၂၄. ၁၂. ၂၀၂၄
Written by Nyein Kyaw
မြန်မာနိုင်ငံတွင် LNG Terminal တည်ဆောက်ပြီး သဘာဝဓာတ်ငွေ့များ ထုတ်ယူနိုင်ရေး ဖြစ်နိုင်ခြေ ဆန်းစစ်ခြင်းကို ဆောလျင်စွာစတင်နိုင်ရေးနှင့် မြန်မာနိုင်ငံမှ ကူမင်းမြို့သို့ ဆက်သွယ်ထားပြီးဖြစ်သည့် သဘာဝဓာတ်ငွေ့ပိုက်လိုင်းကို ချုံချင့်မြို့အထိ ပို့လွှတ်နိုင်ရန် အဆင့်မြင့်တင်ရေးလုပ်ငန်းများအတွက် မြန်မာ-တရုတ် ပူးပေါင်းဆောင်ရွက်နိုင်ရေး ဆွေးနွေးခဲ့ကြောင်း စွမ်းအင်ဝန်ကြီးဌာနမှ သိရသည်။
အဆိုပါ မြန်မာ-တရုတ် စွမ်းအင်ကဏ္ဍပူးပေါင်းဆောင်ရွက်ရေးအတွက် စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်သည် တာဝန်ရှိသူများနှင့်အတူ South-East Asia Crude Oil Pipeline နှင့် Gas Pipeline ကုမ္ပဏီများ၏ ဥက္ကဋ္ဌ Mr. Wang Qiang ဦးဆောင်သည့်အဖွဲ့အား ယမန်နေ့တွင် စွမ်းအင်ဝန်ကြီးဌာန၌ တွေ့ဆုံဆွေးနွေးခြင်းဖြစ်သည်။
ယင်းကဲ့သို့ တွေ့ဆုံစဉ် မြန်မာနိုင်ငံ၌ LNG Terminal တည်ဆောက်၍ သဘာဝဓာတ်ငွေ့များ ထုတ်ယူပြီး နှစ်နိုင်ငံမျှဝေသုံးစွဲခြင်းစီမံကိန်းကို အမြန်ဆုံးအကောင်အထည်ဖော် ဆောင်ရွက်နိုင်ရန်အတွက် ဖြစ်နိုင်ခြေဆန်းစစ်ခြင်းများကို ဆောလျင်စွာစတင်နိုင်ရေး၊ တရုတ်နိုင်ငံကူမင်းမြို့သို့ ဆက်သွယ်ထားပြီးဖြစ်သည့် သဘာဝဓာတ်ငွေ့ပိုက်လိုင်းကို ချုံချင့်မြို့အထိ ဓာတ်ငွေ့ပို့လွှတ်နိုင်ရေးအတွက် ပိုက်လိုင်းအဆင့်မြှင့်တင်ရေးတို့ကို ဆွေးနွေးခဲ့သည်။
ထို့ပြင် မြန်မာ-တရုတ် ရေနံစိမ်းပိုက်လိုင်းမှတစ်ဆင့် ရေနံစိမ်းများရယူပြီး ရေနံချက်စက်ရုံများအား အဆင့်မြှင့်တင်လည်ပတ်နိုင်ရေးအပါအဝင် စွမ်းအင်ကဏ္ဍတွင် တရုတ်နိုင်ငံနှင့် ပိုမိုပူးပေါင်းဆောင်ရွက်ရေး ကိစ္စရပ်များကို ဆွေးနွေးခဲ့ကြောင်း သိရသည်။
တစ်ရက်အတွက် လျှပ်စစ်ဓာတ်အားပျမ်းမျှ မဂ္ဂါဝပ် ၄၄၀၀ လိုအပ်ချက်ရှိသည့် မြန်မာနိုင်ငံတွင် ဓာတ်အားပေးစက်ရုံများ၏ အရင်းအမြစ်အလိုက် စုစုပေါင်း တပ်ဆင်စက်အင်အား ၇,၂၇၂ မဂ္ဂါဝပ်ရှိပြီး ၎င်းစက်များ စွမ်းအားပြည့် မောင်းနှင်လည်ပတ်နိုင်ပါက မဂ္ဂါဝပ် ၄,၀၀၀ ခန့် ထုတ်လုပ်ဖြန့်ဖြူးပေးနိုင်မည်ဖြစ်သည်။
သို့သော် သဘာဝဘေးနှင့် အကြမ်းဖက်များ၏ ဖျက်ဆီးမှုကြောင့် ယခုကာလတွင် တစ်ရက်ပျမ်းမျှ ၂၄၀၀ မဂ္ဂါဝပ်ခန့်သာ ထုတ်လုပ်နိုင်သဖြင့် လိုအပ်ချက်၏ ၅၅ ရာခိုင်နှုန်းခန့်ကိုသာ ထုတ်လုပ်ပေးနိုင်သဖြင့် လျှပ်စစ်ဓာတ်အား လိုအပ်ချက်ကို ကာလတိုဖြေရှင်းနိုင်ရန် LNG ဓာတ်အားပေးစက်ရုံ စီမံကိန်းများကို အကောင်အထည်ဖော် ဆောင်ရွက်နိုင်ရေး စီစဉ်ဆောင်ရွက်နေကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ ဒီဇင်ဘာ ၂၁ ရက်တွင် ပြည်သူများထံ အသိပေးကြေညာထားသည်။
