၁၃.၁.၂၀၂၅
Translated by Htwe Ko Tun
ထိုင်းနိုင်ငံ၊ ဘန်ကောက်မြို့မှာ တက္ကစီအငှားယာဉ်မောင်းသူတစ်ဦးက ခရီးသည်တွေပြောတဲ့နေရာကို လိုက်မပို့နိုင်လို့ စကားများကြမှုတစ်ခုအတွင်းမှာ ခရီးသည်တစ်ဦးရဲ့မျက်နှာကို သစ်သီးခွဲတဲ့ဓားနဲ့ လှီးခွဲခဲ့တဲ့ အဖြစ်အပျက်ကို ရိုက်ကူးထားတဲ့ ဗီဒီယိုတွေမှာ တွေ့ခဲ့ကြရပါတယ်။
ဖြစ်ရပ်က ဇန်နဝါရီလ ၁၁ ရက် နံနက် တစ်နာရီလောက်ကဖြစ်ခဲ့တာပါ။ ခရီးသည် အမျိုးသားသုံးဦးနဲ့ အမျိုးသမီးတစ်ဦးပါဝင်တဲ့အုပ်စုက ဆီလောင်မ်(Silom) နယ်မြေမှာ အငှားကားကို ငှားရမ်းစီးနင်းဖို့ တားခဲ့ကြပါတယ်။
ဒီနောက်သူတို့က ကားပေါ်တက်ထိုင်ပြီး သူတို့သွားချင်တဲ့ သုံလော်(Thong Lor) နယ်မြေကို ပို့ပေးဖို့ပြောတဲ့အခါမှာ အငှားကားယာဉ်မောင်းက ယာဉ်ကြောပိတ်ဆို့လို့ လိုက်မပို့နိုင်ဘူးလို့ ငြင်းခဲ့တယ် ဆိုပါတယ်။ ဒီမှာ ခရီးသည်တွေက ကားထဲက ပြန်ထွက်ပြီး ယာဉ်မောင်းကိုမကျေမနပ်ဖြစ်လို့ ကားတံခါးတွေကို တအားရိုက်ပိတ်ခဲ့ကြပါတယ်။
ဒီမှာစိတ်ဆိုးသွားတဲ့ ယာဉ်မောင်းကလည်း ကားထဲကထွက်လာပြီး စကားများခဲ့ကြပါတယ်။ နှစ်ဖက်စလုံးဟာလည်း အရက်သေစာတွေ သောက်စားထားကြတယ်လို့ သိရပြီး အပြန်အလှန်ပြောဆိုကြကာ ယာဉ်မောင်းက ကားထဲက သစ်သီးခွဲတဲ့ဓားကိုယူပြီး အမျိုးသားခရီးသည်တစ်ဦးရဲ့ မျက်နှာကို လှီးခွဲခဲ့တာပါပဲ။
ငါးမိနစ်ခန့်ကြာတဲ့ ဗီဒီယိုထဲမှာတော့ ခရီးသည်အမျိုးသားသုံးဦးကလည်း ယာဉ်မောင်းကို စူးစူးဝါးဝါး အော်ဟစ်ပြီး ကားထဲမှဆွဲထုတ်ပြီးတဲ့နောက် ရိုက်နှက်ခဲ့ကြတာတွေ့ရပါတယ်။ ဒီမှာအနီးအနားက လူတွေက ရန်ပွဲပြီးဖို့ ဝိုင်းဝန်းဖြေရှင်းခဲ့ကြတာပါ။ ရန်ပွဲကို မှတ်တန်းတင်ရိုက်ကူးခဲ့တဲ့ ခရီးသည်အမျိုးသမီး ကတော့ ငယ်သံပါအောင် အော်ဟစ်ပြီး အနားကလူတွေကို ရဲကို ဖုန်းဆက်ပေးဖို့ပြောခဲ့တာပါ။
ဒီနောက်မှာတော့ အငှားယာဉ်မောင်းက တိုက်ခိုက်ခံနေရတုန်းထွက်ပြေးဖို့ ကြိုးစားခဲ့တာပါ။ ဒါပေမယ့် သူကားထဲရောက်ချိန်မှာ အမျိုးသားခရီးသည်တွေက သူ့နောက်ကပါလာပြီးထိုးကြိတ်ကန်ကျောက်ကာ ဓားနဲ့ အခွဲခံရတဲ့ သူတို့သူငယ်ချင်းအတွက် တောင်းပန်ဖို့ပြောခဲ့ကြပါတယ်။
ယာဉ်မောင်းကလည်း မတောင်းပန်နိုင်ဘူးပြောရင်း ကားထဲက မထွက်ဘဲရှိနေချိန်မှာ ရဲတပ်ဖွဲ့ဝင်တွေ ရောက်လာပြီးရန်ပွဲက အပြီးသတ်ခဲ့ရတာပါ။ ယာဉ်မောင်းက ဓားနဲ့လှီးခွဲခဲ့တာကြောင့် ခရီးသည်တစ်ဦး မျက်နှာမှာ ရခဲ့တဲ့ဒဏ်ရာက ၁၀ စင်တီမီတာလောက်ရှည်ပြီး ၃၂ ချက်ချုပ်ခဲ့ရတယ်လို့ သိခဲ့ရပါတယ်
လောလောဆယ်မှာတော့ ဆေားစစ်ဆေးမှုမှတ်တမ်းတွေကိုစောင့်ရင်း ဘယ်သူ့ကိုမှ စွဲချက်တင် အမှုဖွင့် မလုပ်ရသေးပါဘူး။ ရဲတပ်ဖွဲ့ကတော့ နှစ်ဖက်စလုံးကသက်သေထွက်ချက်တွေနဲ့ ဗီဒီယိုတို့ကို ကြည့်ရှုသုံးသပ်နေတယ်လို့ ဆိုပါတယ်။
Ref- Reddit, Bangkok Post
