၂၈.၁.၂၀၂၅
Written By Thandar
အောင်သီရိထုတ်လုပ်ရေးက ဟာသ ဇာတ်လမ်းပုံစံ ” ရှယ်ယောက္ခမများ” ရုပ်ရှင်ဇာတ်ကားကြီး Red Carpet Show အခမ်းအနားကို ယနေ့ ဇန်နဝါရီ ၂၈ ရက် ညနေပိုင်းက ရန်ကုန်မြို့ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“ဒီဇာတ်ကားမှာ ခင်ခင်ချစ်ဆိုတဲ့ စကားမပြောတတ်တဲ့ ကောင်မလေးနေရာက ခြူးလေးက သရုပ်ဆောင်ထားပါတယ်။ နားကတော့ ကြားရတယ်ပေါ့နော်။ စကားပဲ မပြောတတ်တာပါ။ အရမ်းလည်း ချစ်တတ်တဲ့ အချစ်ရူးမလေးပေါ့။ သူချစ်တဲ့ကောင်လေး ပြန်ချစ်ဖို့အတွက်ကို ကြိုးစားထားရတယ်။ ယောက္ခမတွေ အကြိုက်တွေကို လိုက်ပြီး လုံးရတော့တာပေါ့နော်။ ကိုယ်တိုင်လည်း တော်တော်လေးကို ကြိုးစားသရုပ်ဆောင်ထားပါတယ်။ ရုံတင်ရင်လည်း အားပေးကြပါဦး”လို့ သရုပ်ဆောင် ခြူးလေးက ပြောပါတယ်။
ဒီဇာတ်ကားကို ဇာတ်လမ်း၊ ဇာတ်ညွှန်း နတ်ရဲ (ရူပဗေဒ)၊ ရိုက်ကွင်း ဇာတ်ညွှန်းလူညိုချော၊ ဒါရိုက်တာ ကိုဇော်(အရုဏ်ဦး)က သရုပ်ဆောင်တွေအနေနဲ့ လွှမ်းပိုင်၊ ကျော်ထက်၊ ခင်လှိုင်၊ ခြူးလေး၊ အကယ်ဒမီမို့မို့မြင့်အောင်၊ ခိုင်နှင်းဝေ၊ အကယ်ဒမီတက္ကသိုလ် ဂွမ်းပုံ၊ ဆင်မ၊ သွက်လက်၊ ဘဲတော၊ ဝါဝါအောင် ၊ မျိုးမျိုးခိုင်၊ ရန်ပြေ၊ သီရတီ စတဲ့သူတွေ ပါဝင်ထားကြပါတယ်။
“ရှယ်ယောက္ခမများ”ရုပ်ရှင်ဇာတ်ကားကြီးကို လာမယ့် ဇန်နဝါရီ ၃၁ ရက်နေ့မှာ တစ်ပြည်လုံးက ရုပ်ရှင်ရုံတွေမှာ ရုံတင်ပြသမှာဖြစ်ပါတယ်။
