းပေးနေတဲ့ ကိုအာကာဖြိုး အပါအဝင် ငါးဦးကို မန္တလေး PDF က သူထိန်းချုပ်ရာ မန္တလးတိုင်းနယ်မြေထဲမှာ ဖေဖော်ဝါရီ ၆ ရက် ည ၈ နာရီခွဲခန့်က အကြောင်းမဲ့ ဖမ်းဆီးရိုက်နှက်ကာ စစ်ကြောခံခဲ့ရတယ်လို့ ကိုအာကာဖြိုးက သူအသုံးပြုတဲ့ Ar Ker Phyo အကောင့်ကနေ ဖော်ထုတ်ရေးသားလာပါတယ်။
ကိုအာကာဖြိုးရေးသားမှုအရ သူအပါအဝင် လုပ်ဖော်ကိုင်ဘက် ၇ ဦး၊ သာမန်လူ ၅ ဦးဟာ ဘီယာသောက်ပြီးအပြန် သူက PDF တစ်ဦးကို နားချချိန် နားချခံရသူက စိတ်ပေါက်ကွဲပြီး ခုံကို နှစ်ချက်ရိုက်မိချိန် MDY PDF က Appointment တစ်ဦးဟာ မင်းတို့ပြည်သူ့အိမ်မှာ ဒီလိုမလုပ်ဘဲ လာရောက်မောင်းထုတ်တယ်လို့ ဆိုပါတယ်။ ဒါကြောင့် အိမ်ရှင်ကပါ သူတို့က စစ်ရှောင်ကူညီနေသူဖြစ်ကြောင်း ပြောသလို သူကလည်း နှင်စရာမလိုဘဲ သွားမှာပါပြောချိန် MDY PDF က သူ့ကိုပြန်ပြောမှုနဲ့ ဖမ်းမယ်ထပ်ပြောလို့ ကိုအာကာဖြိုးက ‘ဘာပုဒ်မနဲ့ ဖမ်းမှာလဲ’ မေးတာကို ငါ ယူနီဖောင်းမပါလို့မကြောက်တာလားလို့ ဒေါသတကြီးမေးပြီး ပါးကိုနှစ်ချက်ရိုက် စခန်းကိုပြန်ကာ ယူနီဖောင်းလဲပြီး ‘ဒီမှာဘက်တံဆိပ်၊ ဒီမှာယူနီဖောင်း မြင်လား’ လို့မေးပြီး ကိုအာကာဖြိုးကို ဖမ်းတာကို ‘ကျွန်တော့်မှာဘာအပြစ်ရှိလို့ ဖမ်းတာလဲ’လို့ မေးမြန်းရုန်းကန်လို့ မင်းတို့အကုန်လုံး ငါဖမ်းပြမယ်ပြောပြီး စခန်းကို တစ်ခေါက်ထပ်ပြန်သွားတာပါ။
အဲဒီနောက် ကားနဲ့ပြန်ရောက်လာပြီး ကိုအာကာဖြိုးတို့ငါးဦးစလုံးကို သေနတ်နဲ့ချိန်၊ ဒူးထောက်၊ လက်ပြန်ကြိုးတုပ်ပြီး ရက်ရက်စက်စက် နှိပ်စက်ကြသလို အိမ်ရှင်တွေကိုလည်း မကြည့်ဖို့ပြောပြီး အဆက်မပြတ် ဝိုင်းဝန်းထိုးနှက်ခဲ့ကြတာပါ။
အဆက်မပြတ် ဝိုင်းဝန်းရိုက်နှက်အပြီးမှာ စခန်းကို လက်ပြန်ကြိုးတုပ်ပြီး ရိုက်နှက်ခေါ်ဆောင်ခံရတာကိုလည်း ကိုအာကာဖြိုးက “ကျွန်တော်တို့ငါယောက်အား စခန်းခေါ်ဖို့ အမိန့်ပေးခဲ့ပါတယ် ခေါ်တဲ့အချိန်မှာလဲ လက်ပြန်ကြိုးတုပ်ရက်တန်းလန်းနဲ့ ရှေ့ကတစ်ယောက်က ရှေ့ကကြိုးကိုဆွဲ အလည်ကတစ်ယောက်က အတန်းညီညီမရှောက်သူကို လိုက်ရိုက် နောက်ဆုံးကတစ်ယောက်ကလဲ ထိုနည်းတူ အတန်းညီညီမရှောက်လို့ဟုဆိုခါ ကန်လိုက်ရိုက်လိုက်လုပ်ပါတယ် ကြိုးက