
၃၀.၁.၂၀၂၅
Translated by Htwe Ko Tun
အမေရိကန်ပြည်ထောင်စု သမ္မတ ဒေါ်နယ်ထရန့်ကို Facebook နဲ့ Instagram တို့ရဲ့ ပိုင်ရှင် Meta ကုမ္ပဏီအနေနဲ့ အကြမ်းဖျင်းအားဖြင့် ဒေါ်လာ ၂၅ သန်း(ပေါင်စတာလင် သန်း ၂၀) ခန့်ပေးဆောင်ရမယ့် ဥပဒေကြောင်းအရ တရားဝင်ကျေအေးသဘောတူချက်ကို လက်မှတ်ရေးထိုးခဲ့တယ်လို့ သိရပါတယ်။
၂၀၂၁ ခုနှစ် ဇန်နဝါရီလ ၆ ရက်မှာဖြစ်ခဲ့တဲ့ ကွန်ဂရက်အဆောက်အအုံ အဓိကရုဏ်းတွေအပြီးမှာ လူမှုကွန်ရက် Facebook မှာရှိတဲ့ သူရဲ့ အကောင့်တွေကို ဆိုင်းငံ့မှုပြုခဲ့တာကြောင့် ထရန့်က Facebook လူမှုကွန်ရက်ကြီးနဲ့ သူ့ရဲ့အမှုဆောင်အရာရှိချုပ် မာ့က်ဇတ်ကာဘာဂ့်ကို ၂၀၂၁ ခုနှစ်အတွင်းက တရားစွဲခဲ့ပါတယ်။
၂၀၂၄ ခုနှစ်၊ ဇူလိုင်လအတွင်း အမေရိကန်နိုင်ငံရဲ့ သမ္မတရွေးကောက်ပွဲ မကျင်းပမီကာလမှာတော့ Meta ကုမ္ပဏီက Facebook နဲ့ Instagram တို့မှာရှိတဲ့ ထရန့်ရဲ့အကောင့်တွေကို တင်းကျပ်မှုတွေအပေါ် ဖြေလျှော့ပေးခဲ့ပါတယ်။
Meta ကုမ္ပဏီရဲ့ တရားဝင်ကျေအေးသဘောတူချက်အရ ပေးဆောင်ငွေထဲက ဒေါ်လာ ၂၂ သန်းခန့်ဟာ ထရန့်ရဲ့ သမ္မတအိမ်တော်စာကြည့်တိုက်ရဲ့ ရန်ပုံငွေကို ရောက်ရှိသွားမှာဖြစ်ပါတယ်။ ကျန်တဲ့ငွေကိုတော့ တရားရေးစရိတ်တွေနဲ့ တရားစွဲမှုမှာ လက်မှတ်ထိုးခဲ့တဲ့ တခြားတရားလိုတွေအတွက်အသုံးပြုသွားမယ်လို့ သိရပါတယ်။ ဒါပေမယ့် Meta အနေနဲ့ ထရန့်ရဲ့ အကောင့်တွေကို ဆိုင်းငံ့ခြင်းကို အမှားကို ကျူးလွန်မိတာလို့ ဝန်ခံမှာမဟုတ်ပါဘူး။
၂၀၁၇ ခုနှစ်ကဆိုရင် ထရန့်က Facebook လူမှုကွန်ရက်ပလက်ဖောင်းကို ထရန့် ဆန့်ကျင်ရေး လှုပ်ရှားမှုအနေနဲ့ ပြင်းပြင်း ထန်ထန်ကိုဝေဖန်ခဲ့တာပါ။ သူ့ရဲ့ အကောင့်တွေ အပိတ်ခံရပြီးနောက် ပိုဆိုးလာခဲ့ပြီး ၂၀၂၄ ခုနှစ်၊ မတ်လမှာတော့ ထရန့်က Facebook ကို ‘ပြည်သူတွေရဲ့ ရန်သူ’ လို့တောင် အမည်တပ်ခဲ့သေးတာပါ။
Meta ကုမ္ပဏီက ထရန့်ရဲ့ အကောင့်တွေကို ၂၀၂၁ ခုနှစ်က ဆိုင်းငံ့ခဲ့ပြီးနောက်မှာ အနည်းဆုံးနှစ်နစ်ကြာ ထရန့်ကို လူမှုကွန်ရက်ပလက်ဖောင်းတွေကပိတ်ထားမယ်လို့ ပြောခဲ့တာပါ။ သမ္မတရွေးကောက်ပွဲမှာ ထရန့်နိုင်အပြီးမှာတော့ ဇတ်ကာဘာဂ့်က ဖလော်ရီဒါပြည်နယ် အပန်းဖြေစခန်းမှာအေလာဂိုရှိ ထရန့်ရဲ့ အိမ်တော်ကိုသွားရောက်လည်ပတ်ခဲ့ပါတယ်။ ဒါက တစ်ချိန်က ဆိုးဆိုးဝါးဝါးပျက်ပြားနေတဲ့ သူတို့ နှစ်ယောက် ဆက်ဆံရေးမှာ စတင်ပြေပြစ်လာမှုလက္ခဏာလို့ ဆိုရမှာပါ။
ပြီးခဲ့တဲ့ ဒီဇင်ဘာလမှာတော့ Meta ကုမ္ပဏီက ထရန့်ရဲ့ သမ္မတအဖြစ် ကျမ်းသစ္စာကျိန်ဆိုပွဲ အခမ်းအနားအတွက် ဒေါ်လာတစ်သန်းလှူခဲ့သေးတာမို့ သမ္မတသစ်နဲ့ ကောင်းမွန်တဲ့ ဆက်ဆံရေးကို ဇတ်ကာဘာဂ့် အနေနဲ့ ကြိုးစားနေတယ်လို့ ယူဆရချိန်မှာ သူတို့နှစ်ဦးကြားအမှုကိုလည်း ခုလို အမှုကျေအေးခအနေနဲ့ပေးခဲ့ကြခြင်းပါပဲ။
Ref- BBC