ရွှေပြည်သာမှာ ဒီနေ့မနက်က လူနေအ​ဆောင်မီးလောင်မှု အမျိုးသမီးတစ်ဦးသေဆုံး

၇.၁.၂၀၂၅
Written by Hey Mar

ရွှေပြည်သာမြို့နယ်၊ အမှတ် (၅)ရပ်ကွက်မှာ ဒီနေ့ ဇန်နဝါရီလ ၇ ရက်နေ့ မနက်အစောပိုင်းက ပုဂ္ဂလိကငှားရမ်းတဲ့ အဆောင်ဝန်းမီးလောင်ခဲ့ပြီး အမျိုးသမီးတစ်ဦး မီးလောင်သေဆုံးခဲ့တယ်လို့ မီး‌လောင်ပြင်သွားရောက်ကူညီခဲ့တဲ့ ဒေသခံ လူမှုကူညီရေးအသင်းထံကနေ သိရပါတယ်။

ဖြစ်စဉ်က မနက် ၄ နာရီ မိနစ် ၅၀ အချိန်မှာ ရန်ကုန်တိုင်းဒေသကြီး၊ ရွှေပြည်သာမြို့နယ်၊ (၅)ရပ်ကွက်၊ သီရိမင်္ဂလာပတ်လမ်းရှိ အဆောင်မှာ မနက်အစော ငါးခြောက်ကြော်ရာက ဒယ်နီအိုးရှော့ဖြစ်ပြီး စတင်လောင်ကျွမ်းတာလို့လည်း ဖြစ်စဉ်အနီး နေထိုင်သူ ရွှေပြည်သာမြို့နယ် အမှတ် (၅)ရပ်ကွက် ဒေသခံတစ်ဦးက MT News ကို ပြောပါတယ်။

သူက “လောင်တဲ့ဝန်းက အဆောင်ဆောက်ငှားတဲ့ဝန်း။ သစ်သား နှစ်ထပ်ဆောင်တွေ၊ ဝန်းထဲမှာတင် အဆောင်တွေက တစ်ဆောင်နဲ့ တစ်ဆောင်ကပ်နေတာ။ အခန်းဘယ်နှစ်ခန်းမှန်းမသိပေမယ့် အဆောင်တန်းလျားက ၄ လုံးရှိတယ်။ ဝန်းကျယ်ကြီး။ သူ့အဆောင်ရှေ့မှာက သစ်ဆိုင်။ ဘေးနှစ်ဖက်မှာ စားအုန်းဆီသိုလှောင်တဲ့ ဂိုဒေါင်ရယ်၊ အရက်ဆီလှောင်တဲ့ ဂိုထောင် ရှိတယ်။ ကံကောင်းတာက မီးသတ်က မီးမကူးအောင် ထိန်းနိုင်တာ” လို့ ဖြစ်စဉ်ကို မျက်မြင်တွေ့ရတဲ့ အခြေအနေကို ပြောပြပါတယ် ။

အဆိုပါမီးလောင်မှုဖြစ်စဉ်ကို ရွှေပြည်သာမြို့နယ် မီးသတ်တပ်ဖွဲ့နဲ့အတူ ကနောင် နာကူ ရှင်ကူအသင်းတို့က ပထမဆုံးရောက်ရှိကူညီငြှိမ်းသတ်ခဲ့ပြီး မီးများတဲ့အတွက် Level-1 အဆင့်ခေါ်ယူရာ မြို့နယ်ချင်းဆက်စပ်နေတဲ့ မီးသတ်စခန်းတွေက မီးသတ်ယာဉ်နဲ့ အထောက်အကူပြုယာဉ်အပါအဝင် အစီးသုံးဆယ်နီးပါးက တစ်နာရီကျော်ကြာ ဝိုင်းဝန်းကူညီ ငြှိမ်းသတ်ခဲ့ရတယ်လို့လည်း သိရပါတယ်။

ကနောင် နာကူ /ရှင်ကူ အသင်းမှတာဝန်ရှိသူက “မီးငြိမ်းသွားလို့ လောင်ပြင်ထဲ ဝင်ရှင်းမှ အမျိုးသမီးလို့ ယူဆရတဲ့ ပုံပန်းပျက်နေပြီဖြစ်တဲ့ အလောင်းတွေ့တာ။ အဆောင်ဆိုတော့ လူတွေလည်းများတော့ စိစစ်နေဆဲပါပဲ။ ပေနှစ်ရာလောက်ကျယ်တဲ့ဝန်းထဲက သစ်သားအဆောင်တွေဆိုတော့ လောင်အားကောင်းသွားတာပါ။ တစ်ဝန်းလုံးရှိတဲ့ အဆောက်အဦ အကုန်ကုန်တာမို့၊ အခုထိတော့ သက်ဆိုင်ရာက စိစစ်တွေ့ရှိတာ သေဆုံးတစ်ဦးပါပဲ” လို့ MT News ကို ပြောပါတယ်။

မီးလောင်မှုကို မနက် ၆ နာရီမှာ မီးထိန်းနိုင်ခဲ့ပြီး ၆ နာရီ ၁၉ မိနစ်အချိန်မှာ မီးငြိမ်းခဲ့ကာ သက်ဆိုင်ရာက လောင်ကျွမ်းမှုဖြစ်စဉ်နဲ့ ဆုံးရှုံးမှု တန်ဖိုးကို စိစစ်‌နေဆဲလို့သိရှိရပါတယ်။