၂.၁.၂၀၂၄
Written By Thandar
ထိတ်လန့်ခြောက်ခြားစရာ Horror ဇာတ်လမ်းပုံစံ “ရုက္ခခေါင်းလောင်း” ဇာတ်လမ်းတွဲ ကန်တော့ပွဲပေးပွဲအခမ်းအနားကို ယနေ့ ဇန်နဝါရီ ၂ ရက်နေ့ နံနက်ပိုင်းက ရန်ကုန်မြို့ သီရိမင်္ဂလာကမ္ဘာအေးစေတီတော်မှာ ကျင်းပခဲ့ပါတယ်။
“ဒီဇာတ်ကားကတော့ ဇာတ်လမ်းတွဲပေါ့။ Fortune ကနေပြမှာပါ။ အထက်လမ်းတို့ အောက်လမ်းတို့ပေါ့။ စုန်းကားလို Horror ပုံစံဇာတ်လမ်းပါ။ ဒီကားလက်ခံဖြစ်တာက ကလေးတွေက ကိုရန်ကျော်ကို လေးလေးစားစားနဲ့ ဒီဇာတ်လေးရိုက်ချင်ပါတယ်ဆိုပြီ ကမ်းလှမ်းတာကြောင့်ပါ။ ငွေကြေးတတ်နိုင်ကြတာလည်း မဟုတ်ဘူး။ သူတို့ ပိုက်ဆံလေးနဲ့ သူတို့ ရင်းနှီးရိုက်တဲ့အပေါ် ကိုယ်က စာနာစိတ်နဲ့ ပါဝင်ဖြစ်တာပါ။ ကလေးတွေက တကယ့်ကို ဝါသနာပါတယ်။ ကိုရန်ကျော်လည်း အခန်းတွေက အများကြီး မဟုတ်ဘူး။ နေရာလေး သေချာလည်းပေးထားတယ်။ ဒါကြောင့် ရိုက်ဖြစ်လိုက်တာပါ။ ဒီကားက အောက်လမ်းတို့ ဘာတို့ဆိုတော့ ကိုယ်တိုင်လည်း စိတ်ဝင်စားတာလည်းပါပါတယ်။ ပရိသတ်ကလည်း သရဲတစ္ဆေကြိုက်နှစ်သက်တာမို့လေ ရိုက်ဖြစ်တာပါ။ ကိုရန်ကျော်က အထက်လမ်းဆရာတစ်ယောက်နေရာက မြင်တွေ့ရမှာပါ” လို့ သရုပ်ဆောင် ရန်ကျော်ကပြောပါတယ်။
ဇာတ်လမ်း၊ ဇာတ်ညွှန်းထက်မြက်နိုင်ဇင်ရေးသားပြီး ဒါရိုက်တာကိုမိုးနဲ့ နေညိမ်းတို့ ထိတ်လန့်ခြောက်ခြားစရာ Horror ဇာတ်လမ်းပုံစံ ရိုက်ကူးတင်ဆက်မယ့် ဇာတ်လမ်းတွဲလည်းဖြစ်ပါတယ်။
သရုပ်ဆောင်တွေအနေနဲ့ ကောင်းမြတ်မိုး၊ ဒိုဝူး၊ နေရောင်အလင်းမုဏ်း၊ ခိုင်သင်းဦး၊ ဟေမာန်အောင်အောင်၊ ဇိုင်းထက်၊ ရန်ကျော်၊ ကိုဖြိုးကြီး၊ ရဲမာန်၊ ရွှင်ပျော်၊ ရွှေအိုး၊ စန်းစန်းဝင်း၊ မျိုးမျိုး၊ နေဘုန်းခန့်၊ မေသော်တာစိုး၊ ချစ်ခြူးယမုံ၊ ဆောင်းနှင်းဖြူ စတဲ့ အနုပညာရှင်များပါဝင်ကြမှာဖြစ်ပါတယ်။
