၂၇. ၁၂. ၂၀၂၄
Written by Nyein Kyaw
ဗဟိုဘဏ်မှ သွင်းကုန်လုပ်ငန်းရှင်များအတွက် ထိုင်းဘတ် ၄ ဒသမ ၇၂၅ သန်းနှင့် တရုတ်ယွမ် ၅ သိန်း ထပ်မံထုတ်ရောင်းပေးခဲ့ကြောင်း မြန်မာနိုင်ငံတော်ဗဟိုဘဏ်မှ ဒီဇင်ဘာလ ၂၆ ရက် (ယမန်နေ့)တွင် ထုတ်ပြန်ထားသည့် စာရင်းအရ သိရသည်။
ယခုထပ်မံထုတ်ရောင်းပေးမှုအပါအဝင် ဒီဇင်ဘာလ ၂၄ ရက်တွင်လည်း ထိုင်းဘတ် ၉ သိန်းနှင့် တရုတ်ယွမ် ၃၃၀,၀၀၀ ခန့် ထုတ်ရောင်းပေးထားသည့်အတွက် ဒီဇင်ဘာလ ၂ ရက်မှ ၂၆ ရက်အထိ သုံးပတ်ကျော်အတွင်း ဗဟိုဘဏ်မှ ထိုင်းဘတ် ၃၂၀ ဒသမ ၅၃၉ သန်းနှင့် တရုတ်ယွမ် ၁၀ ဒသမ ၉၃၄ သန်းအထိ ထုတ်ရောင်းပေးခဲ့သလို ဒေါ်လာ ၁၃၉ သန်းခွဲကျော်အထိ ထုတ်ရောင်းပေးထားသည်။
နှစ်သစ်ကူးရုံးပိတ်ရက်များကြောင့် သွင်းကုန်တင်သွင်းမှုများပြီး နိုင်ငံခြားငွေလိုအပ်ချက် မြင့်မားလေ့ရှိသည့် ဒီဇင်ဘာလအတွင်း နိုင်ငံခြားငွေဈေးနှုန်း မြင့်တက်မှုမရှိစေရန် ဒေါ်လာ၊ ထိုင်းဘတ်နှင့် တရုတ်ယွမ်များကို ဗဟိုဘဏ်မှ ဆက်တိုက်ထုတ်ရောင်းပေးနေခြင်းဖြစ်သည်။
ယင်းကဲ့သို့ ဆက်တိုက်ထုတ်ရောင်းပေးခဲ့၍ ဝိသမလောဘသမားများက ဒေါ်လာဈေးနှုန်း ဆွဲတင်နေသော်လည်း ယခုဒီဇင်ဘာလအတွင်း ဒေါ်လာဈေးနှုန်း ကျပ် ၅,၀၀၀ အောက်မှာသာရှိခဲ့ပြီး ယနေ့တွင် တစ်ဒေါ်လာ ၄,၄၅၀ ကျပ်၊ ထိုင်းဘတ် တစ်ဘတ် ၁၃၀ ကျပ်နှင့် တရုတ်ယွမ် တစ်ယွမ် ၆၁၂ ကျပ် ဖြစ်ပေါ်ခဲ့ပြီး ဈေးနှုန်းတည်ငြိမ်လျက်ရှိသည်။
ဗဟိုဘဏ်အနေဖြင့် ပြီးခဲ့သည့် ဩဂုတ်လ ၁ ရက်မှ နိုဝင်ဘာလ ၂၉ ရက်အထိ လေးလအတွင်း ဒေါ်လာ ၃၃၅ သန်းကျော်၊ ထိုင်းဘတ် ၁ ဒသမ ၂၇၄ ဘီလျံကျော်နှင့် တရုတ်ယွမ် ၅၆ သန်းခန့်အထိ ထုတ်ရောင်းပေးထားပြီးဖြစ်သည့်အပြင် ယခုဘဏ္ဍာနှစ် ခုနစ်လအတွင်း စက်သုံးဆီ၊ စားသုံးဆီနှင့် သွင်းကုန်လုပ်ငန်းရှင်များအတွက် ဒေါ်လာတစ်ဘီလျံလည်း သီးသန့်ထုတ်ရောင်းပေးထားသည်။
