၁၅.၁.၂၀၂၅
Written By Thandar
ကြော်ငြာလောက,ကတစ်ဆင့် အနုပညာလောကမှာပါ ယနေ့ချိန်ထိ ပရိသတ်ချစ်ခင်မှုကို ရရှိနေတဲ့ အကယ်ဒမီထက်ထက်မိုးဦးကတော့ လက်ရှိ ဒီလိုရပ်တည်နိုင်တာ ဘယ်သူ့ရဲ့ကျေးဇူးကိုမှ မမေ့မလျော့ခဲ့တာကြောင့်လို့ ထင်ပါတယ်လို့ ဆိုပါတယ်။
“မထက် ဒီနေ့အထိ ဒီလိုရပ်တည်နိုင်တာက ဘယ်သူ့ရဲ့ ကျေးဇူးတရားကိုမှ ဒီနေ့ထိ မမေ့လို့ဘဲလို့ထင်ပါတယ်။ ကိုယ်က တစ်ယောက်ယောက်နဲ့ ပတ်သက်ခဲ့ဖူးတယ်။ ကိုယ့်မိတ်ဆွေပဲဖြစ်ဖြစ် ကိုယ်နဲ့ရင်းနီးတဲ့သူပဲ ဖြစ်ဖြစ် ကိုယ့်ပေါ်မှာ ကျေးဇူးရှိဖူးသူတွေကို ဘယ်တော့မှမမေ့ဘူး။ အကယ်၍ ကိုယ့်အပေါ်မှာ ရက်စက်တယ်။ ပြဿနာဖြစ်တယ်ဆိုရင်တောင် ကိုယ့်အပေါ် ကောင်းတဲ့အချက်တွေကို ပြန်ပြီးဖြည့်တွေးဖြစ်တယ်။ အကုန်လုံးကို ကျေးဇူးတင်တယ်။ ပြီးခဲ့တဲ့အရာတွေကိုလည်း အသက်အရွယ်လည်းရလာတော့ ဒါတွေကဘာမှ မဟုတ်တော့ဘူးဆိုတာ သိသွားပြီ။ ဘယ်လိုပဲဖြစ်ဖြစ် ကိုယ့်ပေါ်ကောင်းခဲ့တယ်တွေးရင် စိတ်သက်သာရာရတယ်လေ။ အကောင်းမြင်စိတ်တွေထားတာ ကောင်းပါတယ် ”လို့ အကယ်ဒမီ ထက်ထက်မိုးဦးက ပြောပါတယ်။
သူမကတော့ ဒါရိုက်တာ ရာဇဝင်ကို ရိုက်ကူးထားတဲ့ “မာယာရထားမောင်းတဲ့ မိန်းမ” ရုပ်ရှင်ဇာတ်ကားကြီးမှာ ရဲရင့်အောင်၊ အိချောပို၊ နန်းဆုဦးနဲ့ ရွှေအိမ်စည်တို့နဲ့ အတူ ပါဝင်ထားတာလည်းဖြစ်ပြီး မကြာခင် ရုံတင်ပြသမှာလည်းဖြစ်ပါတယ်။ ထက်ထက်မိုးဦးကတော့ ငယ်စဉ်က ခက်ခဲတဲ့ လောကဓံကို ကြုံတွေ့ခဲ့ရသူလည်းဖြစ်ပါတယ်။
“ကိုယ်က တစ်ချိန်က မိဘအိမ်မှာမနေခဲ့ရတော့ အဒေါ်တွေအိမ်တွေ သူများအိမ်မှာနေရတော့ ကိုယ်က အလိုက်တသိ ထမင်းဟင်းချက်ကူပေးရတယ်။ အဒေါ်အိမ်မှာ ချက်ပြုတ်ဆိုလည်း ကိုယ်က လိုအပ်တာတွေ မှန်သမျှ လုပ်ကူရတယ်လေ။ ပန်းကန်ဆေးဆိုရင် ဆေးပေါ့ ကိုယ်လုပ်ရင်း အချက်အပြုတ်တွေ ဝါသနာပါသွားတယ်။ ကိုယ်စားချင်တာ ချက်ပြုတ်စားတတ်သွားတာပေါ့။ ဘုန်းဘုန်းတွေကို ကိုယ်တိုင်ချက်ပြုတ်ပြီးမှ ဆွမ်းကပ်လောင်းရတာ သဘောကျတယ်။ ကိုယ့်နယ်မြို့နေရာ ဒေသလေးကို ဒီအချိန် အရမ်းလွမ်းတာပေါ့”လို့ သူမက ဆက်ပြောပါတယ်။
