၉.၁.၂၀၂၅
Written By Zun
မီးစက်ထဲသို့ ဓာတ်ဆီဖြည့်ရာမှ မီးလောင်မှုတစ်ခု မန္တလေးမြို့၊ ချမ်းမြသာစည်မြို့နယ်၊ ၅၉ လမ်း၊ ၁၁၂ လမ်းနှင့် ၁၁၂ (A)လမ်းကြား၊ ကန်သာယာရပ်ကွက်၊ အကွက်အမှတ်(ဖ-၈)၊ အိမ်အမှတ်(၁၇)ရှိ ဆိုင်ကယ်အပိုပစ္စည်းအရောင်းဆိုင်တွင် ယမန်နေ့ ဇန်နဝါရီလ ၈ ရက် ညနေ ၅ နာရီကျော်အချိန်က ဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့က သိရသည်။
ယင်းဆိုင်ရှိ အသက် ၂၇ နှစ်အရွယ် လူငယ်တစ်ဦး မီးစက်အတွင်း ဓာတ်ဆီဖြည့်ရာမှအနီးရှိ မီးဖိုမှတစ်ဆင့် မီးကူးစက်လောင်ကျွမ်းခဲ့ခြင်းဖြစ်ကြောင်း စစ်ဆေးတွေ့ရှိရသောကြောင့် မီးစတင်လောင်ကျွမ်းခဲ့သည့် ဆိုင်ကယ်အပိုပစ္စည်းအရောင်းဆိုင်နှင့် ဆိုင်တွင်းရှိ ဆိုင်ကယ်အပိုပစ္စည်းများအပါအဝင် ဆိုင်နှင့်ကပ်လျက်ရှိသည့် နေအိမ်(၃)လုံးပါ မီးလောင်ပျက်စီး ဆုံးရှုံးခဲ့ကြောင်းသိရသည်။
“ပေါ့ဆမီးဖြစ်ပါတယ်။ အခု ချမ်းမြသာစည်မြို့နယ်၊ အောင်ပင်လယ်နယ်မြေရဲစခန်းမှာ (ပ-၅/၂၀၂၅) ရာဇသတ်ကြီးဥပဒေပုဒ်မ ၂၈၅ နဲ့ အမှုဖွင့်အရေးယူထားပါတယ်”ဟု မီးသတ်တပ်ဖွဲ့တာဝန်ရှိသူက ပြောသည်။
မီးလောင်မှုဖြစ်ပွားသည်ကို Level-1 အဆင့်သတ်မှတ်ကာ မိနစ် ၂၀ ခန့်ကြာ ငြှိမ်းသတ်ခဲ့ရပြီး မီးသတ်တပ်ဖွဲ့ဝင်များနှင့်လူမှုကူညီရေးအဖွဲ့များက မီးငြှိမ်းသတ်ယာဥ်များ၊ ရေသည်ယာဥ်များဖြင့် ဝိုင်းဝန်းမီးငြှိမ်းသတ်ခဲ့ကြရကြောင်း သိရသည်။
