MT News
Written by Tha Doe
Grand Royal အရက်ချက်စက်ရုံ ခြောက်နာရီခန့်ကြာ မီးလောင်မှုကြောင့် စက်ရုံတစ်ခုလုံးနီးပါး မီးလောင်ပျက်စီးခဲ့ပြီး အရက်ဆီဂါလန်သိန်းနှင့်ချီ မီးလောင်ဆုံးရှုံးသည့်အပြင် မီးသတ်သမား ၁၂ ဦးပါ ဒဏ်ရာရခဲ့သည်ဟု သိရသည်။
ယမန်နေ့ နေ့လယ် ၃ နာရီခွဲအချိန်မှစတင်ကာ ရန်ကုန်တိုင်းဒေသကြီး၊ မှော်ဘီမြို့နယ်၊ လိပ်ပုတ်ကျေးရွာအုပ်စု၊ လိပ်ပုတ်ကျေးရွာ အမှတ်(၄)လမ်းမဘေးရှိ Grand Royal အရက်ချက်စက်ရုံတွင် မီးလောင်မှု ဖြစ်ပွားခဲ့သည်။
မီးလောင်မှုအား Level အဆင့် ( ၃ )သတ်မှတ်၍ မြန်မာနိုင်ငံမီးသတ်တပ်ဖွဲ့ဌာနချုပ်မှ ညွှန်ကြားရေးမှူးချုပ် ဦးမြတ်သူ ဦးဆောင်သော မြန်မာနိုင်ငံမီးသတ်တပ်ဖွဲ့ဌာနချုပ်ယာဉ်အုပ်စုနှင့် ရန်ကုန်တိုင်းဒေသကြီးအတွင်းရှိ မီးသတ်စခန်းများမှ Level 3 ယာဉ်အုပ်စု၊ စုစုပေါင်း မီးသတ် ယာဉ်(၆၀)စီး၊ သန္ဓေမီးသတ်တပ်ဖွဲ့ဝင်(၄၅၀)ဦး၊ အရန်မီးသတ်တပ်ဖွဲ့ဝင်(၁၀၀)ဦးတို့ဖြင့် မီးလောင်ကျွမ်းသည့် အရက်ချက်စက်ရုံသို့ရောက်ရှိ မီးငြှိမ်းသတ်ခဲ့သည်။
မီးလောင်ကျွမ်းမှုကြောင့် စက်ရုံရှိ RF 96% အရက်ဆီဂါလန် (၅၀,၀၀၀)ဆံ့ Tank (၃)လုံး၊ RF 50% အရက်ဆီလီဘာ (၂၀,၀၀၀)ဆံ့ Tank (၆)လုံးနှင့် ဂိုဒေါင်(၃)လုံးတို့ မီးလောင်ကျွမ်းလျက်ရှိပြီး မီးလောင်ကျွမ်းမှုအား မီးသတ်တပ်ဖွဲ့ဝင်များက စွမ်းစွမ်းတမံမီးငြှိမ်းသတ် ဆောင်ရွက်လျက်ရှိစဉ် ယမန်နေ့ ညနေ ၅ နာရီခွဲအချိန်တွင် အဆိုပါစက်ရုံအတွင်းမှ ပေါက်ကွဲမှုဖြစ်ပွားခဲ့သဖြင့် မီးငြှိမ်းသတ်နေသည့် မီးသတ်တပ်ဖွဲ့ဝင် ၁၂ ဦးတို့တွင် ဒဏ်ရာအချို့ ရရှိခဲ့သောကြောင့် အင်းစိန်ပြည်သူ့ ဆေးရုံကြီးသို့ ပို့ဆောင်ဆေးဝါးကုသမှုခံယူလျက်ရှိခဲ့သည်။
စက်ရုံမီးလောင်ကျွမ်းရသည့်အကြောင်းအရင်းနှင့် ဆုံးရှုံးမှုတန်ဖိုးအား စိစစ်တွက်ချက် လျက်ရှိကာ မီးလောင်ကျွမ်းမှုအား အမြန်ဆုံးငြှိမ်းသတ်နိုင်ရေးအတွက် မီးသတ်တပ်ဖွဲ့ဝင်များက ဆက်လက်ကြိုးပမ်း ငြှိမ်းသတ်ဆောင်ရွက်လျက်ရှိခဲ့ကြောင်း သတင်းရရှိသည်။
