မွေးနေ့အထိမ်းအမှတ်အနေနဲ့ ရုပ်ရှင်လောကသားတွေကိုလှူဒါန်းဖို့ ငွေကျပ် သိန်း ၅၀ ပါဝင်ကုသိုလ်ပြုခဲ့တဲ့ အိချောပို

၃.၁.၂၀၂၅
Written By Thandar

ပရိသတ်ချစ်ခင်မှုများစွာ ရရှိထားတဲ့ သရုပ်ဆောင် အိချောပိုရဲ့ ယနေ့ကျရောက်တဲ့ မွေးနေ့အထိမ်းအမှတ်အနေနဲ့ ၁၆ ကြိမ်မြောက် မြန်မာနိုင်ငံရုပ်ရှင်အစည်းအရုံးက ဆန်၊ ဆီ လှူဒါန်းမှုမှာ ကျပ်သိန်း ၅၀ ပါဝင် လှူဒါန်းခဲ့ပါတယ်။

“စူစူ့အနေနဲ့ မွေးနေ့အထိမ်းအမှတ်အနေနဲ့ ရုပ်ရှင်အစည်းအရုံးကို လှူဖို့ပြောထားတာလည်းကြာပြီလေ။ ကိုယ့်လောကသားတွေအတွက် တစ်ဖက်တစ်လမ်းကပေါ့။ အများကြီးတော့ မဟုတ်ပါဘူး။ တတ်နိုင်သလောက် အထောက်အကူလေးဖြစ်အောင် ပါဝင်လှူဖြစ်တာပါ။ Fan တွေနဲ့ မွေးနေ့လုပ်တာလည်း သတိရပါတယ်။ ဒီနှစ်က Izzy သမီးလေး မေမေဖြစ်သွားပြီလေ။ အမေဖြစ်သွားတော့လည်း ကောင်းပါတယ်။ Surprise မွေးနေ့လက်ဆောင်လည်း ရပြီးပါပြီ။ မွေးနေ့ကတော့ တစ်နှစ် ထက် တစ်နှစ်ကြီးလာမှာပဲလေ။ ရင့်ကျက်လာပြီးတော့ ကိုယ့်အတွေးအခေါ်တွေ အားလုံး ရင့်ကျက်တည်ငြိမ်လာတယ်။ ပြောင်းလဲလာရမယ်ဆိုတော့လေ။ ချစ်ရတဲ့ပရိသတ်တွေအားလုံးကို ကျေးဇူးတင်ပါတယ် ”လို့ သရုပ်ဆောင် အိချောပိုက ပြောပါတယ်။

သူမကတော့ မွေးနေ့အမှတ်တရအနေနဲ့ ခင်ပွန်းဖြစ်သူနဲ့အတူ အလှူအတန်းလေး လုပ်ခွင့်ရလို့လည်း ပီတိဖြစ်ရတယ်လို့ ဆိုပါတယ်။ အိချောပိုကတော့ ယခင်နှစ်တွေက မွေးနေ့ပွဲတချို့မှာ အလှူအတန်းတွေလုပ်ရင်း ဖြတ်သန်းခဲ့သူလည်းဖြစ်ပြီး Fan တွေနဲ့ တစ်ရက်ဆုံဖြစ်ဖို့ရှိတယ်လို့ ဆိုပါတယ်။