လက်ပြန်ကြိုးကိုနောက်ပြန်ချည်ထားသောကြောင့် ရှေ့နောက် တန်းစီသွားဖို့ဆိုတာ မလွယ် ဘေးတိုက်သွားမှသာ လွယ်ကူပါတယ် ကျွန်တော်က နောက်ဆုံးမှာလိုက်ပါရတာဖြစ်ပြီး ရိုက်နှပ်ခံထားရသောဒဏ်ရာဖြစ်တာတစ်ကြောင်း ကြိုးချည်ထားပုံက ရှေ့နောက်သွာဖို့ အဆင်မပြေတာကြောင့် ဘေးအစွန်းကိုထွက်မိသွားတယ် ဘေးရောက်သွားလို့ဆိုပြီး နောက်ကလိုက်ပါလာသောသူများက အရှိန်အားပြင်းစွား နောက်စေ့သို့ပိတ်ရိုက်ပါတယ် ရိုက်ခံရတဲ့အရှိန်ကြောင့်ရယ် အရင်ရိုက်ထားတဲ့ နှာခေါင်းသွေးက ထွက်တာများနေပြီးသွေးမူတာတစ်ကြောင်းရယ် မီနစ်ပိုင်းအနဲငယ် သတိလစ်သွားပါတယ် အများပြည်သူသွားလာတဲ့ လမ်းမှာဖြစ်သည်။ သတိလစ်တာကို ကျွန်တော် လုပ်ဖော်ကိုင်ဖက် လေးယောက်ရဲ့ပြောပုံအရ မျက်နှာကို သတိလစ်လဲနေချိန် ရေနှင့် ပက်ခဲ့တယ်လို့ ပြောပါတယ်။ ကျွန်တော်သတိရလာပြီး ဆက်အသွားမှာ သူ၏လက်အောက်ကသူတစ်ချို့က ကျွန်တော်အား နောက်ကနေ ပါးထက် ရိုက်သည်။ ပါးရိုက်စဉ် သူမှ ပြည်သူရှေ့ မလုပ်ဖို့ စခန်းထဲရောက်မှ လုပ်ဖို့ ပြောခဲ့ပါတယ်။ စခန်းထဲအရောက် သူမှ မင်းမှတ်ထား ငါ့များဘာမှတ်နေလဲ ဟမ်ဟမ်ဟုပြောကာ ပါးသုံးချက် ဆက်ရိုက်ခံရပါတယ်(သတ်ပုံမူရင်း)” လို့ ဆိုပါတယ်။
အဲဒီနောက်မှာလည်း ပြုစုကုသပေးမှုမရှိဘဲ ဆက်လက်နှိပ်စက်ခံရသလို တစ်ညလုံး အမိုးအကာမပါ ဟာလာဟင်းလင်းနဲ့ အအေးဒဏ်အောက်မှာ အိပ်ခဲ့ရပြီးမှ ခံဝန်နဲ့ထွက်လာခဲ့ရတယ် ဆိုပါတယ်။
“စစ်တပ်က ဖမ်းဆီးနှိပ်စက်စဥ်က ထောင်ကိုအမြန်ပို့ဖို့ဆုတောင်းရသလို ကိုယ့်လူတွေ လက်ထဲမှာ မိုးအမြန်လင်းဖို့ပဲ ဆုတောင်းနေမိခဲ့ပါတယ်။ ကျွန်တော်သည် ဒီဖြစ်စဥ်မဖြစ်ခင် အချိန်အတွင်းမှာ ကျန်းကျန်းမာမာနဲ့ ရှိနေပါသည်။ ယခုဖြစ်စဥ်ဖြစ်ပြီးနောက် ကျွန်တော့်၏ ကျန်းမာရေး၊ လုံခြုံရေး၊ အသက်အန္ဒရယ်ကို ကျူးလွန်သူနဲ့ လက်အောက်ကသူတွေ တာဝန်ယူရမည်။ ဒုတိယ စစ်ကြောရေးကာလကိုခံစားခဲ့ရပြီး စိတ်ပိုင်းဆိုင်ရာ၊ရုပ်ပိုင်းဆိုင်ရာ အဆင်မပြေဖြစ်ခဲ့ပါသည်။(သတ်ပုံမူရင်း)”လို့လည်း ကိုအာကာဖြိုးက ရင်ဖွင့်ပါတယ်။
ဒီဖြစ်ရပ်အတွက် ကျူးလွန်သူကို အရေးယူပေးစေလိုကြောင်းကိုလည်း ကိုအာကာဖြိုးက MDY PDF ကို တိုင်ကြားထားတယ်လို့လည်း သိရပါတယ်။
