ထိုင်းနယ်စပ်မှာ မြန်မာဘက်က ကျားဖြန့်ဂိုဏ်းတွေဆီ လူကုန်ကူးခံရတဲ့ တရုတ်နိုင်ငံသူကို ပြန်လည်ကယ်ဆယ်နိုင်ပြီ

၁၄. ၁. ၂၀၂၅
Translated by Thettant

ထိုင်းနိုင်ငံမှာ ဇန်နဝါရီ ၆ ရက်က ပျောက်ဆုံးသွားတဲ့ အသက် ၂၁ နှစ်အရွယ် တရုတ်အမျိုးသမီး Wu Jiaqi ကို ကယ်တင်နိုင်ခဲ့ပြီး တရုတ်နိုင်ငံဆီ ပြန်လည်ရောက်ရှိသွားပြီဖြစ်ကြောင်း ကလေး၊ အမျိုးသမီး၊ မိသားစုများနဲ့ လူကုန်ကူးမှု တားဆီးကာကွယ်ရေး ဗဟိုဌာန ညွှန်ကြားရေးမှူး ရဲဗိုလ်ချုပ်ကြီး သက်ချိုင်း ပီတာနီလာဘတ်က ပြောပါတယ်။

သူမရဲ့ဖခင် Wu Weidong က သူမဟာ သရုပ်ဆောင် Wang Xing (Xingxing) ကို ဖမ်းဆီးခေါ်ဆောင်သွားတဲ့ အလားတူအဖွဲ့ဖြစ်တဲ့ မြန်မာနိုင်ငံဘက်က တရုတ်ကျားဖြန့် အွန်လိုင်းလိမ်လည်မှုဂိုဏ်းတွေက ပြန်ပေးဆွဲခံရတာဖြစ်တယ်လို့လည်း ပြောကြားခဲ့ပါတယ်။

Wu Jiaqi ဟာ သူမရဲ့ မိဘတွေကို မပြောဘဲ သူငယ်ချင်းတစ်ယောက်နဲ့ ထိုင်းနိုင်ငံကို ခရီးထွက်ခဲ့ပါတယ်။ ထိုင်းနိုင်ငံကို ရောက်ရှိလာပြီးနောက် နံနက် ၄ နာရီမှာ မိခင်ကို WeChat ကတစ်ဆင့် ဒွန်မောင်းမြို့ရှိ ဟိုတယ်တစ်ခုမှာ တည်းခိုဖို့ စီစဉ်ထားကြောင်း ပြောခဲ့ပါတယ်။ သူမဟာ တည်နေရာကို မျှဝေခဲ့ပြီးနောက်မှာ မိခင်က မြန်မာနိုင်ငံသို့ မသွားဖို့ သတိပေးခဲ့ပေမဲ့ အဲဒီနေ့နှောင်းပိုင်းမှာတော့ အဆက်အသွယ် ပြတ်သွားလို့ သူမမိသားစုက စိုးရိမ်ပူပန်လာခဲ့ရပါတယ်။

သုဝဏ္ဏဘူမိလေဆိပ်က CCTV မှတ်တမ်းတွေမှာ အဖြူရောင် Alphard ကားတစ်စီးပေါ် သူမတက်သွားပြီး ဟိုတယ်ကို ခေါ်ဆောင်သွားတာကို မြင်တွေ့ရပါတယ်။ သူမက အဲဒီနေရာ မနေဘဲ Lat Krabang မှာ မနက် ၅ နာရီအချိန် ဟိုတယ်ကို Check in ၀င်ခဲ့ပြီး နံနက် ၉ နာရီမှာ Check out လုပ်ကာ အဆက်အသွယ်ပြတ်သွားခဲ့တာပါ။

သူမဟာ မကြာသေးမီကမှ ဘွဲ့ရပြီး နိုင်ငံခြားကို ပထမဆုံးအကြိမ် ခရီးထွက်ခဲ့ဖူးသူပါ။ သူမဟာ လွန်ခဲ့တဲ့လက အွန်လိုင်းမှာတွေ့ခဲ့တဲ့ တရုတ်မိတ်ဆွေတစ်ဦးနဲ့အတူ လိုက်ပါသွားခဲ့တာဖြစ်ပြီး သူမမိသားစုက သူမမိတ်ဆွေကို မသိသလို သူတို့ရဲ့ အဆက်အသွယ်၊ အသေးစိတ်အချက်အလက်တွေလည်း မသိသေးပါဘူး။ လတ်တလော ထိုင်းမြန်မာနယ်စပ်မှာ သူမအပြင် တရုတ်သရုပ်ဆောင် Cingxing နဲ့ တရုတ်မော်ဒယ် Yang Zeqi တို့ပါ ပျောက်ဆုံးထားပြီး Xingxing နဲ့ သူမကို ပြန်လည် ကယ်ဆယ်နိုင်ခဲ့ပေမယ့် ရဲတပ်ဖွဲ့က အသေးစိတ်အချက်အလက်တွေကို မထုတ်ပြန်သေးပါဘူး။