MT News
၂၂.၁.၂၀၂၅
ရပ်ထားသော YBS ကို နောက်ကဝင်တိုက်သည့် တက္ကစီယာဥ်မှာ အရှိန်ဖြင့် YBS ယာဥ်အောက် ကားခေါင်းကျွံပြီး ယာဥ်မောင်းမှာ သတိလစ်ကာ ကားခေါင်းအတွင်း ညပ်နေသဖြင့် အောက်စီဂျင်ပေးကယ်ထုတ်ခဲ့ရသော်လည်း စိုးရိမ်ဒဏ်ရာရသည့်ဖြစ်စဥ် အင်္ဂါနေ့ညနှောင်းပိုင်းအချိန်က ဖြစ်ပွားခဲ့သည်ဟု Yangon Rescue Organization (YRO) မှ သိရသည်။
ဖြစ်စဥ်မှာ ယမန်နေ့ည ၁၀ နာရီ မိနစ် ၅၀ ခန့်တွင် ရန်ကုန် တိုင်းဒေသကြီး၊ မရမ်းကုန်းခရိုင်၊ မရမ်းကုန်းမြို့နယ်၊ အင်းစိန်လမ်းပေါ်၊ နီလာရိုးမ စက်သုံးဆီဆိုင်ရှေ့တွင် တက္ကစီယာဥ်တစ်စီးသည် ရပ်ထားသော YBS (၁၈)ယာဥ်အား နောက်မှ တိုက်မိသည့် ဖြစ်စဥ် ဖြစ်ပွားခဲ့သည်။
ထိုဖြစ်စဥ်သို့ YRO ၏ မရမ်းကုန်းခရိုင်မှူး ဦးလှမြင့် ရောက်ရှိကြီးကြပ်ပြီး YRO အဖွဲ့ဝင်” ရတနာဖြိုး-ကူညီကယ်ဆယ်ရေးအသင်း၊ လှိုင်- လူမှုကူညီရေးအသင်း” မှ စေတနာ့ ဝန်ထမ်းများ သွားရောက်ကူညီခဲ့ကြသည်။
အဆိုပါ ယာဥ်တိုက်မှုဖြစ်စဥ်တွင် တက္ကစီယာဥ်မောင်းသည် ကားအတွင်း ညပ်နေခဲ့ပြီး အလွယ်တကူ ကယ်ထုတ်ရန် အခက်အခဲ ဖြစ်နေခဲ့သဖြင့် လူနာအသက်ဆုံးရှုံးမှုမရှိစေရန် အောက်စီဂျင်အကူအညီပေးခြင်းအား မရမ်းကုန်းခရိုင်မှူး ဦးလှမြင့် နှင့်” ရတနာဖြိုး” အသင်းမှ ဆောင်ရွက်ပြီး လူနာကယ်ထုတ်ရန်အတွက် မြန်မာနိုင်ငံမီးသတ်တပ်ဖွဲ့ထံ အကူအညီ တောင်းခံခဲ့သလို အခြား မိတ်ဖက် လူမှုကူညီရေးအသင်းများလည်း ရောက်ရှိ ကူညီခဲ့ကြသည်။
ဖြစ်စဥ်နေရာသို့ ည ၁၁ နာရီ ၁၀ မိနစ်တွင် မြန်မာနိုင်ငံမီးသတ်တပ်ဖွဲ့- အင်းစိန်မြို့နယ် မီးသတ်စခန်းမှ ရှာဖွေ ကယ်ဆယ်ရေးအဖွဲ့ ရောက်ရှိလာပြီး တက္ကစီယာဥ်မောင်းအား ကယ်ဆယ်ထုတ်ယူခြင်း ပြုခဲ့ရာ ည ၁၁ နာရီ ၁၄ မိနစ်တွင် ယာဥ်မောင်းအား ထုတ်ယူ ကယ်ဆယ်နိုင်ခဲ့သော်လည်း ယာဥ်မောင်းသည် သတိမရဘဲ စိုးရိမ်ရသော အခြေအနေတွင်ရှိကြောင်း စစ်ဆေးတွေ့ရှိခဲ့ရသည်။
ထို့ကြောင့် စိုးရိမ်ရယာဥ်မောင်းအား မြေပြင်ပြုစုမှု ပြုပေးပြီး ရန်ကုန်ဆေးရုံကြီးသို့ ” မြန်မာနိုင်ငံကြက်ခြေနီအသင်း (အင်းစိန်မြို့နယ်သူနာပြုတပ်ဖွဲ့) ” ၏ အရေးပေါ်လူနာတင်ယာဥ်ဖြင့် ပို့ဆောင် ကူညီပေးခဲ့ကြသည်ဟု သိရသည်။
ပုံစာ။ YBS ယာဥ်အား နောက်ကဝင်တိုက်သော ယာဥ်မောင်းအား ကယ်ထုတ်နေမှုမြင်ကွင်း (Photo- Yangon Rescue Organization)
