၈.၁.၂၀၂၅
Written By Thandar
သရုပ်ဆောင်ပိုင်းကနေ အနုပညာလောကထဲဝင်ရောက်ခဲ့ပြီး ဂီတလမ်းကြောင်းမှာ မှတ်တိုင်များစွာ စိုက်ထူနိုင်ခဲ့တဲ့ အဆိုတော် ဝိုင်းစုခိုင်သိန်းက “နှစ်ယောက်တည်း တောက်ပမယ်” အချစ်သီချင်းသစ်လေးက ပရိသတ်အကြိုက်စကားလုံးတွေ ဖန်တီးပေးတဲ့ ကိုဟဲလေးကြောင့် ပေါက်သွားတာပါလို့ ဆိုပါတယ်။
“အဓိကတော့ ကိုဟဲ ဖန်တီးထားတဲ့ သီချင်းလေးပါ။ စာသားတွေရော သံစဉ်တွေကအစပေါ့နော်။ ကိုဟဲနဲ့ ဖုန်းဆက်ရင်း မထင်မှတ်ဘဲ တို့တောက်ပကြမယ်ဆိုတဲ့ စကားလုံးထည့်သုံးဖြစ်ကြတယ်လေ။ ဝိုင်းစုကိုယ်တိုင်ကလည်း အချစ်သီချင်းချိုချိုလေးတွေ ဆိုတာနည်းတယ်လို့ ပြောလို့ရတယ်။ ဝိုင်းစုမှာ အချစ်သီချင်းဆိုတာ ရှားတယ်လေ။ တကယ်တော့ ပရိသတ်တွေကြည်နူးကြမယ့် အချစ်သီချင်းလေးပါ။ ချစ်သူရည်းစားမှာ အတိုက်အခိုက်တွေ ရှိကြတယ်လေ။ လက်တွဲမဖြုတ်ဘူး ဂရုစိုက်မစိုက်ဘဲသွားမယ်ဆိုတဲ့ ပုံစံလေးပါ”လို့ အဆိုတော် ဝိုင်းစုခိုင်သိန်းက ပြောပါတယ်။
သူမကတော့ အဆိုတော် ဟဲလေးနဲ့အတူ စုံတွဲသီချင်းမထွက်ဖြစ်တာ ဆယ်စုနှစ် တစ်ခုကျော်လောက်ရှိလာပြီမို့ နှစ်ယောက် သီချင်းသစ်တစ်ပုဒ်ကို ထွက်ရှိလိုက်တာလို့လည်း သိရပါတယ်။ ဝိုင်းစုခိုင်သိန်းနဲ့ ဟဲလေးကတော့ တေးသီချင်းတွေ သီဆိုဖျော်ဖြေကြတဲ့ ပွဲတိုင်းလိုလို နှစ်ယောက်က အများဆုံး ဆုံတွေ့ဖြစ်တယ်လို့ သိရပါတယ်။
“တချို့ပွဲတွေဆိုရင် ပရိသတ်က မှားပြီနော် သီချင်းပဲတောင်းကြတာများလို့လေ။ ပရိသတ်တွေကို နည်းနည်း တောက်ပကြမယ် သီချင်းလေးကို နားထောင်စေချင်လို့ အသစ်ဖန်တီးဖြစ်ကြတာပါ။ အတွဲလည်း ညီကြတာဆိုတော့ ပံ့ပိုးပေးကြတာပါ။ စကားလုံးတွေကလည်း ခေတ်နဲ့အညီ စကားလုံးလေးတွေပေါ့။ ပရိသတ်တွေ အကြိုက်တွေ့စေတာပါ။ ကိုဟဲရေးတဲ့ စကားလုံးတွေက ကောင်းတာမို့ ပေါက်တာပါ”လို့ သူမက ဆက်ပြောပါတယ်။
သူမက Melo Application က ပေးဆုအနေနဲ့ Melo Most Played 2024 အသည်းကွဲရက်ရာဇာ သီချင်းနဲ့ ဒီနှစ်ရရှိခဲ့သူလည်းဖြစ်ပါတယ်။ အဆိုတော်ဟဲလေးကလည်း နှလုံးသားရဲ့ နေရာတိုင်းမှာ၊ ချစ်တိုင်းလည်းမညား သီချင်း ၂ ပုဒ်နဲ့ Melo Most Played 2024 ဆုကို ရရှိထားပါတယ်။ ဟဲလေးနဲ့ ဝိုင်းစုခိုင်သိန်း စုံတွဲအနေနဲ့ မှားပြီနော်၊ ငါ့အိပ်မက်နဲ့ ဟဲလေးရဲ့ တစ်ကိုယ်တော်ခွေထဲက တစ်ပုဒ်အပြင် နှစ်ယောက်တည်းတောက်ပမယ် သီချင်းကတော့ ၄ ပုဒ်မြောက်အတွဲ သီဆိုခဲ့ကြတာလည်းဖြစ်တယ်လို့ ဆိုပါတယ်။
#ဟဲလေး #ဝိုင်းစုခိုင်သိန်း
#HeLay #WineSuKhaingThein
#နှစ်ယောက်တည်းတောက်ပမယ်
#MyanmarSinger #MyanmarCele
