၂၃.၁၂.၂၀၂၄
Written by KL
မန္တလေးတိုင်းဒေသကြီး၊ အမရပူရမြို့နယ်၊ တောင်အင်းမြောက်အင်းသုသာန်အနီးတွင် ဒီဇင်ဘာလ ၂၃ ရက် ည ၇ နာရီခွဲခန့်က မော်တော်ယာဥ်တစ်စီးနှင့်ဆိုင်ကယ်တို့ တိုက်မိရာမှ ဆိုင်ကယ်မောင်းသူ သေဆုံးခဲ့ကြောင်း သွားရောက် ကူညီကယ်ဆယ်ခဲ့သည့် လောကပါလ လူမှုကူညီရေးအသင်းထံမှ သိရသည်။
သေဆုံးသူမှာ အသက် ၅၀ ခန့်အရွယ် အမျိုးသားကြီးဖြစ်ပြီး ဦးခေါင်းထိခိုက်ကာ နေရာတွင်ပင် သေဆုံးခဲ့ခြင်းဖြစ်ကြောင်း သိရသည်။
“ကားရဲ့ ဘယ်ခြမ်းနဲ့ ဆိုင်ကယ်ဝင်တိုက်တာ ဆိုင်ကယ်လည်း တော်တော်ပျက်စီးသွားပြီး ဆိုင်ကယ်သမားလည်း နေရာမှာပဲဆုံးသွားတယ်။ ဆွဲခြင်းလေးတစ်လုံးလည်းပါတယ်”ဟု မျက်မြင်တွေ့ရှိသူတစ်ဦးက ပြောသည်။
သေဆုံးသူ၏ရုပ်အလောင်းကို လောကပါလ လူမှုကူညီရေးအသင်းမှအသင်းဝင်များက သွားရောက်သယ်ဆောင်ခဲ့ပြီး မန္တလေးပြည်သူ့ဆေးရုံကြီး ရင်ခွဲရုံသို့ ပို့ဆောင်ပေးခဲ့ကြောင်း သိရသည်။
