ထိုင်းနိုင်ငံသို့ တရားမဝင် ဝင်ရောက်ရန်ကြိုးပမ်းသော မြန်မာရွှေ့ပြောင်းအလုပ်သမား ၂၄ ဦးနှင့်အတူ ထိုင်းနိုင်ငံသား ၂ ဦးကို ထိုင်းရဲတပ်ဖွဲ့ ဖမ်းဆီး

၅.၁. ၂၀၂၅
Written by Shwe Phyo

ထိုင်းရဲတပ်ဖွဲ့သည် မြန်မာနိုင်ငံ၊ မြဝတီမြို့မှ ထိုင်းနိုင်ငံသို့ တရားမဝင် ဝင်ရောက်ရန် ကြိုးပမ်းသော မြန်မာနိုင်ငံသား ၂၄ ဦးနှင့်အတူ ၎င်းတို့ကို ခေါ်ဆောင်လာသော ၂၂ ဘီးကားသမား နှစ်ဦးကို ဇန်နဝါရီ ၄ ရက်နေ့တွင် ဖမ်းဆီးခဲ့ကြောင်း သတင်းထုတ်ပြန်လိုက်သည်။

ထိုင်း ရဲတပ်ဖွဲ့သည် မဲဆောက်မြို့ Huai Ya U အရပ်ဒေသတွင် ကားများကို ရပ်တန့်စစ်ဆေးချိန်အတွင်း၂၂ ဘီးကား နောက်ပိုင်းတွင် ပုန်းအောင်း လိုက်ပါလာသော မြန်မာရွှေ့ပြောင်းအလုပ်သမားများကို ဖမ်းဆီးရမိခဲ့ခြင်းဖြစ်ကြောင်း သိရသည်။

အဆိုပါ ၂၂ ဘီးကားကို တာပေါ်လင်ဖြင့်အုပ်ပြီး မောင်းနှင်လာခြင်းဖြစ်ကာ တက်ခ်ပြည်နယ်ကို ဦးတည်မောင်းနှင်လာချိန်တွင် လမ်းတွင် ဖမ်းဆီးရမိခဲ့ခြင်းဖြစ်ကြောင်း သိရသည်။ တရားမဝင် ရွှေ့ပြောင်းသွားလာသူများကို မိခင်နိုင်ငံအတွင်းသို့ ခေါ်ဆောင်လာခြင်းကြောင့် အသက် ၂၃ နှစ်အရွယ်ရှိ ထိုင်းနိုင်ငံသား ဆူရာပစ်နှင့်အသက် ၂၁ နှစ်အရွယ်ရှိ ဝါရာပွန်တို့ နှစ်ဦးကိုလည်း ဖမ်းဆီးရမိခဲ့ကြောင်း ထိုင်းရဲတပ်ဖွဲ့က ပြောသည်။

ဖမ်းဆီးခံရသော ထိုင်းနိုင်ငံသား ၂ ဦးက ၎င်းတို့သည် တရားမဝင် ရွှေ့ပြောင်းသွားလာသူများကို ပို့ဆောင်ပေးသည့် လုပ်ငန်းတွင်ပါဝင်ဆက်နွှယ်မိပြီး ကီအမည်ရှိ လူတစ်ဦးထံမှ ငွေကြေးများကို ရယူကာ မြန်မာနိုင်ငံသားများကို ထိုင်းနိုင်ငံဘက်ခြမ်းသို့ ခေါ်ဆောင်လာခြင်းဖြစ်ကြောင်း Kamphaeng Phet ပြည်နယ်သို့ အောင်မြင်စွာ ပို့ဆောင်ပေးနိုင်မည်ဆိုလျှင် တစ်ဦးအတွက် ဘတ်ငွေ ၃၀၀၀ လက်ခံရရှိမည်ဖြစ်ကြောင်း ဝန်ခံပြောဆိုထားသည်။

ထိုင်းအာဏာပိုင်များသည် လက်ရှိအချိန်တွင် ဖမ်းဆီးရမိသော မြန်မာရွှေ့ပြောင်းအလုပ်သမားများကို ကျန်းမာရေးစစ်ဆေးမှုများအပါအဝင် အသေးစိတ်စစ်ဆေးခြင်းများလုပ်ဆောင်ထားပြီး ထိုင်းနိုင်ငံအတွင်းသို့ တရားမဝင် ဝင်ရောက်ရန်ကြိုးပမ်းမှုဖြင့် စွဲချက်တင်သွားမည်ဖြစ်ကြောင်း သိရသည်။ ဖမ်းဆီးရမိသော မြန်မာနိုင်ငံသားအများစုသည် ထိုင်းနိုင်ငံနှင့်နယ်စပ်ချင်းထိစပ်နေသော မြဝတီမြို့တွင်နေထိုင်သူအများစုဖြစ်ကြောင်း သိရသည်။

REf Thailandnews