၂၈ .၁၂.၂၀၂၄
Written by Hey Mar
ဆီဘောက်ဆာထဲက ဆီကို သံပီပါထဲ လှယ်ထည့်ရာက ဆီနော်ဇယ်ပိုက်ခေါင်းနဲ့ ပီပါတွေ ပွတ်တိုက်မှုဖြစ်ပွားကာ မီးလောင်ကျွမ်းမှု ဒီနေ့ ဒီဇင်ဘာ ၂၈ ရက်နေ့ ညနေ သုံးနာရီကျော်က ရှမ်းပြည်နယ်၊ မိုင်းရှူးခရိုင်၊ ကျေးသီးမြို့မှာ ဖြစ်ပွားခဲ့တယ်လို့ မြန်မာနိုင်ငံ မီးသတ်တပ်ဖွဲ့ထံကနေ သိရပါတယ် ။
ဖြစ်စဉ်က ဒီနေ့ ညနေ ၃နာရီ မိနစ် ၂၀ ခန့်အချိန်က ရှမ်းပြည်နယ်၊ ကျေးသီးမြို့နယ်၊ ကန်ပန်ရပ်ကွက်၊ မြို့ဦးဘုန်းကြီးကျောင်းရှေ့ ဘောလုံးကွင်းအတွင်းမှာ Hino(၁၂)ဘီး အမျိုးအစား(အဖြူရောင်)ဆီဘောက်ဆာယာဉ်ပေါ်ရှိ ဓာတ်ဆီတွေကို Nissan(၁၂)ဘီး (ဖြူ/စိမ်း) ယာဉ်ပေါ်ရှိ သံပီပါများအတွင်း၊ ဆီဖြည့်စဉ် ဆီနော်ဇယ်ပိုက်ခေါင်းနဲ့ ပီပါတွေပွတ်တိုက်မိပြီး မီးပွားတွေကတစ်ဆင့် မီးကူးစက်လောင်ကျွမ်းမှုဖြစ်ပွားခဲ့တာလို့ သိရပါတယ် ။
မီးလောင်ကျွမ်းမှုကို ကျေးသီးမြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး၊ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေနဲ့ သက်ဆိုင်ရာအဖွဲ့အစည်းတွေက ပူးပေါင်းကာ သွားရောက်ငြှိမ်းသတ်ခဲ့ကြပြီး တစ်နာရီနီးပါးငြှိမ်းသတ်ခဲ့ရတယ်လို့ သိရပါတယ်။