၆.၁.၂၀၂၅
Written By Thandar
Mahar Original Series က တင်ဆက်ပြသမယ့် ရိုမန့် အိမ်ထောင်ရေးဇာတ်လမ်းပုံစံ “ညှို့”ဇာတ်လမ်းတွဲ Press Conference Show ကို ယနေ့ ဇန်နဝါရီ ၆ ရက် နံနက် ၁၀ နာရီခွဲက ရန်ကုန်မြို့ မင်္ဂလာတောင်ညွန့်မြို့နယ်ရှိ Kantheryar Shopping Mall ရှိ Rangoon Cineplex မှာ ကျင်းပခဲ့ပါတယ်။
ဒီဇာတ်ကားမိတ်ဆက်ပွဲကိုတော့ ညှို့ ဇာတ်လမ်းတွဲကို ပုံဖော်ထားကြတဲ့ ဒါရိုက်တာ အောင်ချမ်းလူ၊ ကျော်ထက်အောင်၊ မင်းအာကာ၊ ဒေါင်းဝေ၊ အောင်လွင်မိုး၊ မြတ်သူရိန်ကျော်၊ ဇင်ဇင်ဇော်မြင့်၊ ခင်သဇင်၊ ထက်ထက်ထွန်း၊ အေးသီတာ စတဲ့သူတွေ တက်ရောက်ခဲ့ကြပါတယ်။
“ဒီဇာတ်ကားက လောင်ရမယ့် ကားလို့ထင်ရပေမယ့် တကယ်တော့ အိမ်ထောင်ရေးဇာတ်လေးဆိုတော့ ပရိသတ်တွေ စိတ် ဝင်စားစရာကောင်းတဲ့ ဇာတ်လေးမို့ ကျွန်တော့်လက်ခံရိုက်ကူးဖြစ်တာပါ။ ကျွန်တော့်အနေနဲ့ ဇာတ်ကားရိုက်ကူးမှုတောက်လျှောက်မှာ Actor အများကြီး ရိုက်ရတာ အမှတ်တရပါ။ အိမ်ထောင်သည်တွေ တကယ်ကြည့်သင့်တဲ့ ကားလေးပါ”လို့ ဒါရိုက်တာ အောင်ချမ်းလူက ပြောပါတယ်။
ဒီဇာတ်လမ်းတွဲကိုတော့ ဇာတ်လမ်း ညမွှေးပန်း၊ ဇာတ်ညွှန်းပိုင်းကို ညမွှေးပန်း၊ Star Ria နဲ့ မုဒြာတို့က ရေးသားထားပြီးတော့ ဒါရိုက်တာ အောင်ချမ်းလူက သရုပ်ဆောင်တွေဖြစ်တဲ့ ကျော်ထက်အောင်၊ ထွန်းကိုကို၊ ဗညားဘုန်းပြည့်၊ မင်းအာကာ၊ ဇင်ဇင်ဇော်မြင့်၊ ထက်ထက်ထွန်း၊ ခင်သဇင်၊ ဒေါင်းဝေ၊ ရဲရင့်စည်သူအောင်၊ အောင်လွင်မိုး၊ မြတ်သူရိန်ကျော်၊ အေးသီတာ၊ ဝင့်နေရည်လင်း ၊ ပိုဟေသာဟန်၊ Khisa Kim တို့က ပါဝင်ထားကြတာလည်းဖြစ်ပါတယ်။
“မေလေးက ဒီဇာတ်ကားထဲက အိန္ဒြေခင်ကာရိုက်တာက အပြင်ကလိုပါပဲ။ သူငယ်ချင်းတွေကို အရမ်းချစ်ခင်တတ်တဲ့သူပေါ့။ ဒီကားနဲ့ အတူတူပါပဲ။ ဒီဇာတ်ကားမှာ အမှတ်တရတွေလည်း များပါတယ်” လို့ သရုပ်ဆောင် ဇင်ဇင်ဇော်မြင့်ကပြောပါတယ်။
အပိုင်း ၁၆ ပိုင်းပါဝင်တဲ့ “ညှို့” ဇာတ်လမ်းတွဲကို Mahar Application က ဇန်နဝါရီ ၁ ရက်နေ့က စတင်ပြီး တနင်္လာနေ့ကနေ သောကြာနေ့အထိ ည ၇ နာရီတိုင်းမှာ စတင်ထုတ်လွှင့်ပြသနေတာလည်းဖြစ်ပါတယ်။
