၃၀.၁၂.၂၀၂၄
Written By Zun
ရန်ကုန်တိုင်းဒေသကြီး၊ စမ်းချောင်းမြို့နယ်၊ ဖျာပုံလမ်းတွင် ယနေ့ ထပ်မံ ဖြစ်ပွားခဲ့သော ပေါက်ကွဲမှုကြောင့် လမ်းသွားလမ်းလာ ၃ ဦးခန့် ထိခိုက်မှု အနည်းငယ် ရှိခဲ့ကြောင်း လုံခြုံရေးတပ်ဖွဲ့နှင့် နီးစပ်သူများထံမှ သိရသည်။
ယနေ့ ဒီဇင်ဘာ ၃၀ ရက် နံနက် ၉ နာရီကျော်အချိန်က စမ်းချောင်းမြို့နယ်၊ ဖျာပုံလမ်း၊ ကျွန်းလယ်ရပ်ကွက်၊ အမှတ် (၃၁) ရှိ ပန်းလှိုင်မိသားစု Clinic ရှေ့တွင် ဖြစ်ပွားခဲ့သော အခန်းရှေ့ ရပ်တန့်ထားသော အဆိုတော်ယုန်လေး၏ ယာဥ်တစ်စီးအပါအဝင် မော်တော်ယာဉ် နှစ်စီး မီးစက်နှစ်လုံး ပျက်စီးခဲ့ခြင်း ဖြစ်သည်။
ယင်းနောက် နံနက် ၁၁ နာရီခွဲခန့်အချိန်တွင် စမ်းချောင်းကျွန်းလယ်ရပ်ကွက်ရှိ အုပ်ချုပ်ရေးမှူးရုံးအနီးပေါက်ကွဲမှု ထပ်မံ ဖြစ်ပွားသောကြောင့် လမ်းသွားလမ်းလာ ၃ ဦး ထိခိုက်ဒဏ်ရာ အနည်းငယ် ရရှိခဲ့ကြောင်း သိရသည်။
“ပေါက်ကွဲတာက အချိန်ကွာတယ်။ နှစ်ကြိမ် ဖြစ်တယ်။ဒဏ်ရာရတာက အဆိုတော် ယုန်လေးအိမ်သား တွေဆို တာတော့ မဟုတ်ဘူး။ လမ်းသွားလမ်းလာတွေထဲက ဖြစ်တာ။ ဒဏ်ရာက ပေါက်ကွဲတဲ့အတွက် အစ လွင့်စင်ပြီး ခြေထောက်ထိတာမျိုးပါ။ ဒဏ်ရာတွေက မစိုးရိမ်ရဘူး”ဟု လုံခြုံရေးတပ်ဖွဲ့နှင့် နီးစပ်သူက MT News ကို ပြောသည်။
ပုံစာ။ ယနေ့ ပေါက်ကွဲမှုတွင် ဒဏ်ရာရခဲ့သူတစ်ဦးကို တပ်မတော်သားတစ်ဦးက ကယ်ထုတ်နေမှုမြင်ကွင်း (Photo – CJ)
