ထိုင်းနိုင်ငံတွင် ကားအပိုပစ္စည်း ထုတ်လုပ်သည့်စက်ရုံတစ်ခုအတွင်း ထပ်ခိုးကြမ်းပြင်တစ်ခု ပြိုကျ၍ အလုပ်သမားငါးဦးသေဆုံး

၃၁.၁၂.၂၀၂၄
Translated by Htwe Ko Tun

ထိုင်းနိုင်ငံ၊ ပရာချင်းဘူရီပြည်နယ်အတွင်း ဆရီမဟာပေါ့ခရိုင်မှာရှိတဲ့ ကားအပိုပစ္စည်းတွေ ထုတ်လုပ်တဲ့စက်ရုံတစ်ခုမှာ အလုပ်သမားတွေပြောင်းရွှေ့နေတဲ့ ထပ်ခိုးကြမ်းပြင်တစ်ခု ဒီဇင်ဘာ ၃၀ ရက် နံနက်က ပြိုကျခဲ့ရာ စက်ရုံအလုပ်သမားငါးဦးသေဆုံးခဲ့ရတယ်လို့ သတင်းရရှိပါတယ်။

ဖြစ်ရပ်က Tha Tum မြို့နယ်အတွင်း ရိုဂျာနာ စက်မှုဇုံမှာရှိတဲ့ ထိုင်း Yanagawa ကုမ္ပဏီရဲ့ ကားပစ္စည်းစက်ရုံမှာ နံနက် ၉ နာရီ ၃၅ မိနစ်မှာဖြစ်ခဲ့တာလို့လည်း သိရပါတယ်။ တာဝန်ရှိသူတွေရဲ့ပြောကြားချက်အရ ပြောင်းရွှေ့မှုတွေပြုလုပ်နေခိုက် မီတာ ၂၀ ရှည်ပြီးအကျယ်မီတာ ၂၀ ရှိမယ့် ကွန်ကရစ်ထပ်ခိုး ကြမ်းပြင်ပြိုကျခဲ့ရတာလို့ သိရပါတယ်။

ထပ်ခိုးကိုထောက်ခံမှုပြုထားတဲ့ သံမဏိကွန်ရက်က တိမ်းစောင်းပြီး ထပ်ခိုးကြမ်းပြင်တစ်ခုလုံး ၂ ဒသမ ၅ မီတာအမြင့်ကနေ အလုပ်သမားတွေအပေါ်ပြိုကျခဲ့တာလို့ သိရပါတယ်။

ကယ်ဆယ်ရေးအဖွဲ့ဝင်တွေက ပြိုကျကြမ်းပြင်နဲ့ အပျက်အစီးတွေကို ဖယ်ရှားကာ အလုပ်သမားတွေကို ကယ်ဆယ်ဖို့ကြိုးစားခဲ့ပေမယ့် သူတို့ရဲ့သေဆုံးလျက်သာတွေ့ရှိရပါတော့တယ်။

လတ်တလောမှာတော့ သေဆုံးအလုပ်သမားတွေဟာ ဘယ်နိုင်ငံသားတွေလဲဆိုတာ အတည်မပြုနိုင်သေးဘဲ စိစစ်မှုလုပ်ဆောင်နေဆဲသာဖြစ်ပါတယ်။

Ref- Bangkok Post