၈.၂.၂၀၂၅
Written By Thandar
တစ်ကမ္ဘာလုံးက လေးစားရတဲ့ ဘာသာရေးနဲ့ လူသားချင်းစာနာမှုဆိုင်ရာ ခေါင်းဆောင်တစ်ဦးဖြစ်တဲ့ Gurudev Sri Sri Ravi Shankar နဲ့အတူ ဂီတ၊ ဗဟုသုတနဲ့ တရားထိုင်ခြင်း ညနေခင်းပွဲ အခမ်းအနားကို ယနေ့ ဖေဖော်ဝါရီလ ၈ ရက် ညနေပိုင်းက ရန်ကုန်မြို့ မြို့မကျောင်းလမ်းရှိ အမျိုးသားဇာတ်ရုံမှာ ကျင်းပခဲ့ပါတယ်။
ဂုရုဒဗ် ရှရီရှရီ ရာဗီချန်ကာ တည်ထောင်ထားတဲ့ Art of Living Foundation က ငြိမ်းချမ်းရေး၊ ကိုယ်စိတ်နှစ်ပါးကျန်းမာရေးနဲ့ လူသားတိုင်းရဲ့ တန်ဖိုးတွေကို မြှင့်တင်ဖို့အတွက် ရည် ရွယ်ပြီး ဖွဲ့စည်းထားတဲ့ Non-Profit Organization အဖွဲ့အစည်းတစ်ခုဖြစ်ပါတယ်။
Art of Living Foundation က နိုင်ငံပေါင်း ၁၈၀ ကျော်မှာတည်ရှိပြီး လူတစ်ဦးချင်းစီရဲ့ လူမှုအသိုင်းအဝိုင်းတွေကို ပိုမိုပြည့်စုံတဲ့ဘဝတွေ ရရှိပိုင်ဆိုင်နိုင်စေဖို့နဲ့ မိမိရဲ့ ပတ်ဝန်းကျင်မှာ သဟဇာတ ဖြစ်အောင်နေထိုင်နိုင်ဖို့ ရည်ရွယ်ပြီး အမျိုးမျိုးသော ယောဂ၊ အသက်ရှူလေ့ကျင့်ခန်းတွေနဲ့ သင်ကြားပို့ချ ပြုစုပျိုးထောင်ပေးလျက်ရှိပါတယ်။
အဆိုပါ ပွဲအခမ်းအနားမှာ ဖိတ်ကြားထားတဲ့ ဧည့်သည်တော်တွေ၊ တာဝန်ရှိသူတွေ တက်ရောက်ခဲ့ကြပြီး မြန်မာနိုင်ငံလုံးဆိုင်ရာ အိန္ဒိယသံအမတ်ကြီး၊ နယ်ပယ်အသီးသီးက ဘာသာရေး လူမှုရေး စီးပွားရေး ယဉ်ကျေးမှုနယ်ပယ်က ဂုဏ်သရေရှိလူကြီးတွေ တက်ရောက်ခဲ့ကြပါတယ်။ ပထမဦးစွာ မြန်မာနိုင်ငံက ယဉ်ကျေးမှုဓလေ့တွေကို မီးမောင်းထိုးပြတဲ့ ယဉ်ကျေးမှုဆိုင်ရာ အိန္ဒိယရိုးယဉ်ကျေးမှုအကနဲ့ ကပြဖျော်ဖြေခြင်း၊ မြန်မာတိုင်းရင်းသားပေါင်းစုံယဉ်ကျေးမှုအကနဲ့ ကပြခဲ့ပြီးတော့ မြန်မာနိုင်ငံက သဘာဝရှုခင်း အလှအပတွေကို ချပြခဲ့ပါတယ်။
အဲဒိနောက်မှာ Gurudev ကြီးကို အမှတ်တရလက်ဆောင်များပေးအပ်ခဲ့ပြီးတော့ တာဝန်ရှိလူကြီးတွေက ဆီးမီးထွန်းညှိပူဇော်ကျင်းပခဲ့ကြပါတယ်။Gurudev က ကိုယ်ရောစိတ်ပါ ကျန်းမာချမ်းသာခြင်း အသက်ရှုလေ့ကျင့်ခန်းရဲ့ အရေးပါမှုကိုလည်း လမ်းညွှန်သင်ကြားပြသပေးခဲ့ပါတယ်။
ဒီပွဲကိုတော့ ရန်ကုန်မြို့ရှိ မြန်မာနိုင်ငံဆိုင်ရာအိန္ဒိယသံရုံးက အိန္ဒိယမြန်မာကုန်သည်ကြီးများအသင်းတို့က ပံ့ပိုးကူညီဆောင်ရွက်ပေးခဲ့တာလည်းဖြစ်ပါတယ်။
ဂုရုကြီးက ကမ္ဘာတစ်ဝှမ်းရှိ ခန့်မှန်း ခြေ လူသန်း ၅၀၀ရဲ့ လူအချင်းချင်း အပြန်အလှန်ဆက်သွယ်မှုတွေ၊ အများပြည်သူဆိုင်ရာ အခမ်းအနားပွဲလမ်းတွေ၊ သင်ကြားပြသမှုတွေ၊ ဘဝနေနည်း အလုပ်ရုံ ဆွေးနွေးပွဲတွေနဲ့ လူသားချင်းစာနာထောက်ထားမှုဆိုင်ရာ အစီအစဉ်တို့က တစ်ဆင့် ကမ္ဘာတစ်ဝန်းက လူသန်းငါးရာခန့်ကို ထိတွေ့ပြောဆိုခဲ့ပြီး သင်ကြပြသပေးသူဖြစ်တယ်လို့ သိရပါတယ်။
Gurudev Sri Sri Ravi Shankar က ကိုလံဘီယာ၊ မွန်ဂိုလီးယား၊ ပါရာဂွေး၊ ဆူရီနမ် နဲ့ ဖီဂျီတို့ရဲ့ အမြင့်ဆုံးအရပ်သားဆုတွေအပါအဝင် ဂုရုကြီးကိုဂုဏ်ထူးဆောင်ဆုမြောက်မြားစွာ ချီးမြှင့်ခြင်းခံရသူပါ။ ၂၀၁၆ ခုနှစ်က အိန္ဒိယနိုင်ငံရဲ့ အမြင့်ဆုံး နိုင်ငံသားဆု ‘Padma Vibhushan’ ဘွဲ့အမည်နဲ့ အပ်နှင်းခြင်းခံခဲ့ရသူလည်းဖြစ်ပါတယ်။ ဒါ့ပြင်ကမ္ဘာတစ်ဝန်းကလည်း ဂုဏ်ထူးဆောင်ပါရဂူဘွဲ့ ၂၇ ခုကို အပ်နှင်းထားရသူလည်းဖြစ်ပါတယ်။
