◾ KNLA ထိပ်ပိုင်းခေါင်းဆောင်များ KTLA က ထပ်မံလုပ်ကြံမည်ကို ကြောက်ရွံ့စိုးရိမ်လာနေကြ
၄. ၁.၂၀၂၄
Written by Nay Moe
မြိတ်-ထားဝယ်ခရိုင် ထားဝယ်-ထီးခီးလမ်းပိုင်းမှာ ဇန်နဝါရီ ၃ ရက်နေ့က ကရင်လက်နက်ကိုင်အဖွဲ့တွေဖြစ်တဲ့ ကော်သူးလေအာမီ(KTLA)နဲ့ ကရင်အမျိုးသားလွတ်မြောက်ရေးတပ်မတော်-KNLA တို့ကြား ပစ်ခတ်မှုထပ်မံဖြစ်ပွားခဲ့လို့ KNLA က ဒုတပ်ခွဲမှူးတစ်ဦးသေဆုံးပြီး တပ်သားတစ်ဦး ထိခိုက်ဒဏ်ရရှိခဲ့တယ်လို့ KNU ထိန်းချုပ်မီဒီယာ KIC က ဖော်ပြလာပါတယ်။
KTLA က ပြီးခဲ့တဲ့နှစ် ဒီဇင်ဘာ ၈ ရက်မှာ KNLA၊ တပ်ရင်း(၁၂)၊ တပ်ခွဲ(၄)က ဒုတပ်ခွဲမှူးစောဖားဂျိုးကို ပစ်ခတ်ဖမ်းဆီး သတ်ဖြတ်ခဲ့သလို ၂၀၂၃ ခုနှစ် ဇူလိုင်လအတွင်းကလည်း KTLA က KNLA ကားကို ပစ်ခတ်လို့ KNLA ရဲ့ စစ်ဘက်ရေးရာ ကွပ်ကဲရေးမှူး ဗိုလ်မှူးစောဖိုးစီနဲ့ တစ်ယောက်သေပြီး ၅ ဦးထိခိုက်ဒဏ်ရာရမှုလည်း ဖြစ်ပွားခဲ့ပါသေးတယ်။ KNU/KNLA ကလည်း ဒီဇင်ဘာ ၁၈ ရက်နေ့မှာ KTLA တပ်ဖွဲ့ဝင် ၃ ဦးကို သတ်ပြီး ၁၄ ဦးကို ဖမ်းဆီးခဲ့သလို လက်နက် ၁၇ လက်ကိုလည်း သိမ်းဆည်းပါတယ်။
အဲဒီဖြစ်စဥ်အပြီး KNLA ကို KTLA က ပြန် လက်စားချေမှုအဖြစ် မနေ့က နေ့လယ် ၁၁ နာရီခွဲခန့်မှာ KNLA တပ်ရင်း(၁၀) က ဒုခွဲမှူး ဗိုလ်စောလားဒိုအပါအဝင် တပ်ဖွဲ့ဝင် (၉)ဦးပါဝင်တဲ့အဖွဲ့က မော်တော်ယာဥ်နဲ့ ဆေးခန်းပြဖို့ ထွက်လာချိန် KTLA လက်အောက်က ကော်လာဖိုး(ခ) စောအယ်ခွီးအဖွဲ့က ချောင်းမြောင်း ပစ်ခတ်လို့ ဒုခွဲမှူးစောလားဒိုသေဆုံးပြီး တစ်ဦးဒဏ်ရာရရှိခဲ့တာပါ။
ဒါ့အပြင်“ဗိုလ်လားဒိုက သူ့တပည့်နေမကောင်းလို့ သူကိုယ်တိုင် ဆေးခန်းလိုက်ပို့တာ။ တပ်ရင်း (၁၀)ကနေ သူများဘက်ရောက်တော့ အပစ်ခံရတယ်။ သူလည်းသေတယ်။ သူ့တပည့် တစ်ယောက်လည်း ဒဏ်ရာရတယ်။ ပါသွားတဲ့ နှစ်ယောက်က ပျောက်နေတုန်း၊ အခုထိရှာလို့ မတွေ့သေးဘူး။ ကျန်တဲ့လူတွေကတော့ နေရာပြန်ရောက်ပြီ။” လို့ တပ်မဟာ(၄) KNLA တာဝန်ရှိသူက ပြောတယ်လို့ KIC က ဖော်ပြပါတယ်။
ပစ်ခတ်မှုဖြစ်ပွားခဲ့တဲ့ ထားဝယ်-ထီးခီးလမ်းပိုင်းပေါ် တပ် စခန်းချနေထိုင်တာမရှိဘဲ KNLA နဲ့ KTLA တို့ပဲ လှုပ်ရှားသွားလာနေတဲ့ နေရာဖြစ်ပြီး အခုလို ဖြစ်လာတဲ့အတွက် KNLA တပ်မဟာ(၄) ထိပ်ပိုင်းခေါင်းဆောင်တွေ သွားလာရေးမှာ စိုးရိမ်နေရတဲ့ အနေအထားဖြစ်လာတယ်လို့လည်း KNLA တပ်မဟာ(၄) တာဝန်ရှိသူက ဆက်လက်ပြောပါတယ်။
Ref & Photo – KIC
ပုံစာ။ သေဆုံးသည့် KNLA ခွဲမှုးနဲ့ ဒဏ်ရာရသူမြင်ကွင်း။
