၃၀.၁၂.၂၀၂၄
Translated by Htwe Ko Tun
ထိုင်းနိုင်ငံ၊ ဘန်ကောက်မြို့၊ ဖရာနာခွန်ခရိုင်အတွင်း ခေါဆန်လမ်းအနီးရှိ ကြယ်လေးပွင့် The Ember ဟိုတယ်တွင် ဒီဇင်ဘာလ ၂၉ ရက် ညပိုင်းက မီးလောင်မှုတစ်ရပ်ဖြစ်ပွားခဲ့ရာ လူသုံးဦးသေဆုံးပြီး ခုနစ်ဦးဒဏ်ရာရခဲ့ကြောင်း သတင်းများအရ သိရသည်။
Tanee လမ်းပေါ်ရှိ အဆိုပါဟိုတယ်တွင် ဒီဇင်ဘာလ ၂၉ ရက် ည ၉ နာရီ ၂၁ မိနစ်တွင် စတင် မီးလောင်ခဲ့ခြင်းဟု ရဲတပ်ဖွဲ့က ပြောခဲ့သည်။
မျက်မြင်တွေ့ရှိသူများက ခြောက်ထပ်အဆောက်အအုံဟိုတယ်၏ ငါးလွှာမြောက်မှ မီးစတင်လောင်ကျွမ်းခဲ့ခြင်းဟု ပြောခဲ့ကြသည်။ မီးသတ်တပ်ဖွဲ့ဝင်များက မီးလောင်ကျွမ်းမှုကို တစ်နာရီခန့်အကြာတွင် ထိန်းချုပ်နိုင်ခဲ့ကြကြောင်းလည်း သိရသည်။
ဘန်ကောက်မြို့ အုပ်ချုပ်ရေးမှူး ချဒ်ချတ်ဆစ်တီပွန့်က မီးလောင်ချိန်တွင် ဟိုတယ်တွင်း လူ ၄၀ ဦးခန့် ရှိနေကြပြီး အများအပြားကို ဟိုတယ်အမိုးပေါ်မှမီးသတ်တပ်ဖွဲ့၏ မိုးပျံလှေကားအမြင့်များဖြင် ကယ်ထုတ်ခဲ့ရကြောင်း ပြောခဲ့သည်။
ဟိုတယ်၏ ငါးလွှာမြောက်ရှိ အခန်းအမှတ် ၅၀၂ မှ နိုင်ငံခြားသူအမျိုးသမီးတစ်ဦးမှာ မီးလောင်မှုတွင် သေဆုံးနေသည်ကို တွေ့ခဲ့ရသည်။ အခြားနိုင်ငံခြားသားနှစ်ဦးမှာလည်း ပြင်းထန်စွာဒဏ်ရာများရခဲ့ပြီးနောက် ဆေးရုံတွင် သေဆုံးခဲ့ကြရသည်။ တာဝန်ရှိသူများက ၎င်းတို့အား မည်သူမည်ဝါဖြစ်သည်ကိုစုံစမ်းလျက်ရှိကြောင်း သိရသည်။
ဒဏ်ရာရရှိသူ ခုနစ်ဦးတွင် ထိုင်းအမျိုးသားနှစ်ဦး၊ ဂျပန်အမျိုးသားတစ်ဦး၊ မည်သူမည်ဝါမသိသေးသော နိုင်ငံခြားသူတစ်ဦး၊ ဂျာမန်နိုင်ငံသား အမျိုးသားတစ်ဦးနှင့် အမျိုးသမီးတစ်ဦးနှင့် တရုတ်အမျိုးသားတစ်ဦးတို့ ပါဝင်ကြကြောင်း သိရသည်။
မီးက ဟိုတယ်၏ငါးလွှာရှိ အခန်းအမှတ် ၅၁၁ မှ စတင်လောင်ကျွမ်းခဲ့ပြီး မီးလောင်ခြင်းအကြောင်းရင်းကို စုံစမ်းစစ်ဆေးနေကြောင်း သိရသည်။
Ref- Bangkok Post
