၂၇.၁၂.၂၀၂၄
Written By Thandar
Lucky Seven ထုတ်လုပ်ရေးက မအေးအေးဝင်းစီစဉ်တဲ့ ထိတ်လန့်ခြောက်ခြားဖွယ် Horror ဇာတ်လမ်းပုံစံ “ဇော်ဂနီ” ရုပ်ရှင်ဇာတ်ကားကြီး Premiere Show အခမ်းအနားကို ဒီဇင်ဘာ ၂၆ ရက်နေ့ ညနေ ၅နာရီခွဲက ရန်ကုန်မြို့ သမ္မတ ရုပ်ရှင်ရုံမှာ ကျင်းပခဲ့ပါတယ်။
“ရှေ့မှာလည်း ကျွန်တော် ကဝေတစ်ကားရိုက်ဖူးတော့ သူနဲ့မတူအောင် ပုံဖော်ရတယ်။ အမြင်ဆန်းအောင် ပုံဖော်ထားပါတယ်။ ဟာသလေးတွေလည်း ပါတယ်။ ဇော်ဂနီရဲ့ သဘောက ကဝေမဟုတ်ဘူး။ သူ့ဆီက ခိုင်းလို့ရတဲ့ သွားခိုင်းပြီး ဝင်ပူးခိုင်းတယ်။ ဝင်ပူးပြီးသွားရင် သူကထိုင်ပြီး ခိုင်းလို့ရတယ်။ မိသားစုပုံစံလေးနဲ့ ရိုက်ထားတော့ ကျွန်တော် ဆူချင်တာရှိလည်း ဆူလို့ရတယ်။ သူတို့ဘက်ကလည်း လိုအပ်တာတွေ ပြန်ပြောပြပါတယ်”လို့ ကိုဇော်(အရုဏ်ဦး)က ပြောပါတယ်။
ဒီရုပ်ရှင်ဇာတ်ကားကြီးမှာ ဇာတ်လမ်း အိန်ဂျယ်၊ ဇာတ်ညွှန်း နေစိုးသော်တို့က ရေးသားထားပြီး ဒါရိုက်တာ ကိုဇော်(အရုဏ်ဦး)က သရုပ်ဆောင်တွေဖြစ်တဲ့ အကယ်ဒမီမြင့်မြတ်၊ အကယ်ဒမီ မေမြင့်မိုရ်၊ နော်ဖောအယ်ထား၊ ဇော်ဦး၊ အကယ်ဒမီ မေသန်းနု၊ စပယ်မိုး၊ K ညီ၊ သွက်လက်၊ အုန်းဒိုင်း၊ ဘသာထူး စတဲ့အနုပညာရှင်တွေ ပါဝင် သရုပ်ဆောင်ထားကြပါတယ်။
“ဇော်ဂနီ” ရုပ်ရှင်ဇာတ်ကားကြီးကို လာမယ့် ၂၀၂၅ ခုနှစ် ဇန်နဝါရီလဆန်း ၃ ရက်မှာ ရုံတင်ပြမှာဖြစ်ပါတယ်။
