၂. ၁. ၂၀၂၅
Written by Nyein Kyaw
ဒေါ်လာဈေးနှုန်း ပြန်တည်ငြိမ်ခဲ့သဖြင့် ငါးလဆက်တိုက် ကျဆင်းခဲ့သော မြန်မာ့ကုန်ထုတ်မှု ဒီဇင်ဘာလတွင် ပြန်လည်တိုးတက်လာခဲ့ပြီး ခြောက်လအတွင်း PMI အညွှန်းကိန်း ၅၀ အထက်သို့ ပထမဆုံး ပြန်လည်ရောက်ရှိလာခဲ့ကြောင်း ယနေ့ထုတ်ပြန်သည့် S&P Global မြန်မာ့ထုတ်လုပ်မှု Purchasing Managers’ Index (PMI) စစ်တမ်းတွင် ဖော်ပြထားသည်။
မြန်မာနိုင်ငံ၏ ကုန်ထုတ်လုပ်မှု အညွှန်းကိန်း (PMI) သည် ၂၀၂၄ ခုနှစ်၊ နိုဝင်ဘာလတွင် ၄၉ ဒသမ ၈ သာရှိခဲ့ရာမှ ဒီဇင်ဘာလတွင် ၅၀ ဒသမ ၄ သို့ တက်လာသည်ကို မှတ်တမ်းတင်ခဲ့ပြီး ထုတ်လုပ်ရေးကဏ္ဍ၏ အခြေအနေကောင်းမွန်မှုတွင် အသစ်ဖြစ်သော တိုးတက်မှုကို ပြသခဲ့ကြောင်း ဖော်ပြထားသည်။ ယခုကဲ့သို့ အညွှန်းကိန်းအမှတ် ၅၀ အထက်ကို ၂၀၂၄ ခုနှစ်၊ ဇွန်လနောက်ပိုင်းတွင် ပထမဆုံး တွေ့မြင်ရခြင်းလည်းဖြစ်သည်။
“အညွှန်းကိန်းက အလယ်မှတ် ၅၀ အထက်ကို ခြောက်လအတွင်း ပထမဆုံးအကြိမ် ရောက်ခဲ့တဲ့အလျောက် မြန်မာနိုင်ငံရဲ့ ထုတ်လုပ်ရေးကဏ္ဍတစ်ဝန်းမှာရှိတဲ့ အခြေအနေတွေမှာ ဒီဇင်ဘာလအတွင်း တိုးတက်မှုရတဲ့ အချက်တွေကို ပြသခဲ့ပါတယ်” ဟု S&P Global Market Intelligence မှ စီးပွားရေးပါရဂူ Maryam Baluch က ပြောသည်။
ကုန်ထုတ်လုပ်မှုအတွက် ဈေးနှုန်းဖိအားများသည် ပြီးခဲ့သည့် ဒီဇင်ဘာလတွင် ပိုမိုသက်သာလာခဲ့ပြီး ဝယ်ဈေးနှင့် ထုတ်လုပ်မှုအဖိုးအခ ဖောင်းပွမှုနှုန်းများသည် ၂၄ လအတွင်းနှင့် ၁၃ လအတွင်း အနည်းဆုံးများဖြစ် အသီးသီးမှတ်ဝင်ခဲ့ကြောင်း ဖော်ပြထားသည်။
မြန်မာ့ကုန်ထုတ်လုပ်မှုတွင် ထုည့်ကုန်များပြတ်လပ်မှုနှင့် သယ်ယူပို့ဆောင်ရေး စရိတ်များ မြင့်မားမှုတို့က ဈေးနှုန်းများကို ပိုမိုမြင့်မားစေခဲ့သော်လည်း သင့်လျော်သော ဒေါ်လာငွေလဲနှုန်းတစ်ခုကြောင့် ယင်းဖိအားများကို လျော့နည်းစေရန် အကူအညီဖြစ်စေခဲ့ကြာင်း ဖော်ပြထားသည်။ လာမည့် ၂၀၂၅ ခုနှစ်အတွက် ထုတ်လုပ်ရေးတိုးပွားမှုနှင့် ပတ်သက်သော သဘောထားသည် ကောင်းမွန်ကာ ခြောက်လအတွင်း ပထမဆုံးအကြိမ်အဖြစ် အကောင်းမြင်သည့်လဖြစ်ခဲ့သည်။
ဝိသမလောဘသမားများ၏ တစ်ဒေါ်လာ ၁၀,၀၀၀ ကျပ်အထိ ဆွဲတင်မှုများကြောင့် ကျပ် ၈,၀၀၀ ကျော်အထိ မြင့်တက်ခဲ့သော ဒေါ်လာဈေးနှုန်းသည် စက်တင်ဘာလကုန်မှစတင်၍ ကျပ် ၅၀၀၀ အောက်သို တည်ငြိမ်စွာကျဆင်းခဲ့ပြီး လက်ရှိတွင် တစ်ဒေါ်လာ ကျပ် ၄၅၀၀ ဝန်းကျင်ဖြင့် သုံးလခန့်အထိ ဈေးနှုန်းတည်ငြိမ်ခဲ့မှုကို တွေ့ရှိရသည်။
