ထိုင်းနိုင်ငံ၊ ဘန်ကောက်မြို့၌ ဆံပင်ညှပ်အလှပြင်ဆိုင်တွင် အလုပ်လုပ်နေသော မြန်မာအမျိုးသမီး တစ်ဦးအပါအဝင် နိုင်ငံခြားသားငါးဦးကို ရဲတပ်ဖွဲ့က ဖမ်းဆီး

၁၅.၁.၂၀၂၅.
Translated by Htwe Ko Tun

ထိုင်းနိုင်ငံ၊ ဘန်ကောက်မြို့တော်ရဲ့ ဆူခွန်ဗစ်လမ်းပေါ်မှာရှိတဲ့ ဆံပင်ညှပ်အလှပြင်ဆိုင်တစ်ဆိုင်မှာ တောင်ကိုရီးယားနိုင်ငံသားလေးဦးနဲ့ မြန်မာနိုင်ငံသားတစ်ဦးတို့ကို ထိုင်းနိုင်ငံသားတွေအတွက် ဆံပင်ညှပ်အလုပ်တွေ ခွင့်ပြုချက်မရှိဘဲလုပ်ကိုင်နေလို့ ထိုင်းရဲတပ်ဖွဲ့က ဇန်နဝါရီလ ၁၄ ရက်ကဖမ်းဆီးခဲ့တယ်လို့ သိရပါတယ်။

ရဲတပ်ဖွဲ့ က မွန်းလွဲ ၃ နာရီ ၁၅ မိနစ်လောက်မှာ ဆံပင်ညှပ်ဆိုင်အတွင်း ဝင်ရောက်ဖမ်းဆီးခဲ့တာဖြစ်ပြီး ဆူခွန်ဗစ်လမ်းပေါ်က စီးပွားရေးဆိုင်ရာ အဆောက်အအုံတစ်ခုရဲ့ ဒုတိယထပ်ရှိဆံပင်ညှပ်ဆိုင်အမည်ကိုတော့ ရဲတပ်ဖွဲ့က မထုတ်ပြန်ခဲ့ပါဘူး။

ရဲတပ်ဖွဲ့ဝင်တွေက ဆိုင်ထဲမှာ ထိုင်းနိုင်ငံသားတွေရော၊ နိုင်ငံခြားသားတွေပါ ဆံပင်ညှပ်သမားတွေအဖြစ် အလုပ်လုပ်နေတာ တွေ့ခဲ့ကြပါတယ်။ ဆံပင်ညှပ်ဖို့ စောင့်ဆိုင်းနေသူတွေလည်း တွေ့ခဲ့ရတယ်လို့ ဆိုပါတယ်။

ရဲတပ်ဖွဲ့က ကိုရီးယားအမျိုးသားနှစ်ဦးနဲ့ အမျိုးသမီးနှစ်ဦးတို့ကို ရက် ၉၀ ကမ္ဘာလှည့်ခရီးသွားဗီဇာတွေ ကိုင်ဆောင်ပြီးဖမ်းမိခဲ့တာပါ။ နောက်တစ်ယောက်ကတော့ မြန်မာနိုင်ငံသားအမျိုးသမီးတစ်ဦးလို့ ဆိုပါတယ်။ သူတို့အကုန်လုံးရဲ့ အသက်က ၂၄ နှစ်မှ ၃၃ နှစ်ကြားရှိကြတယ်လို့ ဒုရဲမှူးကြီး သာနာကွန်ဂမ်ဗင်က ပြောခဲ့ပါတယ်။

သူတို့တွေက အလုပ်အကိုင်နေရာချထားရေးဌာနက သတ်မှတ်ထားတဲ့စည်းမျဉ်းတွေအရ နိုင်ငံခြားသားတွေ ထိုင်းနိုင်ငံမှာ လုပ်ကိုင်ခွင့်မရှိတဲ့အလုပ်တွေမှာ အလုပ်လုပ်နေကြတာမို့လို့ တရားစွဲခံရမယ်လို့ သိရပါ တယ်။

အဆိုပါဆံပင်ညှပ်အလှပြင်ဆိုင်ရဲ့ ပိုင်ဆိုင်မှုနဲ့ ပတ်သက်လို့ အသေးစိတ်ကိုတော့ မသိရသေးပါဘူး။

Ref- Bangkok Post