၇.၁.၂၀၂၅
Translated by Htwe Ko Tun
ဟောလီးဝုဒ်ရဲ့ နာမည်ကြီးသရုပ်ဆောင်နှစ်ဦးအတွက်တော့ ၂၀၂၅ ခုနှစ်ကတော့ စေ့စပ်ကြောင်းလမ်းခြင်းနဲ့အတူ စတင်ခဲ့တာကြောင့် မင်္ဂလာရှိတဲ့နှစ်သစ်လို့ပဲ ဆိုရမှာပါ။ သူတို့နှစ်ဦးကတော့ Spiderman ဇတ်ကားမှာ အဓိက တွဲဖက်သရုပ်ဆောင်တွေအနေနဲ့ပါဝင်ခဲ့ကြတဲ့ ဇန်ဒါရာ (Zendaya) နဲ့ တွမ်ဟော်လန် (Tom Holland) တို့ပါပဲ။
အမေရိကန်ပြည်ထောင်စုရဲ့ သတင်းစာစောင်တွေက သူတို့နှစ်ဦးဆက်ဆံရေးက တစ်ဆင့်တက်ပြီး စေ့စပ်ကြောင်းလမ်းမှုပြုခဲ့ကြတယ်ဆိုတာ ဖော်ပြခဲ့ကြပါတယ်။ ဇန်နဝါရီလ ၅ ရက်က ကယ်လီဖိုးနီးယားမှာ ကျင်းပခဲ့တဲ့ ၈၂ ကြိမ်မြောက်ရွှေကမ္ဘာလုံးဆုပေးပွဲမှာ ဇန်ဒါရာက ဘယ်ဘက်လက်သူကြွယ်မှာ စိန်လက်စွပ်တစ်ခု ဝတ်ဆင်လာခဲ့အပြီးမှာတော့ ဒီသတင်းကလည်း ထွက်ပေါ်လာခဲ့ပါတယ်။
TMZ မီဒီယာမှာတော့ ဒါက ခရစ္စမတ်နဲ့ နှစ်သစ်ကူးကာလအတွင်း အမေရိကန်ပြည်ထောင်စုမှာရှိတဲ့ ဇန်ဒါရာရဲ့မိသားစုအိမ်တွေထဲကတစ်ခုမှာ တွမ်က ဇန်ဒါရာကို ချစ်ခွင့်ပန်တဲ့အထိ ရင်းရင်းနှီးနှီးရှိခဲ့ကြတယ်ဆိုတာ ဖော်ပြတာပဲလို့ ဆိုခဲ့ပါတယ်။ မီဒီယာက အဲဒီအချိန်က ဇန်ဒါရာရဲ့ မိသားစုက အိမ်မှာမရှိကြဘဲ သူတို့ နှစ်ဦးသာရှိခဲ့ကြလို့ ကြည်နူးပျော်ရွှင်ဖွယ် ကာလဖြစ်ခဲ့ကြရတယ်လို့ ဖော်ပြခဲ့ပါသေးတယ်။
People စာစောင်ကလည်း တွမ်အနေနဲ့ ဇန်ဒါရာကို သိပ်မကြာခင်မှာဘဲ ချစ်ခွင့်ပန်တော့မယ်လို့ ရေးခဲ့ပြန်ပါတယ်။ သူတို့နဲ့ ရင်းနှီးတဲ့သူတိုင်းကတော့ စေ့စပ်ကြောင်းလမ်းမှုပြုတော့မယ်ဆိုတာ သိနေကြပါတယ်။ တွမ်က ဇန်ဒါရာနဲ့ ပတ်သက်လို့ အရူးအမူးလည်းဖြစ်ခဲ့ရတယ်။ သူ့အဖို့က ဒီတစ်ယောက်ထဲရှိတယ်ဆိုတာ ပြခဲ့တာပဲလို့ ဖော်ပြခဲ့ပြန်ပါသေးတယ်။
ဒါပေမယ့် သူတို့နှစ်ဦးရဲ့ လက်ထပ်ထိမ်းမြားမယ့်ရက်အတွက်တော့ ဘာမှ ပြောကြားသံမကြားရသေးပါဘူး။ နှစ်ဦးစလုံးကလည်း လောလောဆယ်တော့ အလုပ်တွေနဲ့ မအားမလပ်ဖြစ်နေကြရလို့ မင်္ဂလာပွဲအတွက်တော့ အလောသုံးဆယ်ဆောင်ရွက်မှာမဟုတ်ဘူးလို့ People က ဆိုပါတယ်။
ဒီသတင်းတွေထွက်ပေါ်နေပေမယ့် မှန်ကန်မှုရှိမရှိကိုသူတို့နှစ်ဦးရဲ့ အတည်ပြုချက်တော့ လိုမှာပါ။ ဒါပေမယ့် နာမည်ကျော် Spiderman ဇတ်ကားမှာ လွန်ခဲ့တဲ့ကိုးနှစ်က ပါဝင်သရုပ်ဆောင်ခဲ့ကြတဲ့ ဟောလီးဝုဒ်သရုပ်ဆောင်နှစ်ယောက်ကတော့ ၂၀၂၅ နှစ်သစ်ကို စေ့စပ်ကြောင်းလမ်းခြင်းနဲ့ စတင်ခဲ့ကြပြီလို့ အမေရိကန်မီဒီယာတွေက ဖော်ပြနေကြပါပြီ။
Ref- Gmannetwork
