၂၅.၁၂.၂၀၂၄
Written By Thandar
ပျော်ရွှင်ရယ်မောစရာ ဇာတ်လမ်းပုံစံ “အမျိုးကိုချစ်ပါ” ရုပ်ရှင်ဇာတ်ကားကြီး Red Carpet Show အခမ်းအနားကို ဒီဇင်ဘာ ၂၄ ရက် ညနေပိုင်းက ရန်ကုန်မြို့ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“ကျွန်တော်က အမျိုးကိုချစ်ပါ ရုပ်ရှင်ဇာတ်ကားကြီးမှာ ကာရိုက်တာနာမည်က အောင်မျိုးပါ။ ဒီကားက ဦးမီးပွားရဲ့ ဟာသအနေနဲ့ ရိုက်တဲ့ကားပါ။ ဦးမီးပွား ဟာသကားပြန်ရိုက်ချိန်မှာ ကျွန်တော့်ကို ယုံကြည်စွာနဲ့ တိုင်ရွန်လိုက်မယ်ဆိုပြီး Recommend ပေးလို့ ကျေးဇူးတင်ပါတယ်။ ပရိသတ်မမြင်တွေ့ရတဲ့ သရုပ်ဆောင်ကြီးတွေလည်း ကျွန်တော့်ကို ပါဝင်ဝန်းရံပေးကြလို့ ကျေးဇူးတင်ပါတယ်။ ပရိသတ်တွေအနေနဲ့ ဒီကားက ရယ်ရပြုံးရတယ်ဆိုရင် ကျေနပ်ပါတယ်။ မထက်@ထက်ထက်ထွန်းနဲ့ အချိတ်အဆက်မိမိ သေချာရိုက်ထားပါတယ်”လို့ သရုပ်ဆောင်တိုင်ရွန်က ပြောပါတယ်။
မာတာမြတ်မိခင်ထုတ်လုပ်ရေးရဲ့ ဇာတ်ကားကို ဇာတ်လမ်း ဇာတ်ညွှန်း မောင်သူရရေးသားပြီး ရိုက်ကွင်းဇာတ်ညွှန်း ညာလက်တော်၊ မင်းကိုစိုး(နတ်သံကွင်း)၊ တွဲဖက်ဒါရိုက်တာ အောင်ကျော်သန့်၊ ဒါရိုက်တာ မီးပွားက သရုပ်ဆောင် တိုင်ရွန်၊ ထက်ထက်ထွန်း၊ အရိုင်း၊ ခင်လှိုင်၊ စိုးမြတ်သူဇာ၊ မိုခမ်း၊ လင်းလင်း၊ သံသာညီ၊ မျိုးသန္တာဇော်၊ မိုးပြည့်သက်ခြယ်၊ ပန်ဒိုရာထူး၊ အယ်လီနာ၊ ယွန်းသဒ္ဒါချယ်စတဲ့သူတွေအပြင် အထူးဧည့်သည် သရုပ်ဆောင် ရဲကိုကို၊ ကျော်ရဲအောင်၊ လွင်မိုးနဲ့ နေဆန်းတို့နဲ့ ရိုက်ကူး ပါဝင်ထားကြပါတယ်။
“အမျိုးကိုချစ်ပါ ရုပ်ရှင်ဇာတ်ကားကြီးကို လာမယ့် ဒီဇင်ဘာလ၂၇ ရက်နေ့ကစ မြန်မာတစ်ပြည်လုံးရှိ ရုပ်ရှင်ရုံတွေမှာ ရုံတင်ပြသမှာဖြစ်ပါတယ်။
