◾ တပ်မတော်ထောက်ခံသည့် အနုပညာရှင်များကို NUG နှင့် PDF များက ဆက်တိုက် ဗုံးခွဲတိုက်ခိုက်လာပြီး နှစ်လအတွင်း အနုပညာရှင်သုံးဦးကို ခြိမ်းခြောက်တိုက်ခိုက်
၃၀.၁၂.၂၀၂၄
Written By Zun
ရန်ကုန်တိုင်းဒေသကြီး၊ စမ်းချောင်းမြို့နယ်၊ အမှတ်(၃၁)၊ ဖျာပုံလမ်း၊ ကျွန်းလယ်ရပ်ကွက်ရှိ ပန်းလှိုင်မိသားစု Clinic ရှေ့နှင့် ယုန်လေးနေအိမ်အနီးတွင် ယနေ့ ဒီဇင်ဘာလ ၃၀ ရက် နံနက် ၉ နာရီကျော်အချိန်က ပေါက်ကွဲမှု ဖြစ်ပွားခဲ့ကြောင်း သိရသည်။
ပေါက်ကွဲမှုဖြစ်စဉ်ကြောင့် Clinic ရှေ့တွင် ရပ်တန့်ထားသော မော်တော်ယာဉ် နှစ်စီး၊ မီးစက်နှစ်လုံး ပျက်စီးခဲ့ရကြောင်း၊ NUG နှင့် PDF များနှင့် ထောက်ခံသူများက ဆုကြေးထုတ် ပစ်မှတ်ထားခံနေရသော အဆိုတော် ယုန်လေးစီးသော Crown ကားလည်း ထိခိုက်သွားကြောင်း သိရသည်။
ထို့ပြင် အဆိုပါဖောက်ခွဲတိုက်ခိုက်မှုတွင် လူတစ်ဦးထိခိုက်ဒဏ်ရာရရှိကြောင်း တပ်မတော်ထောက်ခံသည့် Telegram Channel များက ဖော်ပြနေ၍ MT News က လူထိခိုက်မှုရှိမရှိနှင့် မည်သူမည်ဝါထိခိုက်သည်ကို ဆက်လက်စိစစ်ရာ လမ်းသွားလမ်းလာတစ်ဦး ထိခိုက်မှုဖြစ်ပွားခဲ့သည်ဟု သိရ၍ အခြေအနေကို ဆက်လက်စုံစမ်းနေသည်။
“ပေါက်ကွဲမှုတွေက ဒီရက်ပိုင်းမှာ ဖြစ်နိုင်တယ်ဆိုတဲ့ လုံခြုံရေးသတိကို လုပ်ထားကြပါတယ်။ အကြမ်းဖက်တွေက နှစ်သစ်ကူးမှာ လူတွေ အပြင်ကိုမထွက်ရအောင် နည်းမျိုးစုံနဲ့ လုပ်ကြမှာ ဖြစ်ပါတယ်။ ဒါကြောင့် သတိတော့ထားရမယ့် ကာလ ဖြစ်ပါတယ်”ဟု လုံခြုံရေးနှင့် နီးစပ်သူတစ်ဦးက MT News ကို ပြောသည်။
ယင်းပေါက်ကွဲမှုအပြင် ကျွန်းတောအလယ်ရပ်ကွက်ရုံးအတွင်းတွင်လည်း PDF များ လာရောက်ဖောက်ခွဲတိုက်ခိုက်ရာမှ မပေါက်ကွဲသေးသည့် ဗုံးများရှိနေသေးသည်ဟု စမ်းချောင်း PDF များကို ထောက်ခံအားပေးသည့် PDF ထောက်ပို့ Page များက ပြည်သူများသွားလာရာတွင် မကွဲသေးသည့်ဗုံးရှိနေကြောင်း သထိထားသွားလာရန်လိုကြောင်း သတင်းများအရ သက်ဆိုင်ရာက စစ်ဆေးမှုများပြုလုပ်နေကြောင်းလည်း MT News က စုံစမ်း သိရှိရသည်။
ပြီးခဲ့သည့် နိုဝင်ဘာ ၁၄ ရက်ကလည်း တပ်မတော်ထောက်ခံသည်ဟုဆိုကာ အကယ်ဒမီများရှင် ရန်အောင်၏ နေအိမ်ကို Dark Shadow PDF က ဗုံးခွဲခဲ့သလို ဆယ်လီအနုပညာရှင်ဖြူဖြူထွေးကိုလည်း Haosu Balm ဆေးပရုတ်ဆီ ကြော်ငြာကို မယ်တော်ဟောင်စုဆေးပရုတ်ဆီအဖြစ်ကြော်ငြာမှုမှာ ဒေါ်အောင်ဆန်းစုကြည်ကို တုပစော်ကားသည်ဟု စွပ်စွဲပြီး ဒီဇင်ဘာ ၂၄ ရက်တွင် Black Hero UG PDF နှင့် ဒီဇင်ဘာ ၂၅ ရက်တွင် Dark Shadow PDF တို့က သတ်ဖြတ်မည်ခြိမ်းခြောက်ခဲ့သည့်အပြင် NLD ၊ NUG နှင့် PDF ထောက်ခံသူများ ထောက်ပို့များကလည်း ဖြူဖြူထွေးကိုသတ်ဖြတ်သည့် PDF အဖွဲ့အား ဆုငွေချီးမြှင့်မည်ဟု ထုတ်ပြန်မှုများဖြစ်ပွားအပြီး ယနေ့တွင်လည်း NLD ၊ NUG နှင့် PDF ထောက်ခံသူများ ထောက်ပို့များက သတ်ဖြတ်ရန် ဆုကြေးမကြာခဏအထုတ်ခံနေရသည့် အဆိုတော်ယုန်လေးကို ရည်ရွယ်သည်ဟုဆိုသော ဗုံးခွဲ တိုက်ခိုက်မှုဖြစ်ပွားလာခဲ့ခြင်းဖြစ်သည်။
