၆.၁.၂၀၂၅
Written By Thandar
အနုပညာအလုပ်တွေကို တစိုက်မတ်မတ်လုပ်ဆောင်လာတဲ့ သရုပ်ဆောင် ထက်ထက်ထွန်းက နှစ်စဉ် အတိုက်အခိုက်တွေ ကြုံရတာတွေ ရှိတာမို့ ကြုံလာတဲ့အခက်အခဲ ရင်ဆိုင်ပြီး အကောင်းဆုံးကြိုးစားသွားမယ်လို့ ဆိုပါတယ်။
“၂၀၂၄ ခုနှစ်ကတော့ ထက်အတွက် ဝေဖန်တိုက်ခိုက်မှုတွေ ကြုံရတာပါပဲ။ နောက်နှစ်မှာလည်း ဝေဖန် အတိုက်အခိုက်ကတော့ ကြုံရမယ်လို့လည်း ယုံကြည်ပါတယ်။ ဒီအတိုက်အခိုက်တွေက ထက်ပြန်ရုန်းပြီး ပြန်ထနိုင်မယ်လို့ ယုံကြည်ပါတယ်။ ဒီကာလမတိုင်ခင်ကတည်းကရော ၂၀၂၄ မတိုင်ခင်မှာရော တစ်ချိန်လုံး ရုန်းထနိုင်ဖို့ အားပေးကြတဲ့သူတွေကြောင့်ပါ။ ထက်ကို နှုတ်အားရော စိတ်အားဖြင့်ရော ထက်ကို ကူညီပေးသူတွေကို ထက် ကျေးဇူးတင်ပါတယ်။ ဆက်ပြီး အကောင်းဆုံးရပ်တည်နိုင်အောင် ကြိုးစားနေပါတယ်။ အတိုက်အခိုက်ကတော့ ထက် အတွက် နှစ်တိုင်းက ရှိနေတာပါ။ ထက်အနေနဲ့ အခက်အခဲကြုံတိုင်း အမြဲရင်ဆိုင်လိုက်တယ်။ ထွက်ပြေးတာ ကိုယ့်အတွက် ခွန်အားမဟုတ်ဘူးလေ” လို့ သရုပ်ဆောင် ထက်ထက်ထွန်းက ပြောပါတယ်။
သူကတော့ အနုပညာအလုပ်တွေကို ကာရိုက်တာပိုင်းတွေကို ကိုယ့်အတွက် အကောင်းဆုံး ကြိုးစားလုပ်ဆောင်နေတယ်လို့ဆိုပါတယ်။ ပုံမှန်သွားနေတဲ့ လမ်းကြောင်းကနေ ထိုးဖောက်ပြီး လုပ်နိုင်အောင်လည်း ကြိုးစား လုပ်ဆောင်ဖို့ ရှိတယ်လို့ ဆိုပါတယ်။ ညှို့ ဇာတ်လမ်းတွဲနဲ့ ငါ့ဘုရင်မ ဇာတ်လမ်းတွဲတွေ ရိုက်ကူးထားတယ်လို့လည်း သိရပါတယ်။
“၂၀၂၅ မှာ ကိုယ့်အပေါ်မကောင်းဘဲ ဟန်ဆောင်တဲ့သူတွေကို ရဲရဲဝံ့ဝံ့ အားမနာတမ်း ပြောတတ်တဲ့သူ တစ်ယောက်ဖြစ်ချင်တယ်။ အပေါ်ယံပေါင်းနေသူတွေကို စိတ်ထဲက ထုတ်လိုက်မယ်လို့ လိုင်းပေါ်မှာလည်း ရေးထားဖြစ်တယ်လေ။ ဟန်ဆောင်ကောင်းနေတဲ့သူတွေကို စိတ်ထဲကနေ ထုတ်ပစ်ချင်တယ်။ ကိုယ့်ဘက်က အစစ်အမှန်တွေပေးပြီး ကိုယ်ပဲပင်ပန်းရတာဖြစ်လို့ ဖြစ်နိုင်ရင် မပေးတော့ဖို့ ဆုံးဖြတ်ချက်ချထားတယ်။ အားမနာတတ်အောင် ကြိုးစားနေပါတယ်”လို့ သူမက ဆက်ပြောပါတယ်။
