၂၀၂၄ ခုနှစ် မြန်မာ့ရုပ်ရှင်ထူးချွန်ဆုချီးမြှင့်ပွဲအခမ်းအနားကျင်းပမယ့် ဖေဖော်ဝါရီလအတွင်းရိုက်ကူးရေးလုပ်ငန်းတွေ ခေတ္တဆိုင်းငံ့ပေးဖို့လို

၂၁.၁.၂၀၂၅
Written By Thandar

၂၀၂၄ ခုနှစ် မြန်မာ့ရုပ်ရှင်ထူးချွန်ဆုချီးမြှင့်ပွဲအခမ်းအနားကို ၂၀၂၅ ခုနှစ် ဖေဖော်ဝါရီလအတွင်း နေပြည်တော်မှာကျင်းပမယ့်ရက်အချို့မှာ ရိုက်ကူးရေး လုပ်ငန်းတွေ ခေတ္တဆိုင်းငံ့ပေးဖို့ လိုအပ်တယ်လို့ ဆိုပါတယ်။

“ကျွန်တော်တို့က အရင်နှစ် အကယ်ဒမီပေးပွဲကာလတွေမှာလည်း အခုလိုပဲ သတ်မှတ်ချက်လေးထုတ်လေ့ရှိပါတယ်။ ဒါကြောင့် ဒီနှစ်လည်း ၂၀၂၅ ခုနှစ် ဖေဖော်ဝါရီလအတွင်း နေပြည်တော်မှာ ကျင်းပပြုလုပ်မှာမို့လို့ ဒီပွဲကာလမှာ အနုပညာရှင်တွေ အကယ်ဒမီပေးပွဲတက်ရောက်နိုင်ဖို့ ဖေဖော်ဝါရီလအထိ ရိုက်ကူးရေးလုပ်ငန်းတွေ ခေတ္တဆိုင်းငံ့ပေးဖို့ ခုလိုစာထုတ်ဖြစ်တာပါ”လို့ မြန်မာနိုင်ငံရုပ်ရှင်အစည်းအရုံး တာဝန်ရှိသူကပြောပါတယ်။

အဆိုပါ အကယ်ဒမီပေးပွဲကျင်းပမယ့် ကာလဖြစ်တဲ့ဖေဖော်ဝါရီလ ၆ ရက်နေ့ကနေ ဖေဖော်ဝါရီ ၁ဝ ရက်နေ့အထိ ရိုက်ကူးရေးလုပ်ငန်းများ ခေတ္တဆိုင်းငံ့ပေးဖို့ ရုပ်ရှင်လောကသား အနုပညာရှင်၊ အတတ်ပညာရှင်တွေကို မေတ္တာရပ်ခံ အသိပေးကြေညာပေးခဲ့တာလည်းဖြစ်ပါတယ်။

၂၀၂၄ ခုနှစ်အတွက် မြန်မာ့ရုပ်ရှင်ထူးချွန်ဆုချီးမြှင့်ပွဲပေးပွဲ Nomination စာရင်းဝင် ဇာတ်ကား ၁၈ ကားကို ဒုတိယအကြိမ်ကြည့်ရှုစစ်ဆေးပြီးစီးခဲ့ပြီး ဖြစ်တယ်လို့လည်း သိရပါတယ်။