၁၃.၁.၂၀၂၅
Written By Thandar
BL Series တွေကတစ်ဆင့် ပရိသတ်ချစ်ခင်မှုကို ရရှိထားတဲ့ သရုပ်ဆောင် ဇော်ရှိုင်းထက် မွေးနေ့ အကြို အလှူအနေနဲ့ ယနေ့ ဇန်နဝါရီလ ၁၃ ရက်နေ့ နံနက်ပိုင်းက ရန်ကုန်မြို့ ဒဂုံမြို့သစ် (ဆိပ်ကမ်း) မြို့နယ်ရှိ ခက်ခဲနေတဲ့ လူအယောက် ၅၀၀ စာ ထမင်း၊ ဟင်း တချို့လှူဒါန်းခဲ့ပါတယ်။
“ကျွန်တော်ရဲ့ မွေးနေ့ မရောက်သေးပါဘူး။ မွေးနေ့အကြိုအနေနဲ့ လှူတာပါ။ မွေးနေ့က လာမယ့် ဇန်နဝါရီ ၁၅ ရက်မှပါ။ တကယ်လိုအပ်နေတဲ့ နေရာကို ထိထိရောက်ရောက်လေး လှူချင်လို့ အန်တီတာ@အေးသီတာနဲ့အတူ ချိတ်ဆက်ပြီးတော့ ဒဂုံဆိပ်ကမ်း ဘက်မှာ လူအယောက် ၅၀၀ စာ လာလှူဖြစ်တာပါ။ မွေးနေ့မှာ အလှူလေး လုပ်ဖြစ်တာပါ။ Fan Meeting အတွက် စိတ်ရောကိုယ်ပါ အားစိုက်ထားပါတယ်။ ချစ်ရတဲ့ သူတွေနဲ့အတူ မွေးနေ့ပွဲ ကျင်းပခွင့်ရမှာမို့ အရမ်းကိုလည်း စိတ်လှုပ်ရှားနေပါတယ်”လို့ သရုပ်ဆောင် ဇော်ရှိုင်းထက်က ပြောပါတယ်။
အဆိုပါ မွေးနေ့အလှူမှာ ဇော်ရှိုင်းထက်နဲ့အတူ Vitamin ကလည်း ကူညီလှူဒါန်းပေးခဲ့ပြီး ဒဂုံဆိပ်ကမ်းအတွင်းက လူအယောက် ၅၀၀ စာကို ထမင်း၊ကြက်သားအချိုပေါင်း၊ ခရမ်းသီးနှပ်၊ ငံပြာရည်ကြော် ၊ အတို့အစုံတို့ လှူဒါန်းခဲ့ပါတယ်။ လာမယ့် ဇန်နဝါရီ ၁၅ ရက်နေ့မှာ Fan Meeting လုပ်ဖို့လည်း ပြင်ဆင်နေတယ်လို့ သိရပါတယ်။
ဒါ့ပြင် ဒဂုံဆိပ်ကမ်းအတွင်းရှိ အမျိုးသားစွန့်ပစ်သွားတဲ့ ကလေး (၃) ယောက်မိခင်ကိုလည်း ဇော်ရှိုင်းထက် က ကျပ် ၁သိန်း နဲ့ Vitamin က ကျပ် ၁ သိန်းတို့ကို ပါဝင်လှူဒါန်းခဲ့ကြပါတယ်။
