၂၃. ၁၂. ၂၀၂၄
Written by Nyein Kyaw
စိုင်းစိုင်းခမ်းလှိုင်၊ မျိုးကျော့မြိုင်၊ ထွန်းထွန်းနှင့် တေးသံရှင်များစွာပါဝင်သည့် RANGOON DOWNTOWN LIFESTYLE 2024 ပွဲတော်အား ရန်ကုန်မြို့ရှိ ဝန်ကြီးများရုံးတွင် ဒီဇင်ဘာ ၂၅ ရက် (Christmas) မှ ဒီဇင်ဘာ ၃၁ ရက် (New Year)နေ့ညအထိ ကျင်းပသွားမည်ဖြစ်ကြောင်း သိရသည်။
အဆိုပါပွဲတော်အတွက် လက်မှတ်များကိုလည်း Altitude Entertainment Group မှ အွန်လိုင်းမှတစ်ဆင့် စတင်ရောင်းချပေးနေပြီး ဒီဇင်ဘာ ၂၅ ရက်နှင့် ၃၁ ရက်တို့အတွက် လက်မှတ်ခဈေးနှုန်းများမှာ တစ်ဦးလျှင် အနည်းဆုံး ကျပ် ၃၀,၀၀၀ မှ အများဆုံး ၂၀၀,၀၀၀ အထိရှိကြောင်း သိရသည်။
“VVIP Table က ၆ ယောက်ပါမယ် အဲဒါက ၁၀ သိန်းပါ။ VVIP ကိုမှ တစ်ယောက်ချင်း၊ တစ်ခုံချင်းလိုချင်တဲ့သူတွေအတွက်က တစ်ယောက်ကို ၂ သိန်းပါ။ VIP ကတော့ ရောထားပေးတဲ့ အထိုင်စနစ်ပေါ့။ အဲဒါက တစ်ယောက် ငါးသောင်းခွဲပါ။ ရိုးရိုးကတော့ သုံးသောင်းပါ။ လက်မှတ်ကို ပွဲနေ့တွေမှာလည်း ရောင်းပေးပါမယ်။ လောလောဆယ်ကတော့ အွန်လိုင်းကနေပဲ ရောင်းချပေးပါတယ်” ဟု Altitude Entertainment Group ၏ လက်မှတ်အရောင်းဌာနမှ တာဝန်ရှိသူက ပြောသည်။
RANGOON DOWNTOWN LIFESTYLE 2024 ပွဲတော်အား ဝန်ကြီးများရုံးတွင် ဒီဇင်ဘာ ၂၅ ရက်မှ ၃၀ ရက်နေ့အထိ နေ့လယ် ၂ နာရီမှ ည ၁၀ အထိ ကျင်းပသွားမည်ဖြစ်ပြီး ဒီဇင်ဘာ ၃၁ ရက် (New Year) ညတွင် နေ့လယ် ၂ နာရီမှ ည ၂ နာရီအထိ ကျင်းသွားမည်ဖြစ်သည်။ အဆိုပါပွဲတော်အတွက် ယနေ့တွင် ဝန်ကြီးများရုံးဝန်းအတွင်း၌ ကြိုတင်ပြင်ဆင်မှုများ ဆောင်ရွက်လျက်ရှိသည်။
