၅.၂.၂၀၂၅
Written By Thandar
Suspense Trailer ဇာတ်လမ်းပုံစံ “မျက်နှာဖုံး” ဇာတ်လမ်းတွဲ Spotlight Event ပွဲ အခမ်းအနားကို ယနေ့ ဖေဖော်ဝါရီ ၅ ရက် နံနက် ၁၀ နာရီက ရန်ကုန်မြို့ စံရိပ်ငြိမ် ဂမုန်းပွင့် မင်္ဂလာရုပ်ရှင်ရုံမှာ ကျင်းပခဲ့ပါတယ်။
“ဒီဇာတ်လမ်းတွဲမှာ စိုးပြည့်က သူဌေးသမီး ရတနာဆိုင်ပိုင်ရှင်ဆိုတော့ အရမ်းကလေးဆန်တဲ့ ပုံစံမျိုးမဟုတ်ဘဲ စမတ်ကျတဲ့ လိုက်ဖက်မယ့်တေဖက်ရှင်လေးတွေ ဝတ်ဆင်ထားပါတယ်။ ဒီဇာတ်ကားမှာ ချေမိုးနေတဲ့ ပုံစံလေးပါ။ စိုးပြည့်အနေနဲ့ ကိုယ့်ကျရာဇာတ်ရုပ်ပေါ်မှာ ကာရိုက်တာတွေ တိုင်ပင်ပြီး စဉ်းစားလုပ်ထားကြတာပါ။ မထင်မှတ်ထားတဲ့ မျက်နှာဖုံးအောက်က အရာတွေကို ဒီဇာတ်ကားမှာ မြင်တွေ့ရမှာတွေ ရှိပါသေးတယ်။ ဇာတ်လမ်းပုံစံလေးက Suspense ရယ် Trailer နဲ့ Drama လေးလည်းပါပါတယ်။ စိုးပြည့် ကြိုးစားသရုပ်ဆောင်ခဲ့တဲ့ကားမို့ ခုလည်း ပရိသတ်လည်း တွေ့ဆုံရတာ ပျော်ရွှင်ရပါတယ်”လို့ သရုပ်ဆောင် စိုးပြည့်သဇင်က ပြောပါ တယ်။
အဆိုပါ အခမ်းအနားမှာတော့ ဇာတ်ကားထဲမှာ ပါဝင်သရုပ်ဆောင်ထားတဲ့ သရုပ်ဆောင်တွေ၊ ဇာတ်လမ်း ဇာတ်ညွှန်းပိုင်းက စတဲ့သူတွေနဲ့ တွေ့ဆုံပြီး ပရိသတ်တွေနဲ့ အမှတ်တရစကားတွေ ပြောဆိုခဲ့ကြပါတယ်။
ဒီဇာတ်ကားကို ဒါရိုက်တာကျော်သားကြီးက ရိုက်ကူးပြီး သရုပ်ဆောင် ဟိန်းဝေယံ၊ ထွန်းကိုကို၊ အကယ်ဒမီစိုးပြည့်သဇင်၊ ဆောင်းယွန်းစံ၊ အယ်လ်လာရွှေစင်၊ ညီနန္ဒ၊ နေမျိုးအောင်၊ အကယ်ဒမီမြတ်ကေသီအောင်၊ သာသာနဲ့ သရုပ်ဆောင်များစွာ ပါဝင်ထားကြပါတယ်။
မျက်နှာဖုံး ဇာတ်လမ်းတွဲကို ဇန်နဝါရီ ၁၁ ရက်နေ့က စတင်ထုတ်လွှင့်နေတာဖြစ်ပြီးတော့ စနေနေ့နဲ့ တနင်္ဂနွေနေ့ ည ၇ နာရီမှာ Channel K နဲ့ Mahar application က ထုတ်လွှင့်ပြသနေတာ ဖြစ်သလို ပြန်လည်ပြသချိန်ကို စနေနေ့နဲ့ တနင်္ဂနွေနေ့တွေမှာ နံနက် ၉ နာရီနဲ့ ည ၁၁ နာရီမှာ ပြသနေလျက်ရှိပါတယ်။
