၂၁.၁.၂၀၂၅
Written By Thandar
မေခ ရုပ်ရှင်ထုတ်လုပ်ရေးရဲ့ ကချင်ပြည်နယ် ပူတာအိုက အေးခဲနေတဲ့ ရေခဲတောင်၊ နှင်းတောင်တန်းတွေဆီရောက်သွားသလို ခံစားရစေမယ့် “နှင်းပွင့်စေရာ” ရုပ်ရှင်ဇာတ်ကားကြီး Red Carpet Show အခမ်းအနားကို ယနေ့ ဇန်နဝါရီ ၂၁ ရက် ညနေပိုင်းက ရန်ကုန်မြို့ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“ကျွန်တော်တို့က ပူတာအို၊ ရေခဲတောင်မှာရိုက်မယ်လို့ စဉ်းစားလိုက်တယ်။ လီဆူလူမျိုးတွေ၊ ရဝမ်လူမျိုးတွေရဲ့နေရာဆိုတော့ သူတို့ရဲ့ ရိုးရာဓလေ့တွေ စိတ်နေစိတ်ထားတွေ စိတ်ဓာတ်ပိုင်းဆိုင်ရာတွေ ပေါ်လွင်အောင် ရိုက်ကူးချင်တာမို့ ဇာတ်လမ်း ဇာတ်အိမ်ကို ဖန်တီးခဲ့တာပါ။ ဇာတ် ကားက လွန်ခဲ့တဲ့ ၂၀၁၉ ခုနှစ်လောက်က ရိုက်ကူးခဲ့တဲ့ကားပါ။ ဒီကားမှာ ကိုမြင့်မြတ်တို့ သင်ဇာတို့နဲ့ တခြားအနုပညာရှင်တွေကလည်း အကောင်းဆုံးကြိုးစားအားထုတ်ထားတဲ့ ကားလေးပါ”လို့ ဇာတ်လမ်း၊ ဒါရိုက်တာ JZ ဒေါင်လွဏ်းက ပြောပါတယ်။
ဇာတ်ညွှန်း ဒီရေလှိုင်းနဲ့ မယ်ခိုင်၊ ဇာတ်လမ်းနဲ့ ဒါရိုက်တာ JZ ဒေါင်လွဏ်းတို့က ရေးသားပြီး သရုပ်ဆောင်တွေဖြစ်တဲ့ အကယ်ဒမီမြင့်မြတ်၊ JZ ဒေါင်လွဏ်း၊ ညိမ်းသော်၊ ယုန်လေး၊ သင်ဇာ၀င့်ကျော်၊ L ဘောက်နူး၊ K ညီ၊ အခြားသရုပ်ဆောင်တွေနဲ့အတူ ရ၀မ်၊ လီဆူး တိုင်းရင်းသားတွေပါ၀င်သရုပ်ဆောင်ထားကြပါတယ်။
“နှင်းပွင့်စေရာ” ရုပ်ရှင်ဇာတ်ကားကြီးကို လာမယ့် ဇန်နဝါရီ ၃၁ ရက်မှာ မြန်မာပြည်အတွင်းရှိ အဆင့်မြင့်ရုပ်ရှင်ရုံကြီးတွေမှာ ရုံတင်ပြသမှာဖြစ်ပါတယ်။
